ສຳນັກຂ່າວຕ່າງປະເທດ ລາຍງານໃນວັນທີ 16 ກຸມພາຜ່ານມານີ້ວ່າ ທ່ານ ບາຣັກ ໂອບາມາ ປະທານາທິບໍດີ ແຫ່ງ ສະຫະລັດອາເມຣິກາ ຈະເດີນທາງຢ້ຽມຢາມ ສາທາລະນະລັດສັງຄົມນິຍົມຫວຽດນາມ ໃນເດືອນພຶດສະພາທີ່ຈະມາເຖິງນີ້ ຊຶ່ງເປັນໄປຕາມແຜນການເດີນທາງ ເພື່ອຢ້ຽມຢາມບັນດາປະເທດອາຊີ ແລະ ຕອບສະໜອງຕາມຄຳເຊີນຂອງ ທ່ານ ຫງວຽນເຕິນຢຸງ ນາຍົກລັດຖະມົນຕີຫວຽດນາມ ໃນລະຫວ່າງພົບປະກັນຢູ່ ກອງປະຊຸມສຸດຍອດຜູ້ນຳສະຫະລັດອາເມຣິກາ-ອາຊຽນ ທີ່ລັດກາລິຟໍເນຍ.

ເຈົ້າໜ້າທີ່ທຳນຽບຂາວໄດ້ລະບຸວ່າ ” ປະທານາທິບໍດີ ແລະ ນາຍົກລັດຖະມົນຕີຢຸງ ໄດ້ຫາລືກັນເຖິງ ການສ້າງສາຍພົວພັນຢ່າງຕໍ່ເນື່ອງ ລະຫວ່າງ ສະຫະລັດຯ ແລະ ຫວຽດນາມ ຕະຫລອດປີ 2015 ຜ່ານມາ ຊຶ່ງເປັນວາລະຄົບຮອບ 20 ປີ ຂອງການສະຖາປະນາ ຄວາມສຳພັນທາງການທູດ ”