ຂປລ. ໃນວັນທີ 15 ກຸມພານີ້, ທ່ານ ຈູມມາລີ ໄຊຍະສອນ, ປະທານປະເທດ ແຫ່ງ ສາທາ ລະນະລັດ ປະຊາທິປະໄຕ ປະຊາຊົນລາວ ໄດ້ນຳພາຄະນະຜູ້ແທນລາວ ເຂົ້າຮ່ວມກອງປະຊຸມສຸດຍອດອາຊຽນ-ສະຫະລັດ ສະໄໝພິເສດ ເຊິ່ງໄດ້ຈັດຂຶ້ນທີ່ ຊັນນີແລນ, ລັດຄາລິຟໍເນຍ ສະຫະລັດອາເມລິກາ.
ກອງປະຊຸມສຸດຍອດຄັ້ງນີ້ໄດ້ດໍາເນີນເປັນເວລາ 2 ວັນ (ວັນທີ 15-16 ກຸມພາ 2016) ພາຍໃຕ້ການເປັນປະທານຮ່ວມຂອງທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ໃນຖານະທີ່ ສປປ ລາວ ເປັນປະທານອາຊຽນໃນປີນີ້ ແລະ ທ່ານ ບາຣັກ ໂອບາມາ ປະທານາທິບໍດີ ແຫ່ງ ສະຫະລັດອາເມລິກາ.
ມື້ທຳອິດຂອງກອງປະຊຸມ, ບັນດາຜູ້ນຳຈາກ 10 ປະເທດສະມາຊິກອາຊຽນ ແລະ ສະຫະລັດອາເມລິກາ ໄດ້ສຸມໃສ່ປຶກສາຫາລື ແລະ ແລກປ່ຽນຄວາມຄິດຄວາມເຫັນ ກ່ຽວກັບບັນຫາຕ່າງໆປິ່ນອ້ອມຫົວຂໍ້ “ສົ່ງເສີມການເປັນປະຊາຄົມເສດຖະກິດອາຊຽນ ແຫ່ງນະວັດຕະກຳ ແລະ ຜູ້ປະກອບການ” ໂດຍ ມີຈຸດປະສົງ ເພື່ອວາງທິດທາງ ໃຫ້ແກ່ການເສີມຂະຫຍາຍ ການຮ່ວມມືດ້ານເສດຖະກິດ ແລະ ການຄ້າ-ການລົງທຶນ ລະຫວ່າງອາຊຽນ ແລະ ສະຫະລັດ ເປັນຕົ້ນແມ່ນການແລກປ່ຽນບົດຮຽນ ແລະ ປະສົບການທີ່ດີ ກ່ຽວກັບນະໂຍບາຍ ການສົ່ງເສີມການຄ້າ-ການລົງທຶນ, ເພີ່ມ ທະວີການຮ່ວມມື ໃນດ້ານການພັດທະນາ ວິສາຫະກິດຂະໜາດນ້ອຍ ແລະ ກາງ, ການສົ່ງເສີມການ ນໍາໃຊ້ນະວັດຕະກຳທີ່ກ້າວໜ້າ ແລະ ການເປັນຜູ້ປະກອບການ, ຖ່າຍທອດເຕັກໂນໂລຊີທີ່ທັນສະໄໝ ພ້ອມນັ້ນ, ກອງປະຊຸມໄດ້ຫາລືກ່ຽວກັບບັນຫາການປ່ຽນແປງດິນຟ້າອາກາດ, ຕ້ານການກໍ່ການຮ້າຍ ແລະ ອື່ນໆ.
ໃນຖານະທີ່ ສປປ ລາວເປັນປະທານຮ່ວມຂອງກອງປະຊຸມ, ທ່ານ ຈູມມາລີ ໄຊຍະສອນ ໄດ້ຕີລາຄາ ສູງຕໍ່ໝາກຜົນຂອງການຮ່ວມມື ລະຫວ່າງອາຊຽນ ແລະ ສະຫະລັດອາເມລິກາ ນັບແຕ່ສອງຝ່າຍ ໄດ້ສ້າງຕັ້ງສາຍພົວພັນນຳກັນ ແລະ ສິ່ງສຳຄັນ ສອງຝ່າຍໄດ້ເຫັນດີຍົກລະດັບການຮ່ວມມື ຂຶ້ນເປັນຄູ່ຮ່ວມຍຸດທະສາດ ໃນປີ 2015. ກອງປະຊຸມສຸດຍອດສະໄໝພິເສດຄັ້ງນີ້ ຈຶ່ງເປັນໂອກາດດີເຮັດໃຫ້ສອງຝ່າຍ ໄດ້ປຶກສາຫາລື ເພື່ອກຳນົດທິດທາງການຮ່ວມມື ອາຊຽນ-ສະຫະລັດອາເມລິກາ ໃນອະນາຄົດ. ໃນໂອກາດດັ່ງກ່າວ, ປະທານປະເທດ ແຫ່ງ ສປປ ລາວ ໄດ້ມີຄຳເຫັນຕື່ມວ່າ: ທ່າມກາງເສດຖະກິດໂລກມີການຂະຫຍາຍຕົວ ມີລັກສະນະຊັກຊ້າ ແລະ ບອບບາງ ສະນັ້ນ, ອາຊຽນ ແລະ ສະຫະລັດ ຍິ່ງຕ້ອງໄດ້ ເພີ່ມທະວີການ ຮ່ວມມື ເພື່ອຮັກສາ ແລະ ຊຸກຍູ້ການເຕີບໂຕທາງດ້ານເສດຖະກິດ ກໍຄືການພັດທະນາໃນພາກພື້ນ ແລະ ໃນໂລກ.
ໃນຕອນຄ່ຳຂອງວັນທີ 15 ກຸມພາ 2016, ທ່ານ ຈູມມາລີ ໄຊຍະສອນ ປະທານປະເທດ ໄດ້ເຂົ້າຮ່ວມງານລ້ຽງຕ້ອນຮັບ ເຊິ່ງຈັດໂດຍ ທ່ານ ບາຣັກ ໂອບາມາ ປະທານາທິບໍດີ ຂອງສະຫະລັດອາເມລິກາ ແລະ ໃນຕອນເຊົ້າຂອງວັນດຽວ ກັນ, ປະທານປະເທດເຮົາເຂົ້າໄດ້ເຂົ້າພົບປະສອງຝ່າຍ ກັບ ທ່ານ ໂຈໂກ ວີໂດໂດ ປະທານາທິບໍດີອິນໂດຍເນເຊຍ, ເຊິ່ງທັງສອງຝ່າຍໄດ້ປຶກສາຫາລື ເພື່ອຮັດ ແໜ້ນການຮ່ວມມືສອງຝ່າຍ ລະຫວ່າງ ສປປ ລາວ ແລະ ອິນໂດເນເຊຍ ກໍຄື ການປະສານ ງານ ແລະ ຮ່ວມມືກັນ ເພື່ອຮັບປະກັນຜົນສຳເລັດ ຂອງການເປັນປະທານໝູນວຽນອາຊຽນ ຂອງສປປ ລາວ ໃນປີ 2016 ແລະ ເພື່ອຜົນສຳເລັດທີ່ຍິ່ງໃຫຍ່ກວ່າເກົ່າ ຂອງອາຊຽນໃນຊຸມປີຕໍ່ໜ້າ.
ແຫລ່ງຂ່າວ:
