ວັນທີ 12 ມັງກອນທີ່ຜ່ານມາເຈົ້າໜ້າທີ່ ປກສ ເມືອງໄຊທານີໄດ້ມ້າງຄະດີໃຊ້ເງິນປອມ ຊື້ເລກພ້ອມກັບກັກຕົວຜູ້ຖືກຂໍ້ຫາໄດ້ 1 ຄົນມາທຳການສືບສວນ-ສອບສວນຂະຫຍາຍຜົນຫາແຫຼ່ງທີ່ມາຂອງເງິນປອມ ຈຳນວນ 7000 ໂດລາ.
ຜ່ານການສືບສວນ-ສອບສວນຂອງເຈົ້າໜ້າທີ່ໃຫ້ຮູ້ວ່າ: ທ້າວ ຄຳມີໄຊ ອາຍຸ 43 ປີ ຢູ່ບ້ານທົ່ງປົ່ງ ເມືອງສີໂຄດຕະບອງ ນະຄອນຫຼວງວຽງຈັນ ຊຶ່ງເປັນຜູ້ຖືກຂໍ້ຫາທີ່ຈັບກຸມໄດ້ຢູ່ຮ້ານປີ້ງເປັດແຫ່ງໜຶ່ງໄດ້ເປີດເຜີຍວ່າໄດ້ຮູ້ຈັກກັບຄົນໄທ ຊື່ທ້າວ ໄຊຍະ ພອນ ຢູ່ຄຸກໂພນທັນໃນປີ 2012 ແລະ 2 ປີຕໍ່ມາທ້າວ ໄຊຍະພອນ ໄດ້ໂທລະສັບມາຫາຕົນພ້ອມກັບບອກວ່າມີນ້ຳມັນເຊື້ອໄຟມາຈາກປະເທດສິງກະໂປ ທີ່ຈະມາຈຳໜ່າຍຢູ່ ສປປ ລາວ ແລະມີຄວາມຕ້ອງການໃຫ້ເຮັດທຸລະກິດຮ່ວມກັນ ຫຼື ລົງທຶນ ຮ່ວມກັນເພື່ອສ້າງຕັ້ງບໍລິສັດຕົວແທນຈຳໜ່າຍນ້ຳມັນໂດຍຈະຕັ້ງບໍລິສັດນ້ຳມັນເຊື້ອໄຟຜົ້ງສາລີພ້ອມກັບໃຫ້ຕົນເປັນຜູ້ຕາງໜ້າໃນການປະກອບເອກະສານຕ່າງໆ, ຫຼັງຈາກທີ່ຕົກລົງກັນຕົກແຕກກ່ຽວກັບສັນຍາແລ້ວຕົນຈິ່ງໄດ້ຊວນທ້າວ ວັນດີ ຊຶ່ງເປັນໝູ່ຮັກແພງກັນເຂົ້າມາເຮັດທຸລະກິດກ່ຽວກັບນ້ຳມັນຮ່ວມກັນຕື່ມອີກຕົນ ແລະ ທ້າວ ວັນດີ ໄດ້ພາກັນແລ່ນເອກະສານຕ່າງໆຕາມຂັ້ນຕອນແຕ່ຖືກພາກ ສ່ວນກ່ຽວຂ້ອງແນະນຳວ່າທຸກພາກສ່ວນທີ່ຕ້ອງການສ້າງຕັ້ງບໍລິສັດໃດໜຶ່ງຈະຕ້ອງມີເງິນຈົດທະບຽນຢ່າງໜ້ອຍ 10.000 ໂດລາແຕ່ຕົນ ແລະ ຄູ່ຮ່ວມທຸລະກິດບໍ່ມີເງິນຈິ່ງໄດ້ໂຈະການແລ່ນເອກະສານໄວ້ຊົ່ວຄາວກ່ອນ.
ໃນໄລຍະທີ່ໂຈະການແລ່ນເອກະສານດັ່ງກ່າວຄູ່ຮ່ວມທຸລະກິດທີ່ເປັນຄົນໄທໄດ້ບອກໃຫ້ຕົນ ແລະ ໝູ່ຊອກກູ້ເງິນໃຫ້ກັບຄູ່ຮ່ວມທຸລະກິດທີ່ເປັນຄົນໄທຢືມ,ຕົນເອງໄດ້ຕອບຕົກລົງພ້ອມກັບໄປກູ້ຢືມເງິນນຳເອື້ອຍຄີງໄດ້ 6.000 ໂດລາບວກກັບເງິນຂອງທ້າວ ວັນດີ ຕື່ມອີກ 190.000 ບາດ, ຕົກມາຮອດວັນທີ 9 ກັນຍາ 2015 ພວກຄົນໄທໄດ້ນຳເອົາເງິນຈຳນວນ 7 ພັນໂດລາ ມາໃຊ້ຄືນຕົນຈິ່ງໄດ້ນຳເອົາເງິນຈຳນວນດັ່ງກ່າວກັບໄປໃຫ້ເອື້ອຍເພື່ອກວດເບິ່ງວ່າເປັນເງິນປອມ ຫຼື ເງິນແທ້, ຜົນປາກົດວ່າເປັນເງິນໂດລາປອມທັງໝົດເອື້ອຍຂອງຕົນຈິ່ງໄດ້ແນະນຳໃຫ້ເອົາເງິນໂດລາປອມທັງໝົດນີ້ໄປແຈ້ງແລະມອບໃຫ້ກັບເຈົ້າໜ້າທີ່ຕຳຫຼວດໄວ້ເປັນຂອງກາງ.
ຕໍ່ມາຕົນໄດ້ນຳເອົາເງິນໂດລາປອມຈຳນວນ 3000 ໂດລາໃຫ້ກັບເຈົ້າໜ້າທີ່ ປກສ ເມືອງໄຊທານີ ແລະສ່ວນທີ່ຍັງເຫຼືອ 4000 ໂດລາແມ່ນໄດ້ນຳມາແບ່ງປັ່ນກັນກັບທ້າວ ວັນດີ ຄົນລະເຄິ່ງພ້ອມກັບໄດ້ນຳເອົາເງິນດັ່ງກ່າວອອກມານຳໃຊ້ຢູ່ໃນສັງຄົມໃນນີ້ໄດ້ນຳເອົາເງິນໂດລາປອມຈຳນວນດັ່ງກ່າວໄປຊື້ເລກຈຳນວນ 8 ຄັ້ງເປັນເງິນ 1200 ໂດລາ ແລະ ຄັ້ງຫຼ້າສຸດໃນວັນທີ 11 ກຸມພາ ໄດ້ນຳເອົາເງິນຈຳນວນ 200 ໂດລາໄປຊື້ເລກຢູ່ ແຖວຫຼັກ 5 (ໜ້າກົມໃຫຍ່ພະລາທິການ ກອງທັບ) ແລະໂຊກດີໄດ້ຖືກເລກ 3 ໂຕໃນຈຳນວນເງິນ 10000 ກີບ ແຕ່ບໍ່ກ້າໄປເອົາເງິນ, ມື້ຕໍ່ມາຕົນຈິ່ງໄດ້ໃຫ້ທ້າວ ຕູ່ ຢູ່ບ້ານໂພນຕ້ອງ ໄປເອົາເງິນແທນເມື່ອເຖິງເວລາປະມານ 17:00 ໂມງ ທ້າວ ຕູ່ ໄດ້ໂທລະສັບມາຫາຕົນໃຫ້ໄປເອົາເງິນທີ່ໄປຮັບມາແລ້ວຢູ່ທີ່ຮ້ານປີ້ງເປັດຫຼັກ 3 ໃກ້ກັບໂຮງຮຽນການຊ່າງລາວ-ເຢຍລະມັນ, ຈາກນັ້ນຈິ່ງໄດ້ຊວນທ້າວ ວັນດີ ໄປເອົາເງິນທີ່ທ້າວ ຕູ່ ຮັບມາ ແລະຖືກເຈົ້າໜ້າທີ່ກັກຕົວຢູ່ຮ້ານດັ່ງກ່າວ.
ຂະນະທີ່ທ້າວ ວັນດີ ເປີດເຜີຍຕື່ມວ່າ: ເງິນໂດລາປອມຈຳນວນ 2000 ໂດລານັ້ນ ໄດ້ເອົາໃຫ້ລູກຊາຍ ແລະໝູ່ຂອງລູກຊາຍຄົນລະ 100 ໂດລາ, ເອົາໃຫ້ທ້າວ ແອັດ ນຳໄປແລກປ່ຽນ ແລະຊື້ຢາບ້າ ຈຳນວນ 1700 ໂດລາ, ສ່ວນທີ່ຍັງເຫຼືອ 100 ແມ່ນຈູດໄຟຖິ້ມ ແລະມາຖືກເຈົ້າໜ້າທີ່ ກັກຕົວຢູ່ຮ້ານອາຫານດັ່ງກ່າວ.
ທີ່ມາ: