ເພື່ອຫຼີກລ້ຽງບັນຫາການເກີດອຸບັດເຫດ ທີ່ມັກຈະເກີດຂື້ນໄລຍະ 7 ວັນອັນຕະລາຍ ໃນງານບຸນສະເຫຼີມສະຫຼອງປີໃໝ່ລາວ ພສ 2557 ທີ່ຈະມາເຖິງນີ້ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໄດ້ລົງໂຄສະນາ-ປະຊາສຳພັນ ປຸກລະດົມໃຫ້ຜູ້ທີ່ໃຊ້ລົດໃຊ້ຖະໜົນ ເວົ້າສະເພາະຢູ່ນະຄອນຫຼວງວຽງຈັນ ທີ່ມີການຈະລາຈອນນັບມື້ນັບໜາແໜ້ນຂື້ນທຸກໆມື້ ໃຫ້ມີຄວາມປອດໄພໃນການເດີນທາງ ແລະ ເພື່ອເຮັດໃຫ້ການສະເຫຼີມສະຫຼອງງານບຸນປີໃໝ່ໃນປີນີ້ ຂອງພໍ່ແມ່ປະຊາຊົນລາວບັນດາເຜົ່າ ມີຄວາມປອດໄພ ແລະ ເບີດບານມ່ວນຊື່ນ.
ການລົງໂຄສະນາ-ປະຊາສຳພັນ ປຸກລະດົມໃຫ້ຜູ້ທີ່ໃຊ້ລົດໃຊ້ຖະໜົນ ແມ່ນປະຕິບັດຕາມຈຸດຊຸມຊົນ ແລະ ຈຸດສ່ຽງຕ່າງໆເຊັ່ນ: 4 ແຍກຫຼັກ 6 ໄຟແດງທາດຫຼວງ 3 ແຍກຫ້ວຍຫົງ 4 ແຍກໂພນຕ້ອງ 3 ແຍກຈີ່ນາຍໂມ້ 3 ແຍກທາງເຂົ້າໂຮງຮຽນດົງຄຳຊ້າງ ແລະ 3 ແຍກສີໄຄ ໄປຄຽງຄູ່ກັບປະຊາສຳພັນກົດລະບຽບຈະລາຈອນຂອງເຈົ້າໜ້າທີ່ ໄດ້ມີການຖາມ-ຕອບຄຳຖາມກ່ຽວກັບກົດລະບຽບການສັນຈອນ ເພື່ອຮັບເອົາຂອງລາງວັນ.
ສຳລັບງານບຸນສະເຫຼີມສະຫຼອງປີໃໝ່ລາວປີນີ້ ທາງກົມໃຫຍ່ຕຳຫຼວດຈະລາຈອນ ແມ່ນໄດ້ມີແຜນການຈັດສັນຄວາມເປັນລະບຽບຮຽບຮ້ອຍຕາມທ້ອງຖະໜົນ ເປັນຕົ້ນແມ່ນຈະໄດ້ປະຕິບັດໜ້າທີ່ຢູ່ປະຈຳຈຸດ ປະຈຳປ້ອມ ປະຈຳຈຸດຄອຍເຫດສຸກເສີນ ປະຈຳຈຸດເຂດທີ່ມີຄວາມຊັບສົນ ໂດຍສະເພາະແມ່ນຢູ່ຕະຫຼາດ ສະຖານທີ່ແຫຼ່ງທ່ອງທ່ຽວ ບ່ອນທີ່ອົງການຈັດຕັ້ງຕ່າງໆຈະຈັດໃຫ້ພໍ່ແມ່ປະຊາຊົນໄປຫຼີ້ນເຊັ່ນ: ແຄມຂອງ ແລະ ສະຖານທີ່ອື່ນໆ ທາງເຈົ້າໜ້າທີ່ຂອງພວກເຮົາ ແມ່ນໄດ້ຈັດກອງກຳລັງເພື່ອຮອງຮັບບັນຫາຕ່າງໆທີ່ຈະເກີດຂື້ນ.
ນອກຈາກນີ້ ກົມຕຳຫຼວດຈະລາຈອນພວກເຮົາ ຍັງໄດ້ອອກໃບແຈ້ງການໃຫ້ເຈົ້າໜ້າທີ່ຕຳຫຼວດຈະລາຈອນທົ່ວປະເທດ ໃຫ້ມີການຫ້າງຫາກະກຽມຈັດສັນກຳລັງ ເພື່ອຮອງຮັບໝົດທຸກສິ່ງທຸກຢ່າງ ເປັນຕົ້ນແມ່ນການຈັດສັນຄວາມເປັນລະບຽບຮຽບຮ້ອຍຕາມຖະໜົນຫຼວງ ໂດຍສະເພາະ ຕາມຖະໜົນ 13 ເໜືອ 13 ໃຕ້ ແລະ ເສັ້ນທາງຫຼວງແຫ່ງຊາດຕ່າງໆ ເພື່ອກວດກາເບິ່ງອຸບັດເຫດທາງຍາວບໍ່ໃຫ້ເກີດຂື້ນ ເປັນຕົ້ນແມ່ນ ມີການມືນເມົາແລ້ວຂັບຂີ່ລົດໂດຍສານ ລົດບັນທຸກ ລົດຂົນສົ່ງສີນຄ້າຕ່າງໆ ສະນັ້ນ ໂດຍໄດ້ຈັດກຳລັງໜຶ່ງຂື້ນມາສະເພາະ ເພື່ອຈັດສັນບັນຫາດັ່ງກ່າວນີ້.
ການສະເຫຼີມສະຫຼອງງານບຸນປີໃໝ່ 2013 ທີ່ຜ່ານມາ ທົ່ວປະເທດມີອຸບັດເຫດເກີດຂື້ນທັງໝົດ 181 ກໍລະນີ ພາຫະນະເປ່ເພ 302 ຄັນ ມີຄົນບາດເຈັບ 330 ຄົນ ແລະ ເສຍຊີວິດ 23 ຄົນ ສະເພາະໃນນະຄອນຫຼວງວຽງຈັນ ມີອຸບັດເຫດເກີດຂື້ນທັງໝົດ 34 ກໍລະນີ ພາຫະນະເປ່ເພ 65 ຄັນ ມີຄົນບາດເຈັບ 60 ຄົນ ແລະ ເສຍຊີວິດ 2 ຄົນ.
ທີ່ມາ http://www.vientianemai.net/teen/khao/1/11505