ວັນທີ 12 ກຸມພາ 2016 ນີ້, ທີ່ເມືອງວຽງໄຊແຂວງຫົວພັນໄດ້ມິພິທີມອບ-ຮັບສວນມິດຕະພາບຊາກຸລະລາວ-ຍີ່ປຸ່ນຂຶ້ນໂດຍການເຂົ້າຮ່ວມຂອງທ່ານ ວັນໄຊ ແພງຊຸມມາ ເລຂາຄະນະບໍລິຫານງານພັກແຂວງ ເຈົ້າແຂວງຫົວພັນ, ທ່ານ ທາເຄຊິ ຮີຄີຮາຣະ ເອກອັກ ຄະລາຊະທູດວິສາມັນຜູ້ມີອຳນາດເຕັມແຫ່ງປະເທດຢີ່ປຸນປະຈຳ ສປປ ລາວ, ທ່ານ ແຫຼວຄຳ ອິນທະວົງ ຮອງພະແນກອາຊີຕາເວັນອອກສຽງເໜືອກະຊວງການຕ່າງປະເທດ, ທ່ານປະທານສະມາຄົມຄົນພິການແຫ່ງປະເທດຍີ່ປຸ່ນ, ແຂກຖືກເຊີນຈາກແຂວງ, ການນຳ ເມືອງວຽງໄຊ ຕະຫຼອດຮອດມວນຊົນຊາວເມືອງວຽງໄຊເຂົ້າຮ່ວມນຳ.
ໂອກາດນີ້ ທ່ານເຈົ້າແຂວງຫົວພັນ ກ່າວວ່າ: ໂຄງການກໍ່ສ້າງສວນມິດຕະ ພາບຊາກຸລະ ລາວ-ຍີ່ປຸ່ນແຫ່ງນີ້ ແມ່ນ ໄດ້ຮັບການເຫັນດີສະໜັບສະໜູນຈາກ ທ່ານນາຍົກລັດຖະມົນຕີ ແຫ່ງ ສປປ ລາວແລະນາຍົກລັດຖະມົນຕີແຫ່ງປະເທດຍີ່ ປຸ່ນໃນຕົ້ນປີ 2013 ແຂວງຫົວພັນໄດ້ ຮ່ວມກັບສະຖານທູດຍີ່ປຸ່ນປະຈຳ ສປປ ລາວ ແລະ ອົງການກ່ຽວຂ້ອງຈາກປະເທດຍີ່ປຸ່ນເປັນຕົ້ນແມ່ນສະມາຄົມໄຊຕະມະ-ລາວ, ສະມາຄົມຄົນພິການ (ADDP), ສະມາຄົມ (Lionclup) ໄດ້ພ້ອມກັນ ປູກທົດລອງຢູ່ 4 ຈຸດຂອງແຂວງຫົວພັນຄື: ເຂດ ໜອງຄ້າງ, ເຂດສະເຫຼີຍ, ເທສະບານເມືອງຊຳເໜືອ ແລະເທສະບານເມືອງວຽງໄຊ, ຜ່ານການປູກທົດ ລອງເຫັນວ່າຢູ່ຈຸດເທສະບານເມືອງວຽງໄຊໄດ້ຮັບຜົນດີກວ່າໝູ່ມີຕົ້ນຊາກຸລະຈຳນວນໜຶ່ງທີ່ນຳມາປູກ ທົດລອງນັ້ນໄດ້ອອກດອກເບັ່ງບານຢ່າງສວຍສົດ ງົດງາມ, ສ້າງຄວາມປະທັບໃຈ ແລະເພິ່ງພໍໃຈແກ່ປະ ຊາຊົນຊາວແຂວງຫົວພັນເປັນຢ່າງຍິ່ງ.
ເພື່ອສືບຕໍ່ຜັນຂະຫຍາຍແຜນການຮ່ວມ ມືຂອງສອງລັດຖະບານລາວ-ຍີ່ປຸ່ນ, ແຂວງຫົວພັນຈິ່ງໄດ້ເຊັນສັນຍາກັບບໍລິສັດຮຶງຟາດກໍ່ສ້າງເປັນຜູ້ລົງມືກໍ່ສ້າງສວນດອກຊາກຸລະແຫ່ງນີ້ ຊຶ່ງມີເນື້ອທີ່ ທັງໝົດ 1,8 ເຮັກຕາໃນນີ້: ກໍ່ສ້າງເນື້ອ ທີ່ເຂດຂຽວ 9.240 ຕາແມັດ, ເນື້ອທີ່ ທາງຍ່າງ 5.323 ຕາແມັດ, ເນື້ອທີ່ ເດີ່ນຈອດລົດ 3.487 ຕາແມັດ ສາມາດ ປູກຕົ້ນຊາກຸລະໄດ້ 350 ຕົ້ນ ແລະມີມູນຄ່າການກໍ່ສ້າງທັງໝົດ 7,8 ຕື້ກວ່າ ລ້ານກີບ ໂດຍເປັນທຶນສົມທົບລະຫວ່າງລັດຖະບານ ແຫ່ງ ສປປ ລາວ ແລະລັດຖະບານປະເທດຍີ່ປຸ່ນ.
ໂຄງການກໍ່ສ້າງສວນດັ່ງກ່າວໃຊ້ເວລາກໍ່ສ້າງ 12 ເດືອນ ຊຶ່ງມີໜ້າວຽກດັ່ງນີ້: ບຸກເບີກ, ປັບພື້ນທີ່ ແລະຖົມດິນ, ກໍ່ສ້າງ ທາງຍ່າງພາຍໃນສວນ, ກໍ່ສ້າງລະບົບ ຮ່ອງລະບາຍນ້ຳເສຍ, ຕິດຕັ້ງລະບົບໄຟ ຟ້າ-ນ້ຳປະປາ ແລະວຽກກໍ່ສ້າງປ້າຍຊື່, ຊຶ່ງມາຮອດປະຈຸບັນໄດ້ສຳເລັດແລ້ວ 100%.
ທ່ານ ວັນໄຊ ກ່າວຕື່ມວ່າໂຄງການນີ້ສຳເລັດໄດ້ຍ້ອນການຮ່ວມມື ແລະເອົາໃຈໃສ່ຂອງທຸກພາກສ່ວນ ລາວ-ຍີ່ປຸ່ນ ຈິ່ງເຮັດໃຫ້ການກໍ່ສ້າງມີຜົນສຳເລັດ ແລະປະຈຸບັນຕົ້ນຊາກຸລະກຳລັງເຕີບໂຕ ແລະຂະຫຍາຍຕົວດີ, ໂຄງການນີ້ໄດ້ກາຍເປັນຂີດໝາຍໃໝ່ທີ່ສຳຄັນທີ່ສຸດຕໍ່ກັບການຮ່ວມມືຮອບດ້ານຂອງສອງປະເທດລາວ-ຍີ່ປຸ່ນປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງແຂວງຫົວພັນກໍ່ຄືເມືອງວຽງໄຊໃນອະນາຄົດ.
ທີ່ມາ: