ອົງການສະຫະປະຊາຊາດ (ສປຊ) ອອກມາເຕືອນໃນວັນຈັນທີ 15 ກຸມພາ ໂດຍລະບຸ ຜູ້ຄົນກວ່າ 49 ລ້ານຄົນທີ່ອາໄສຢູ່ທາງພາກໃຕ້ຂອງທະວີບອາຟຣິກາ ຕົກຢູ່ໃນພາວະສ່ຽງທີ່ຈະໄດ້ຮັບຜົນກະທົບຈາກພາວະໄພແລ້ງສຸດໆໃນປີນີ້.
ລາຍງາສະບັບຫຼ້າສຸດຂອງອົງການອາຫານໂລກແຫ່ງສະຫະປະຊາຊາດ (United Nations World Food Program : WFP) ທີ່ມີການເຜີຍແຜ່ໃນວັນຈັນ 15 ກຸມພາລະບຸວ່າ ປະຊາຊົນປະມານ 40 ລ້ານຄົນທີ່ອາໄສຢູ່ໃນເຂດຊົນນະບົດຂອງປະເທດຕ່າງໆ ທາງພາກໃຕ້ຂອງທະວີບອາຟຣິກາ ຖືເປັນປະຊາກອນສ່ຽງທີ່ຈະໄດ້ຮັບຜົນກະທົບຈາກພາວະໄພແລ້ງທີ່ສຸດໃນປີນີ້.
ນອກຈາກນັ້ນ ລາຍງານສະບັບຫຼ້າສຸດນີ້ຍັງລະບຸວ່າ ຜູ້ທີ່ສ່ຽງຈະໄດ້ຮັບຜົນກະທົບຍັງລວມເຖິງ “ຄົນທຸກຍາກໃນເຂດເມືອງ” ອີກ 9 ລ້ານຄົນໃນພື້ນທີ່ດຽວກັນ ຊຶ່ງມີຄວາມສ່ຽງທີ່ຈະໄດ້ຮັບຜົນກະທົບຈາກພາວະໄພແລ້ງແສນສາຫັດໃນປີ 2016 ນີ້ ໂດຍທີ່ໃນຈຳນວນນີ້ມີກວ່າ 14 ລ້ານຄົນທີ່ເລີ່ມປະເຊີນກັບພາວະອົດຢາກຂາດແຄນອາຫານ ທີ່ເປັນຜົນມາຈາກໄພແລ້ງໃນພູມິພາກແຫ່ງນີ້ແດ່ແລ້ວ.
ລາຍງານຂອງໂຄງການອາຫານໂລກລະບຸວ່າ ພາວະຄວາມແຫ້ງແລ້ງຮຸນແຮງໃນພູມິພາກອາຟຣິກາຕອນໃຕ້ໃນປີນີ້ ເປັນຜົນພວງໂດຍກົງຈາກປາກົດການ “ເອລ ນິນໂຢ” ທີ່ມີຄວາມຮຸນແຮງທີ່ສຸດໃນຮອບ 35 ປີ ຊຶ່ງເຮັດໃຫ້ພູມິພາກນີ້ຂອງທະວີບປະເຊີນກັບພາວະຝົນແລ້ງທີ່ສຸດນັບຕັ້ງແຕ່ປີ 1981 ເປັນຕົ້ນມາ ກົງກັນຂ້າມກັບສະພາບອາກາດຮ້ອນທີ່ສຸດທີ່ຍູ້ອຸນຫະພູມໃຫ້ພຸ່ງສູ່ລະດັບສູງສຸດໃນຮອບຫຼາຍປີ.
ແລະເມື່ອບໍ່ມີຝົນ ລາຍງານຂອງໂຄງການອາຫານໂລກລະບຸວ່າ ບັນດາພືດພັນແລະຜົນຜະລິດທາງການກະເສດທັງຫຼາຍໂດຍສະເພາະເຂົ້າ ແລະເຂົ້າສາລີຕ່າງໆໄດ້ຮັບຄວາມເສຍຫາຍ ກະທົບຕໍ່ຕ່ອງໂສ້ອາຫານຂອງປະຊາກອນນັບລ້ານໃນພື້ນທີ່ດັ່ງກ່າວ ຊຶ່ງເປັນທີ່ຕັ້ງຂອງຫຼາຍປະເທດທັງ ເລໂຊໂທ, ສະວາຊີແລນ, ຊຳບີ, ຊິມບັບເວ, ມາລາວີ, ອາຟຣິກາໃຕ້, ອັງໂກລາ, ໂມຊຳບິກ, ມາມິບີ ແລະ ບອດສະວານາ.