ໃນວັນທີ 22 ມັງກອນຜ່ານມາ ເຈົ້າໜ້າທີ່ຕຳຫຼວດ ປກສ ເມືອງປາກຊັນ ແຂວງບໍລິຄຳໄຊ ໄດ້ຮັບແຈ້ງຄວາມຈາກ ທ້າວຄຳພັນ ຢູ່ບ້ານບົງວ່າ: ໄດ້ມີຄົນຮ້າຍ ມາລັກເອົາລົດຈັກເວບຈີນສີດຳຂອງຕົນທີ່ຂັບຂີ່ໄປຫາປາ ແລະຈອດໄວ້ແຄມນ້ຳສາ, ຈາກນັ້ນເຈົ້າໜ້າທີ່ ປກສ ກຸ່ມໂພນ ໄຊ (ໃຕ້) ຈິ່ງໄດ້ຂຶ້ນບັນຊີເປົ້າໝາຍຕິດຕາມ, ມາຮອດວັນທີ 29 ເດືອນດຽວກັນ ຈິ່ງສາມາດກັກຕົວຜູ້ຖືກຫາໄດ້ໜຶ່ງຄົນຄື ທ້າວ ສາຍຝົນ ອາຍຸ 23 ປີ ຊຶ່ງເປັນຄົນບ້ານດຽວກັນກັບຜູ້ເສຍຫາຍ ພ້ອມດ້ວຍຂອງກາງລົດຈັກຄັນດັ່ງກ່າວ ຫຼັງຈາກນັ້ນໄດ້ສົ່ງໃຫ້ເຈົ້າໜ້າທີ່ພະແນກຕຳຫຼວດ ປກສ ເມືອງປາກຊັນ ດຳເນີນການສືບສວນ-ສອບສວນຕາມຂັ້ນຕອນຂອງກົດໝາຍ.
ຜ່ານການສືບສວນ-ສອບສວນ ທ້າວ ສາຍຝົນໄດ້ໃຫ້ການຮັບສາລະພາບວ່າ: ໃນວັນທີ 22 ມັງກອນ 2016 ເວລາປະມານ 09 ໂມງ ຜູ້ກ່ຽວພ້ອມກັບໝູ່ 04 ຄົນຄື ທ້າວ ໃຈ, ທ້າວ ລິນ, ທ້າວນິ່ງ ແລະທ້າວສຸ້ຍ ໄດ້ພາກັນໄປຄວ່າງແຫຫາ ປາຢູ່ວັງລີ່ຜີ ພໍຮອດເວລາປະມານ 12 ໂມງຂອງວັນດຽວກັນຕົນໄດ້ຄອບໝູ່ກັບເມືອບ້ານໃນເວລາເດີນທາງກັບບ້ານໄດ້ເຫັນລົດຈັກເວບຈີນສີດຳຈອດປະໄວ້ແຄມນ້ຳສາຈາກນັ້ນຜູ້ກ່ຽວຈິ່ງໄປໄຂ ເບາະລົດແລ້ວເຫັນກະແຈລົດປະໄວ້ໃນເບາະຈິ່ງໄດ້ຂັບຂີ່ລົດຈັກຄັນດັ່ງກ່າວກັບມາບ້ານແລ້ວເອົາໄປຊຸກເຊື່ອງໄວ້ປ່າແຄມບ້ານ, ຮອດເວລາ 18 ໂມງຂອງວັນດຽວກັນຕົນຈິ່ງໄດ້ຂັບຂີ່ລົດຈັກຄັນດັ່ງກ່າວໄປຈ່າວຂາຍໃຫ້ປະຊາຊົນ ບ້ານສິນໄຊ ເມືອງປາກຊັນ, ໃນລາຄາ 1 ລ້້ານກີບ ແຕ່ບໍ່ມີຄົນຊື້ຜູ້ກ່ຽວຈິ່ງໄປນອນພັກເຊົານຳ ທ້າວ ຕູ່ ຮອດວັນທີ 23 ມັງກອນ 2016 ໄດ້ມີນາງ ແດງ ຢູ່ບ້ານສິນໄຊ ເມືອງປາກຊັນ ມາຮັບຊື້ລົດຈັກຄັນດັ່ງກ່າວນຳຜູ້ກ່ຽວ ຊຶ່ງຂາຍໃນລາຄາ 5 ແສນກີບ ເມື່ອຂາຍລົດໄດ້ ແລ້ວຜູ້ກ່ຽວໄດ້ໄປພັກເຊົານຳໝູ່ຢູ່ບ້ານອານຸສອນໄຊ ເມືອງປາກຊັນ, ສ່ວນເງິນ ກໍເອົາໄປຊື້ໂທລະສັບມືຖືຈຳນວນ 1 ໜ່ວຍ ໃນລາຄາ 4,5 ແສນກວ່າກີບ ແລະ ອີກ 50 ພັນກີບ ກໍເອົາໄປຊື້ຢາບ້າມາ ເສບຈົນໝົດ.
ເຈົ້າໜ້າທີ່ ປກສ ເມືອງ ປາກຊັນໄດ້ ໃຫ້ຮູ້ຕື່ມວ່າ: ຜ່ານການສືບສວນ-ສອບ ສວນຂອງເຈົ້າໜ້າທີ່ເຫັນວ່າການກະ ທຳຂອງ ທ້າວ ສາຍຝົນ ເປັນການກະທຳຜິດໃນສະຖານລັກຊັບພົນລະເມືອງ ຊຶ່ງຜິດຕໍ່ມາດຕາ 119 ຂອງກົດໝາຍ ອາຍາແຫ່ງ ສປປ ລາວ, ປະຈຸບັນພວມ ສະຫຼຸບສຳນວນຄະດີເພື່ອສົ່ງໄອຍະການ ຟ້ອງສານຕັດສິນຕາມກົດໝາຍ, ສ່ວນ ລົດຈັກເວບຈີນ ສີດຳ ທີ່ຜູ້ຖືກຫາລັກໄປ ທາງເຈົ້າໜ້າທີ່ສາມາດເກັບກູ້ຄືນມາໄດ້ແລະກໍມອບຄືນໃຫ້ເຈົ້າຂອງເດີມເປັນ ທີ່ຮຽບຮ້ອຍແລ້ວໃນວັນທີ 11 ກຸມພາ 2016 ກ່າວມອບໂດຍ ທ່ານ ພັນຕີ ຄຳ ແດງ ຫຼວງຜ່ານ ຫົວໜ້າ ປກສ ກຸ່ມໂພນ ໄຊໃຕ້, ກ່າວຮັບໂດຍທ່ານ ແສງທອງ ພຸດທະວົງ ຫົວໜ້າ ປກສ ບ້ານບົງ ຊຶ່ງ ຕາງໜ້າໃຫ້ແກ່ເຈົ້າຂອງຊັບ.
ທີ່ມາ: