ບັນດາຜູ້ບໍລິໂພກສ່ວນໃຫຍ່ ຕ່າງກໍພາກັນກັງວົນໃນເລື່ອງຂອງລາຄາສິນຄ້າປະເພດຜັກ ບໍ່ໜ້ອຍໄປກວ່າລາຄາສິນຄ້າປະເພດຊິ້ນ ທີ່ມີການປັບຂຶ້ນໃນແຕ່ລະປີ ຈົນເປັນປະເພນີ ຕາມການບໍລິໂພກທີ່ສູງຂຶ້ນນັ້ນເອງ ຂະນະທີ່ລາຄາຂອງຜັກໃນໄລຍະກ່ອນປີໃໝ່ 2557 ນີ້ ມີຜັກບາງຊະນິດປັບຂຶ້ນເລັກນ້ອຍ ແລະ ບາງປະເພດຫຼຸດລົງໃນລະດັບທີ່ໃກ້ຄຽງກັບລາຄາເດີມ.
ກ່ອນເທດສະການປີໃໝ່ລາວ ພ.ສ 2557 (ວັນທີ 14-16 ເມສາ) ເຫັນວ່າບັນຍາກາດໃນການຊື້-ຂາຍຕາມທ້ອງຕະຫຼາດໃຫຍ່ ໃນໃຈກາງນະຄອນຫຼວງວຽງຈັນ ເລີ່ມຄຶກຄື້ນ ເພາະມີຜູ້ບໍລິໂພກໄດ້ຄ່ອຍພາກັນອອກໄປຊື້ສີນຄ້າປະເພດແຫ້ງ ທີ່ຈຳເປັນມາແຮໄວ້ແດ່ແລ້ວ ເຊື່ອກັນວ່າລາຄາສິນຄ້າຕາມທ້ອງຕະຫຼາດທົ່ວໄປ ເກືອບທຸກປະເພດ ຈະແຫ່ພາກັນປັບລາຄາຂຶ້ນ ແຕ່ປະເພດຊິ້ນ ແລະ ຜັກ ພວກເຂົາບໍ່ສາມາດຈະຊື້ໄວ້ໄດ້ ເມື່ອເວລານັ້ນມາເຖິງກໍຕ້ອງທຳໃຈ ເຖິງວ່າຈະມີມາດຕະການຄວບຄຸ້ມລາຄາສິນຄ້າດັ່ງກ່າວໄວ້ແລ້ວກໍຕາມ.
ນາງ ແອ ແມ່ຄ້າຂາຍຜັກຕະຫຼາດຫົວຂົວ ກ່າວວ່າ: ລາຄາສິນຄ້າປະເພດຜັກ ຍັງເຫັນວ່າຢູ່ໃນເກນປົກກະຕິ ມີບາງປະເພດກໍປັບຂຶ້ນ ແລະ ບາງປະເພດກໍຫຼຸດລົງເລັກນ້ອຍເທົ່ານັ້ນ ເມື່ອທຽບກັບເດືອນມີນາຜ່ານມາ ເຊັ່ນ: ຫອມປ້ອມຈາກລາຄາ 7.000-8.000 ກີບຕໍ່ກິໂລ ຂຶ້ນມາຢູ່ທີ່ລາຄາ 10.000-12.000 ກີບ ຜັກບົ່ວ 10.000 ກີບຕໍ່ກິໂລ ກະລ່ຳ ຈາກ 4.000 ກີບຕໍ່ກິໂລ ມາເປັນ 2.000-3.000 ກີບ ໝາກນາວຍັງຢູ່ໃນລາຄາເດີມ 15.000-18.000 ກີບຕໍ່ກິໂລ ແລະ ໝາກຖົ່ວຍາວຈາກ 15.000 ກີບ ຫຼຸດລົງມາຢູ່ທີ່ປະມານ 10.000 ກີບຕໍ່ກິໂລ.
ນາງ ແອ ຍັງເວົ້າວ່າ: ຕາມປົກກະຕິທຸກປີກ່ອນເທດສະການປີໃໝ່ປະມານ 1-2 ອາທິດ ລາຄາສິນຄ້າທີ່ກ່າວມາຂ້າງເທິງ ຈະປັບຂຶ້ນໂດຍອັດຕະໂນມັດ ແລະ ກໍຈະຢູ່ໂຕໄປຈົນກວ່າການສະຫຼອງເທດສະການປີໃໝ່ຈະຜ່ານໄປ ຄ່ອຍປັບລົງມາໃນເກນລາຄາປົກກະຕິອີກຄັ້ງ ສາຍເຫດມາຈາກ 2 ປັດໄຈຫຼັກຄື: ຜູ້ບໍລິໂພກຈະພາກັນອອກມາຊຶ້ໃນໄລຍະດຽວກັນ ຈົນເຮັດໃຫ້ສິນຄ້າບາງປະເພດຂາດຕະຫຼາດ ສ່ວນສາເຫດທີ່ສອງ ມາຈາກອາກາດຮ້ອນ ເຮັດໃຫ້ສິນຄ້າປະເພດຜັກຕ່າງປູກຍາກ ກາຍເປັນທີ່ມາພາໃຫ້ເກີດມີລາຄາສິນຄ້າປັບຂຶ້ນ.
ທີ່ມາ http://www.vientianemai.net/teen/khao/1/11508