ໂຕໂຢຕ້າ ມໍເຕີ ເດີນເຄື່ອງການຜະລິດລົດອີກຄັ້ງທີ່ໂຮງງານປະກອບຊິ້ນສ່ວນໃນຍີ່ປຸ່ນ ຫຼັງຂາດຊິ້ນສ່ວນໃນການຜະລິດ.
ກ່ອນໜ້ານີ້ ໂຕໂຢຕ້າ ປະກາດລະງັບການຜະລິດໃນໂຮງງານຂອງບໍລິສັດທັງໝົດ 16 ແຫ່ງຕັ້ງແຕ່ວັນທີ 8-13 ກຸມພາ ເນື່ອງຈາກເຫດລະເບີດທີ່ເກີດຂຶ້ນທີ່ໂຮງງານເຫຼັກທາງຕອນກາງຂອງປະເທດນັ້ນ ສົ່ງຜົນໃຫ້ໂຕໂຢຕ້າຂາດແຄນເຫຼັກຊະນິດພິເສດໃນການຜະລິດ ໂດຍເຫດລະເບີດດັ່ງກ່າວເກີດຂຶ້ນເມື່ອວັນທີ 8 ມັງກອນ ທີ່ໂຮງງານຜະລິດເຫຼັກຊຶ່ງບໍລິຫານຈັດການໂດຍບໍລິສັດເຄືອຂ່າຍໂຕໂຢຕ້າກໍຄື ອາອິຊິ ສະຕີລ.
ການລະງັບການຜະລິດດັ່ງກ່າວເຊື່ອວ່າສົ່ງຜົນກະທົບຕໍ່ລົດປະມານ 70.000-80.000 ຄັນ ເມື່ອຄິດໄລຕາມກຳລັງການຜະລິດຂອງໂຕໂຢຕ້າທີ່ 13.000 ຄັນຕໍ່ວັນ ໂດຍເດືອນກຸມພາແລະມີນາເປັນໄລຍະທີ່ມີການຜະລິດຄຶກຄັກຫຼາຍທີ່ສຸດສຳລັບຜູ້ຜະລິດລົດ ເນື່ອງຈາກຄຳສັ່ງຜະລິດລົດໃໝ່ມີທ່າອຽງປັບຕົວຂຶ້ນກ່ອນເລີ່ມປີການເງິນໃໝ່ໃນເດືອນເມສາ.
ທັງນີ້ ນັບເປັນຄັ້ງທຳອິດທີ່ໂຕໂຢຕ້າລະງັບການຜະລິດທັງໝົດໃນປະເທດ ນັບຕັ້ງແຕ່ທີ່ເກີດເຫດແຜ່ນດິນໄຫວແລະສຶນາມິເມື່ອປີ 2014 ທາງຕາເວັນອອກສຽງເໜືອຂອງຍີ່ປຸ່ນຈົນສົ່ງຜົນກະທົບຕໍ່ບ້ວງໂຊ້ອຸປະທານ.
ດ້ານອາອິຊິ ສະຕີລ ເປີດເຜີຍກ່ອນໜ້ານີ້ວ່າ ໂຮງງານຜະລິດເຫຼັກຂອງທາງບໍລິສັດ ຊຶ່ງຕັ້ງຢູ່ເມືອງໂຕຄາອິ ແຂວງອາອິຊິ ຈະເລີ່ມກັບມາທຳການຜະລິດໃນວັນທີ 29 ມີນາ.