ສຳນັກຂ່າວຕ່າງປະເທດ ລາຍງານໃນວັນທີ 12 ກຸມພານນີ້ວ່າ ຄວາມຄືບໜ້າຂອງການຄົ້ນຫາຮ່າງຜູ້ເສຍຊີວິດ ຈາກເຫດແຜ່ນດິນໄຫວ ຢູ່ເກາະໄຕ້ຫວັນ ເມື່ອວັນເສົາທີ 6 ກຸມພາຜ່ານມາ ຫລ້າສຸດເພີ່ມຂຶ້ນເປັນ 94 ຄົນແລ້ວ ໃນຂະນະທີ່ເຈົ້າໜ້າທີ່ກູ້ໄພ ຍັງມີຄວາມພະຍາຍາມ ທີ່ຈະຄົ້ນຫາຮ່າງຜູ້ປະສົບໄພຢ່າງຕໍ່ເນື່ອງ ໂດຍຍັງຄົງມີຍອດຜູ້ສູນຫາຍຢູ່ອີກ ປະມານ 30 ຄົນ ຊຶ່ງຄາດວ່າຈະພົບຜູ້ລອດຊີວິດນັ້ນ ແມ່ນເປັນໄປໄດ້ຍາກ.

ແຫລ່ງຂ່າວຍັງລາຍງານອີກວ່າ ໃນມື້ວານນີ້ (11 ກຸມພາ) ເຈົ້າໜ້າທີ່ຕຳຫລວດໄຕ້ຫວັນ ໄດ້ເຂົ້າຄວບຄຸມຕົວ ຜູ້ບໍລິຫານບໍລິສັດຮັບເໝົາກໍ່ສ້າງ ທີ່ຮັບເໝົາກໍ່ສ້າງຕຶກ ເຫວີຍກ່ວນຈຶນຫລົງ ຫລື ໂກລເດັ້ນ ດຣາກ້ອນ ຊຶ່ງເປັນຕຶກທີ່ໄດ້ຮັບຄວາມເສຍຫາຍຫລາຍທີ່ສຸດ ໃນເຫດການແຜ່ນດິນໄຫວຄັ້ງນີ້ແລ້ວ ພ້ອມຕັ້ງຂໍ້ຫາປະໝາດເລິ່ນເລີ້ ໃນການວາງໂຄງສ້າງຂອງຕຶກ ບໍ່ຖືກຕ້ອງຕາມແບບມາດຖານ.