ຂປລ. ຜູ້ທີ່ເຄີຍສັນຈອນໄປມາຕາມເສັ້ນທາງແຕ່ 4 ແຍກບ້ານຕານມີໄຊ ຫາ 3 ແຍກບ້ານໜອງບຶກ ຈະຮູ້ດີວ່າເສັ້ນທາງດັ່ງກ່າວມີການເປ່ເພຫລາຍຈຸດ ແລະ ມີຂີ້ຝຸ່ນໄງ່ຕະຫລອດວັນ, ໜັກທີ່ສຸດແມ່ນໃນໂມງຮີບດ່ວນ ເນື່ອງຈາກເສັ້ນ ທາງດັ່ງກ່າວ ມີຍານພາຫະນະສັນຈອນເປັນຈຳນວນຫລວງຫລາຍ ເຊິ່ງໄດ້ສ້າງຄວາມຍຸ້ງຍາກໃຫ້ແກ່ຜູ້ສັນຈອນໄປມາ ແລະ ປະຊາຊົນທີ່ອາໄສຢູ່ຕາມສອງຝາກທາງ. ຕໍ່ກັບບັນຫາດັ່ງກ່າວ ຜູ້ສັນຈອນໄປມາ ແລະ ປະຊາຊົນທີ່ອາໄສຢູ່ຕາມແຄມທາງກໍໄດ້ຝາກເຖິງ ພາກສ່ວນກ່ຽວຂ້ອງຊ່ວຍແກ້ໄຂຢ່າງຮີບດ່ວນ ຫລື ມີມາດຕະການຫລຸດຜ່ອນມົນລະພິດ ເພື່ອຊ່ວຍໃຫ້ ການສັນຈອນມີຄວາມສະດວກສະບາຍ ທັງເຮັດໃຫ້ການດຳລົງຊີວິດຂອງປະຊາຊົນດີຂຶ້ນ.
ປະຊາຊົນທີ່ອາໄສຢູ່ສອງຝາກທາງ ໃຫ້ຮູ້ວ່າ: ເສັ້ນທາງດັ່ງກ່າວ ເປ່ເພເປັນເວລາຫລາຍເດືອນແລ້ວ, ເຄີຍເຫັນພະ ນັກງານວິຊາການມາສຳຫລວດຫລາຍເທື່ອ ແລະ ເຄີຍມີການສ້ອມແປງແກ້ໄຂ ໂດຍການເກດໜ້າທາງບໍລິເວັນທີ່ເປັນຂຸມ ຈຶ່ງເຮັດໃຫ້ທາງເສັ້ນນີ້ມີຂີ້ຝຸ່ນໄງ່ຫລາຍໃນເວລາແດດອອກ ແຕ່ເວລາຝົນຕົກຊ້ຳພັດເປັນຕົມ. ພ້ອມນີ້, ປະຊາຊົນຍັງໃຫ້ຮູ້ຕື່ມວ່າ: ສາເຫດທີ່ເຮັດໃຫ້ເສັ້ນທາງດັ່ງກ່າວເປ່ເພ ອາດເນື່ອງມາຈາກມີລົດສັນຈອນເປັນຈຳນວນຫລາຍທັງກາງເວັນ ແລະ ຄືນ ໂດຍສະເພາະແມ່ນລົດບັນທຸກໜັກ.
ແຫລ່ງຂ່າວ:
