ໂຄງການກໍ່ສ້າງຂົວຂ້າມນ້ຳຂອງປາກແບງຫາ ເມືອງເງິນມາປະຈຸບັນໜ້າວຽກຕົວຈິງຂອງໂຄງການປະຕິບັດໄດ້ແລ້ວ 98,53%,ຂະນະນີ້ບໍລິສັດຮັບເໝົາກໍ່ສ້າງພວມສຸມໃສ່ໜ້າວຽກທີ່ຍັງຄ້າງຄາເປັນຕົ້ນວຽກໜ້າຂົວ ເພື່ອກະກຽມການເປີດນຳໃຊ້ຄາດວ່າໃນທ້າຍເດືອນກຸມພານີ້.
ທ່ານ ລີຢີ້ງ ໄຊເຍ່ຍຊ່າງ ຮອງຫົວໜ້າໂຄງການໄດ້ລາຍງານໃຫ້ຮູ້ວ່າ: ໂຄງການກໍ່ສ້າງຂົວຂ້າມນ້ຳຂອງລະຫວ່າງເມືອງປາກແບງ ແຂວງອຸດົມໄຊ ຫາເມືອງເງິນ ແຂວງໄຊຍະບູລີທີ່ໄດ້ ເລີ່ມລົງມືປະຕິບັດມາແຕ່ທ້າຍປີ 2012 ຊຶ່ງປະກອບມີຄວາມຍາວທັງໝົດ 379 ແມັດ ແລະກວ້າງ 13 ແມັດ, ສ່ວນລວງຍາວຂອງທາງເຂົ້າຂົວທັງສອງເບື້ອງ 321 ແມັດ, ມີເສົາທັງໝົດ 8 ເສົາ, ມີ 7 ຊ່ວງ, ຊ່ວງຍາວສຸດຂອງຂົວແມ່ນ 120 ແມັດ ແລະຊ່ວງສັ້ນສຸດ 30 ແມັດ, ຫ່າງຈາກໜ້ານ້ຳ 12,39 ແມັດ ຊຶ່ງລວມມູນຄ່າການກໍ່ສ້າງທັງໝົດແມ່ນ 30,89 ລ້ານໂດລາ, ມາຮອດດຽວນີ້ສຳເລັດແລ້ວ 98,53%, ໃນນີ້ວຽກທີ່ສຳເລັດ 100% ມີໂຄງສ້າງພາກສ່ວນລຸ່ມຂອງຂົວ, ການກໍ່ສ້າງເສົາ, ການເທເບຕົງທາງຄົນຍ່າງ ແລະວຽກດິນກັນເຈື່ອນໄດ້ຈຳນວນໜຶ່ງ.
ຢ່າງໃດກໍຕາມ ປະຈຸບັນທາງເຈົ້າຂອງໂຄງການ ແລະບໍລິສັດຜູ້ຮັບເໝົາກຳລັງເລັ່ງໃສ່ປະຕິບັດວຽກໜ້າຂົວໃຫ້ສຳ ເລັດຊ້າສຸດບໍ່ໃຫ້ເກີນວັນທີ 10 ກຸມພານີ້ ແລະອີງໃສ່ແຜນການໃນການຈັດຕັ້ງປະຕິບັດແມ່ນຈະສູ້ຊົນໃຫ້ສຳເລັດໃນທ້າຍເດືອນນີ້ພ້ອມກຽມເປີດນຳໃຊ້ຢ່າງເປັນທາງການ.
ທ່ານຮອງຫົວໜ້າໂຄງການຍັງໃຫ້ຮູ້ຕື່ມວ່າ: ໂຄງການກໍ່ສ້າງຂົວຂ້າມນ້ຳຂອງປາກແບງ ເມືອງເງິນເປັນໜຶ່ງໃນຄວາມ ຫວັງຂອງປະຊາຊົນທັງສອງແຂວງທີ່ຢາກມີເສັ້ນທາງຄົມມະນາຄົມສະດວກສະບາຍ ແລະກໍເປັນນະໂຍບາຍໜຶ່ງຂອງລັດທີ່ສຸມໃສ່ການພັດທະນາພື້ນຖານໂຄງລ່າງໃຫ້ນັບມື້ມີການພັດທະນາເປັນກ້າວໆໃນໄລຍະໃໝ່, ສະນັ້ນໂຄງການດັ່ງກ່າວຈິ່ງເປັນຂົວຕໍ່ເຊື່ອມລະຫວ່າງແຂວງອຸດົມໄຊຫາແຂວງໄຊຍະບູລີ ແລະພາຍຫຼັງກໍ່ສ້າງສຳເລັດກໍຈະ ກາຍເປັນຈຸດເຊື່ອມໂຍງທາງດ້ານເສດຖະກິດລະຫວ່າງແຂວງພາກເໜືອຕົ້ນຕໍແມ່ນແຂວງອຸດົມໄຊ ແລະໄຊຍະບູລີ ອອກສູ່ຊາຍແດນປະເທດໄທ ຊຶ່ງຈະເຮັດໃຫ້ການຄ້າລະຫວ່າງສອງປະເທດນັບມື້ມີການຮັດກຸມຫຼາຍຂຶ້ນ.
ທີ່ມາ: