ນັກລົງທຶນທັງພາຍໃນ ແລະ ຕ່າງປະເທດຫຼາຍກວ່າ 70 ບໍລິສັດພາກັນຍາດຊີງປະມູນທີ່ດິນອ້ອມຮອບສະຖານີລົດໄຟຍ່າງກຸ້ງ 160 ໄຣ່ ເພື່ອນຳໄປພັດທະນາເປັນອາຄານ, ສຳນັກງານ, ຄອນໂດມິນຽມ, ໂຮງແຮມ ແລະ ສູນການຄ້າ.
ໜັງສືພິມອອນລາຍມຽນມາ ອີເລຟເວັນລະບຸວ່າ ຂະນະນີ້ຄະນະກຳມະການກາງຄັດເລືອກຜູ້ເຂົ້າສຳປະທານທີ່ດິນອ້ອມຮອບສະຖານີລົດໄຟກາງນະຄອນຢ່າງກຸ້ງຂອງມຽນມາ ໂດຍຈະມີການປະກາດລາຍຊື່ພາຍໃນເດືອນນີ້ ໂດຍມີນັກລົງທຶນທັງພາຍໃນ ແລະ ຕ່າງປະເທດສະເໜີລາຍຊື່ເຖິງ 70 ລາຍ. ຊຶ່ງຈະມີການປະມູນທີ່ດິນໃນພື້ນທີ່ລວມ 160 ໄຣ່ ໂດຍກຳນົດໃຫ້ສ້າງເປັນອາຄານ, ສຳນັກງານ, ໂຮງແຮມ ແລະ ພື້ນທີ່ເພື່ອການຄ້າ, ຊຶ່ງທີ່ດິນດັ່ງກ່າວມີການປະມູນໄປແລ້ວເທື່ອໜຶ່ງໃນຕົ້ນປີ 2015 ແຕ່ຕ້ອງຍົກເລີກການປະມູນ ແລະ ເປີດການປະມູນອີກເທື່ອໜຶ່ງໃນເດືອນສິງຫາປີທີ່ຜ່ານມາ.
ຜູ້ເຂົ້າຮ່ວມການປະມູນໃນຮອບທຳອິດເປັນບໍລິສັດຕ່າງປະເທດ ແລະ ທ້ອງຖິ່ນລວມ 34 ບໍລິສັດ ໂດຍບໍລິສັດຕ່າງປະເທດມາຈາກມາເລເຊຍ, ສ ເກົາຫຼີ, ໄຕ້ຫວັນ, ສປ ຈີນ, ສິງກະໂປ, ສສ ຫວຽດນາມ ແລະ ການາດາ ໂດຍຄາດວ່າ ບໍລິສັດເຫຼົ່ານີ້ຈະເຂົ້າຮ່ວມການປະມູນໃນຮອບທີ 2 ອີກດ້ວຍ.