ສຳນັກຂ່າວຕ່າງປະເທດ ລາຍງານໃນວັນທີ 11 ກຸມພານີ້ວ່າ ອົງການ​ສາທາລະນະ​ສຸກ​ແຫ່ງ​ລັດ​ຂອງອັງກິດ (PHE) ​​ໄດ້ອອກມາລະບຸວ່າ ທາງການກວດພົບຜູ້ຕິດເຊື້ອ ຢ່າງ​ໜ້ອຍ​ສຸດ​ມີ 4 ກໍລະນີ​ ທີ່ຕິດ​ໄວຣັສຊິກ້າ (Zika) ຢູ່​ປະ​ເທດ​ອັງກິດ ​ນັບ​ແຕ່​ເດືອນມັງກອນເປັນຕົ້ນມາ ​ແລະ ຕົວ​ເລກ​ດັ່ງກ່າວ​ ອາດ​ຈະ​ສືບ​ຕໍ່​ເພີ່ມ​ຂຶ້ນ ​ເມື່ອ​ປະຊາຊົນ​ຊາວອັງກິດ ເດີນທາງໄປ​ທ່ອງ​ທ່ຽວ​ ຢູ່​ບັນດາ​ເຂດ​ທີ່ເກີດ​ການ​ລະບາດ ໃນທະວີບອາ​ເມ​ຣິ​ກາລາ​ຕິນ ແລະ ກັບຄືນ​ເມືອ​ປະ​ເທດ.

​ແນວໃດ​ກໍ​ຕາມ ທ່ານ​ ນາງ ດິນລີ ມໍແກນ ສະມາຊິກ​ຂອງ PHE ​ໄດ້​ເວົ້າ​ວ່າ ການ​ແຜ່​ລະບາດ​​​ຂອງໄວຣັສຊິກ້າ ຈະສາມາດເກີດຂຶ້ນ​ຢູ່ອັງກິດ ​ແມ່​ນເປັນໄປໄດ້ໜ້ອຍທີ່​ສຸດ ຍ້ອນ​ໄວຣັສຊິກ້າ ​ແຜ່​ລະບາດໂດຍ​​ຍຸງ Aedes ເປັນພາຫະນະ ​ຊຶ່ງຍຸງ​ປະ​ເພດ​ນີ້ ສາມາດ​ຄົງ​ຕົວ​ຢູ່​ເຂດ​ຮ້ອນ​ເທົ່າ​ນັ້ນ.