ຂປລ. ບໍລິສັດ​ເບຍ​ລາວ ​ຈຳກັດ ​ຈະ​ຊື້​ເຂົ້າຈ້າວຈຳນວນ 26.000 ​ໂຕນ ມູນ​ຄ່າ​ລວມທັງໝົດ 103 ຕື້​ກວ່າ​ກີ​ບ ​ໃນ​ສົກ​ປີ 2016-2017 ຈາກ​ຜູ້​ສະໜອງ​ເຂົ້າ 9 ບໍລິສັດ ​ເພື່ອ​ສືບ​ຕໍ່​ສົ່ງ​ເສີມ​ການ​ນຳ​ໃຊ້​ວັດຖຸ​ດິບ ​ທີ່​ມີ​ຢູ່​ພາຍ​ໃນ​ປະ​ເທດ ຊຸກຍູ້​​ໃຫ້​ຊາວນາ​ຮັບ​ຮູ້ການ​ຜະລິດ​ເຂົ້າ​ເປັນ​ສິນຄ້າ ມີ​ລາຍ​ຮັບ​ເພີ່ມ​ຂຶ້ນ ​ແລະ ຍືນ​ຍົງ​, ຍ້ອນ​ວ່າປະມານ 75% ຂອງ​ປະ ຊາຊົນ​ລາວ ​ແມ່ນ​ຖື​ອາຊີບ​ຊາວນາ ​ແລະ ກະສິກຳ​ເປັນ​ສ່ວນ​ໃຫຍ່ ​ເຊິ່ງກວມ​ເອົາ 25% ຂອງ​ການ​ປະກອບສ່ວນ​ເຂົ້າ​ໃນGDP.

ພິທີ​ເຊັນ​ສັນຍາ​ຊື້​ເຂົ້າດັ່ງກ່າວ, ​ໄດ້​ມີ​ຂຶ້ນ​ໃນ​ວັນ​ທີ 10 ກຸມພານີ້ ຢູ່​ນະຄອນຫລວງ​ວຽງ​ຈັນ ລະຫວ່າງ​ ທ່ານ ສູນ​ທອນ ພົມມະ​ຈັກ ຮອງ​ຜູ້ອຳນວຍການ​ໃຫຍ່ ​ບໍລິສັດ​ເບຍ​ລາວ ຈຳກັດ ​ແລະ ຜູ້ຕາງ​ໜ້າໃຫ້​ຜູ້​ສະໜອງ​ເຂົ້າ 9 ບໍລິສັດ ອັນ​ປະກອບ​ມີ ​ວິ​ສາ​ຫະກິດ​ສ່ວນ​ບຸກຄົນ​ໂຮງສີ​ເຂົ້າ​ນາງ​ ຈັນ​ເພງ,  ​ໂຮງສີ​ເຂົ້ານາງ​ ຫລຽນ​ຄຳ, ​ໂຮງສີ​ເຂົ້າ​ໂຊກ​ໄຊ, ​ໂຮງສີ​ເຂົ້າໜອງ​ທອງ, ກຸ່ມ​ໂຮງສີ​ເຂົ້າຄຳ​ມ່ວນ​ພັດທະນາ, ບໍລິສັດ​ພັນ​ເພັດ​ ພັດທະນາ​ກະສິກຳ ຈຳກັດ, ບໍລິສັດ​ລາວ​ກະ​ເສດ 2000 ຈຳກັດ, ບໍລິສັດ ທີ​ເອັນ​ຈີ ສົ່ງ​ເສີມ​ຂາ​ອອກ–ຂາ​ເຂົ້າຈຳກັດ ​ແລະ ບໍລິສັດ​ພັດທະນາ​ດູ​ອີດ ກະສິກຳ​ ຈຳກັດ ​ໂດຍ​ມີ ທ່ານ ຮສຈ.ດຣ ລິນ​ຄຳ ດວງ​ສະຫວັນ ຫົວໜ້າ​ພະ​ແນ​ກກະສິກຳ-​ປ່າ​ໄມ້ ​ແລະ ບັນດາ​ພາກສ່ວນ​ທີ່​ກ່ຽວຂ້ອງ​ເຂົ້່າຮ່ວມ.

ແຫລ່ງຂ່າວ: