ຂປລ. ກະຊວງແຮງງານ ແລະ ສະຫວັດດີການສັງຄົມ ເຊີນຊວນ ອົງການຈັດຕັ້ງທຸກພາກສ່ວນ ທັງພາກລັດ, ເອກະຊົນ, ອົງການຈັດຕັ້ງສາກົນ, ອົງການຈັດຕັ້ງສັງຄົມ, ຫ້າງຮ້ານ ແລະ ບຸກຄົນຕ່າງໆ ເຂົ້າຮ່ວມບໍລິຈາກຕ້ານໄພໜາວ ເນື່ອງຈາກສະພາບພູມີອາກາດໜາວເຢັນ ໄດ້ປົກຄຸ້ມໃນຫລາຍພື້ນທີ່ ໃນເຂດພາກເໜືອ ແລະ ບາງສ່ວນພາກໃຕ້ ຂອງສປປ ລາວ ໄດ້ສົ່ງຜົນ ກະທົບຢ່າງຫລວງຫລາຍ ແລະ ຮຸນແຮງຕໍ່ການດຳລົງຊີວິດປະຊາຊົນ ໂດຍສະເພາະແມ່ນບັນດາແຂວງພາກເໜືອ ໄດ້ປະສົບກັບອາກາດໜາວ ທີ່ບໍ່ເຄີຍມີມາກອນ.
ດັ່ງນັ້ນ, ກະຊວງແຮງງານ ແລະ ສະຫວັດດີການສັງຄົມ ຂໍຖືເປັນກຽດ ແຈ້ງເຊີນຊວນ ເພື່ອຂໍນ້ຳໃຈຈາກທຸກພາກສ່ວນ ໄດ້ຮ່ວມແບ່ງເບົາ ແລະ ໃຫ້ຄວາມຊ່ວຍເຫລືອ ແກ່ຜູ້ປະສົບໄພໜາວ ດ້ວຍການປະກອບສ່ວນບໍລິຈາກ ເຊັ່ນ: ເຄື່ອງນຸ່ງຫົມ, ເຄື່ອງອຸປະໂພກ-ບໍລິໂພກ ຫລື ເປັນເງິນ, ເພື່ອຈະໄດ້ນຳໄປມອບຕໍ່ໃຫ້ປະຊາຊົນ ຜູ້ທີ່ໄດ້ຮັບຜົນກະທົບຈາກໄພໜາວ ຢູ່ບັນດາແຂວງພາກເໜືອ ແລະ ບາງແຂວງພາກໃຕ້.
ທ່ານສາມາດ ຕິດຕໍ່ພົວພັນໄດ້ທີ່ຫ້ອງການ ກະຊວງແຮງງານ ແລະ ສະຫວັດດີການສັງຄົມ ໄດ້ທຸກເວລາ ຫລື ເບີໂທ 021 213 005, 213003