ສຳນັກຂ່າວຕ່າງປະເທດ ລາຍງານໃນວັນທີ 4 ກຸມພາຜ່ານມານີ້ວ່າ ຜູ້ນຳ ແລະ ຜູ້ແທນລັດຖະບານຈາກ 70 ປະເທດທົ່ວໂລກ ໄດ້ປະຊຸມຮ່ວມກັນທີ່ ນະຄອນຫລວງລອນດອນ ປະເທດອັງກິດ ເພື່ອຫາລືແຜນການຊ່ວຍເຫລືອ ດ້ານເສດຖະກິດ ແລະ ການສຶກສາ ແກ່ຜູ້ປະສົບເຄາະຮ້າຍ ຈາກໄພສົງຄາມກາງເມືອງຢູ່ຊີຣີ ທີ່ມີກ່ວາ 4.6 ລ້ານຄົນ ເຂົ້າໄປລີ້ໄພຢູ່ຕາມປະເທດໃກ້ຄຽງ ໂດຍກອງປະຊຸມຕັ້ງເປົ້າ ຈະລະດົມເງິນຊ່ວຍເຫລືອໃຫ້ໄດ້ເຖິງ 9 ຕື້ໂດລາ ຕາມເປົ້າໝາຍທີ່ອົງການສະຫະປະຊາຊາດວາງໄວ້ ໃນນີ້ລັດຖະບານອັງກິດ ໄດ້ປະກາດຈະໃຫ້ເງິນຊ່ວຍເຫລືອແລ້ວ 1.74 ຕື້ໂດລາ.

ກອງປະຊຸມດັ່ງກ່າວນີ້ ມີຂຶ້ນໃນລະຫວ່າງການເຈລະຈາສັນຕິພາບຊີຣີ ຢູ່ເຊີແນວ ປະເທດສະວິດ ຊຶ່ງຢຸດສະງັກ ແລະ ບໍ່ມີຄວາມຄືບໜ້າໃດໆ ໂດຍຈະມີການຈັດປະຊຸມຄືນໃໝ່ ໃນວັນທີ 25 ກຸມພາຈະມາເຖິງນີ້.