ສຳນັກຂ່າວຕ່າງປະເທດ ລາຍງານໃນວັນທີ 5 ກຸມພານີ້ວ່າ ໃນມື້ວານນີ້ (4 ກຸມພາ) ທ່ານ ຈອນ ເຄຣີ ລັດຖະມົນຕີວ່າການ ກະຊວງການຕ່າງປະເທດ ສະຫະລັດອາເມຣິກາ ແລະ ຄູ່ຕຳແໜ່ງ ທ່ານ ເຊີເກ ລາບຣອບ ລັດຖະມົນຕີວ່າການ ກະຊວງການຕ່າງປະເທດຣັດເຊຍ ໄດ້ປະຊຸມກັນຜ່ານທາງໂທລະສັບ ໂດຍໄດ້ເຫັນດີເປັນເອກະພາບ ປຶກສາຫາລືລະອຽດ ກ່ຽວກັບການປະຕິບັດຄຳສັ່ງຢຸດຍິງຢູ່ຊີຣີ ໂດຍທ່ານ ຈອນ ເຄຣີ ໄດ້ໃຫ້ສຳພາດແກ່ນັກຂ່າວວ່າ ” ຂ້າພະເຈົ້າມີການປຶກສາຫາລື ກັບທ່ານລັດຖະມົນຕີວ່າການ ກະຊວງການຕ່າງປະເທດ ຣັດເຊຍໃນຕອນເຊົ້າມື້ນີ້ ແລະ ສອງຝ່າຍໄດ້ເຫັນດີເປັນເອກະພາບ ຕ້ອງປຶກສາຫາລືກ່ຽວກັບ ວິທີປະຕິບັດຂໍ້ຕົກລົງຢຸດຍິງ ກໍຄືວິທີສຳພັດມະນຸດສະທຳຂອງທັງສອງຝ່າຍ ”
ໃນວັນດຽວກັນ ທ່ານລັດຖະມົນຕີວ່າການ ກະຊວງການຕ່າງປະເທດຣັດເຊຍ ໄດ້ລະບຸວ່າ ການໂອ້ລົມທາງໂທລະສັບ ລັດຖະມົນຕີສອງທ່ານ ກໍຢັ້ງຢືນຈະພະຍາຍາມຢ່າງສຸດຂີດ ເພື່ອຮັບປະກັນການເຈລະຈາສັນຕິພາບຊີຣີ ໃຫ້ຖືກດຳເນີນໄປຢ່າງສະດວກ.