ເອີຣົບ ພົບຍິງມີລູກຕິດເຊື້ອໂລກໄວຣັສຊິກາຄົນທໍາອິດ ເປັນຍິງຊາວແອັດສະປາຍກໍາລັງເດີນທາງກັບຈາກປະເທດແຖວອາເມລິກາໃຕ້ບໍ່ດົນມານີ້ ຂະນະທີ່ ອົງການອະນາໄມໂລກແນະນໍາໜ່ວຍງານສາທາລະນະສຸກທົ່ວໂລກ ຄວນງົດຮັບບໍລິຈາກເລືອດຈາກຜູ້ທີ່ເດີນທາງໄປລາຕີນອາເມລິກາ ຫຼືແຄຣິບບຽນ ຫຼັງຈາກເຫັນວ່າໄວຣັສຊິກາສາມາດຕິດທາງການຖ່າຍເລືອດ.

ມື້ວັນທີ 5 ກຸມພາ ສໍານັກງານຂ່າວຕ່າງປະເທດລາຍງານ ກະຊວງສາທາລະນະສຸກ ຢືນຢັນພົບຍິງຖືພາຊາວແອັດສະປາຍຕິດເຊື້ອໄວຣັສຊິກາເປັນຄົນທໍາອິດແລ້ວ ຫຼັງຫາກໍ່ເດີນທາງກັບຈາກປະເທດໂຄລົມບີເມື່ອໄວໆນີ້ ອີກທັງຍັງນັບເປັນແມ່ຍິງມີລູກທີ່ຕິດເຊື້ອໄວຣັສຊິກາຄົນທໍາອິດໃນທະວີບຍູໂລບດ້ວຍ ຂະນະທີ່ອັນຕະລາຍຮ້າຍແຮງຈາກເຊື້ອໄວຣັສຊິກາທີ່ກໍາລັງສ້າງຄວາມວິຕົກກັງວົນຢ່າງໃຫຍ່ ພົບອັດຕາເດັກນ້ອຍໃນບຣາຊິນທີ່ແມ່ຕິດເຊື້ອໄວຣັສຊິກາລະຫວ່າງຖືພາ ເກີດມາມີຫົວນ້ອຍເພີ່ມສູງຂຶ້ນຫຼາຍ

ກະຊວງສາທາລະນະສຸກແອັດສະປາຍ ຖະແຫຼ່ງວ່າ ແມ່ຍິງຖືພາທີ່ຕິດເຊື້ອຊິກາຜູ້ນີ້ ບໍ່ມີການເປີດເຜີຍຊື່-ນາມສະກຸນຢູ່ທີ່ແຄວ້ນຄາຕາໂລເນຍ ທາງພາກຕາເວັນອກຫສຽງເໜືອຂອງແອັດສະປາຍ ແລະນັບເປັນຊາວແອັດສະປາຍໜຶ່ງໃນ 7 ຄົນ ທີ່ໄດ້ຮັບການກວດວິນິດໄສ ແລະຢືນຢັນວ່າຕິດເຊື້ອໄວຣັສຊິກາ ໂດຍຂະນະນີ້ມີຜູ້ຕິດເຊື້ອໄວຣັສຊິກາຫຼາຍກວ່າ 2 ຄົນຢູ່ໃນແຄວ້ນຄາຕາໂລເນຍ ແລະ 1 ຄົນ ຢູ່ທີ່ນະຄອນຫຼວງມາດຣິດ ແນວໃດກໍ່ຕາມ ຜູ້ຕິດເຊື້ອໄວຣັສຊິກາທັງ 7 ຄົນໃນແອັດສະປາຍຍັງແຂງແຮງດີ

ຂະນະດຽວກັນ ເມື່ອວັນທີ 4 ກຸມພາທີ່ຜ່ານມາ ອັງການອະນາໄມໂລກ (WHO) ໄດ້ແນະນໍາໃຫ້ໜ່ວຍງານສາທາລະນະສຸກໃນປະເທດຕ່າງໆ ບໍ່ຄວນຮັບບໍລິຈາກເລືອດປະຊາຊົົນທີ່ເດີນທາງໄປປະເທດທີ່ມີການລະບາດຂອງໄວຣັສຊິກາ ບໍ່ວ່າຈະເປັນພູມິພາກລາຕິນອາເມລິກາ ຫຼືແຖບແຄຣິບບຽນ ຫຼັງຈາກໜ່ວຍງານສາທາລະນະສຸກໃນປະເທດບຣາຊິນ ຊຶ່ງເກີດການລະບາດຂອງເຊື້ອໄວຣັສຊິກາແບບຮຸ່ນແຮງ ຢືນຢັນພົບການຕິດໄວຣັສຊິກາທີ່ຜ່ານການຖ່າຍເລືອດນຳ ຫຼັງຈາກກ່ອນໜ້ານີ້ ເຊື້ອໄວຣັສຊິກາມີການແພ່ລະບາດ ໂດຍຍຸງລາຍເປັນພາຫະ ແລະທີ່ສະຫະລັດ ພັບມີການຕິດເຊື້ອໄວຣັສຊິກາຜ່ານການມີເພດສໍາພັນແລ້ວ 1 ລາຍ.