ຂປລ. ໃນວັນທີ 4 ກຸມພານີ້, ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບ ຂອງທ່ານ ເລ ເລື່ອງມິນ ເລຂາທິການໃຫຍ່ອາຊຽນ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ສປປ ລາວ ໃນວັນທີ 4-5 ກຸມພານີ້.
ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງ ຕໍ່ການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຂອງທ່ານ ເລ ເລື່ອງມິນ ແລະ ຄະນະ ໃນຄັ້ງນີ້, ພ້ອມທັງໄດ້ສະແດງຄວາມຂອບໃຈ ຕໍ່ການຊ່ວຍເຫລືອຢ່າງຕໍ່ເນື່ອງຂອງກອງເລຂາອາຊຽນ ຕໍ່ບັນດາປະເທດສະມາຊິກອາຊຽນ ທາງດ້ານເນື້ອໃນ ແລະ ການປະສານງານ ລະຫວ່າງ ອົງກອນ ຫລື ກົນໄກຕ່າງໆຂອງອາຊຽນ ລວມທັງການສະໜັບສະໜູນຊ່ວຍເຫລືອ ສປປ ລາວ ໃນການເປັນປະທານອາຊຽນ ຄັ້ງທໍາອິດໃນປີ 2004-2005.
ທ່ານ ເລ ເລື່ອງມິນ ໄດ້ສະແດງຄວາມຂອບໃຈ ຕໍ່ທ່ານ ທອງລຸນ ສີສຸລິດ ທີ່ໄດ້ໃຫ້ກຽດສະຫລະເວລາ ຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງສະແດງຄວາມຊົມເຊີຍ ຕໍ່ການຮັບກຽດເປັນປະທານອາຊຽນ ຂອງສປປ ລາວ ຄັ້ງທີສອງ ເຊິ່ງເປັນປີທີ່ມີຄວາມໝາຍຄວາມສຳຄັນສຳລັບອາຊຽນ ແລະ ຢືນຢັນວ່າ ກອງເລຂາອາຊຽນ ພ້ອມໃຫ້ການສະໜັບສະໜູນ ແລະ ຊ່ວຍເຫລືອ ໃນການເປັນປະທານອາຊຽນຂອງ ສປປ ລາວ ເພື່ອຜົນສຳເລັດອັນໃຫຍ່ຫລວງກວ່າເກົ່າຂອງອາຊຽນ ໃນປີ 2016 ແລະ ໃນຊຸມປີຕໍ່ໜ້າ.
ແຫລ່ງຂ່າວ:
