ອິນໂດເນເຊຍ ຢືນຢັນເປັນທາງການໃນວັນພຸດທີ່ຜ່ານມາວ່າ ເຄີຍພົບຜູ້ຕິດເຊື້ອໄວຣັສຊິກາຢ້ອນກັບໄປຫາປີກ່ອນ ໂດຍທີ່ຊາຍຜູ້ນີ້ບໍ່ເຄີຍເດີນທາງໄປຕ່າງແດນ ແຕ່ລະບຸວ່າ ໄດ້ກຽມພ້ອມຮັບກັບມືການແພ່ລະບາດຂອງໂລກຕິດຕໍ່ນີ້ທີ່ສ້າງຄວາມວິຕົກກັງວົນໄປທົ່ວທະວີບອາເມລິກາໄວ້ແລ້ວ.
ເຈົ້າໜ້າທີ່ລັດຖະບານຢືນຢັນວ່າ ເຫັນຜູ້ຕິດເຊື້ອໄວຣັສຊິກາ ທີ່ມີຍຸງເປັນພາຫະພຽງຄົນດຽວໃນແຂວງຈໍາບິ ເທິງເກາະສຸມາດຕາ ທັງນີ້ມັນຖືກພົບໂດຍບັນດານັກວິໄຈທີ່ກໍາລັງເກັບລວບລວມຕົວຢ່າງລະຫວ່າງການແພ່ລະບາດຂອງໄຂ້ເລືອດອອກຊ່ວງເດືອນທັນວາ ປີ 2014 ຮອດເດືອນເມາ 2015.
ປວນ ມາຮາລານີ ບອກກັບຜູ້ສືຂ່າວຫຼັງຮ່ວມປະຊຸມລະດັບສູງຕາມຄໍາສັ່ງຂອງປະທານນາທິບໍດີໂຈໂຄ ວິໂດໂດ ເພື່ອຫາລືກ່ຽວກັບໄວຣັສຊະນິດນີ້ວ່າ “ ເຮົາພົບຜູ້ຕິດເຊື້ອໃນຈໍາບິ ແຕ່ທາງກະຊວງສາທາລະນະສຸກລະບຸວ່າ ມັນຢູ່ພາຍໃຕ້ການຄວບຄຸມແລ້ວ ”
ຊິກາ ຂະຫຍາຍຄວາມກັງວົນໃນຫຼາຍພື້ນທີ່ຂອງທະວີບອາເມລິກາ ດ້ວຍມັນຖືກສົງໄສວ່າເປັນຕົ້ນຕໍເຮັດໃຫ້ເດັກນ້ອຍເກີດມາມີພາວະຫົວນ້ອຍກວ່າປົກກະຕິ ແລະອາດເຮັດໃຫ້ສະໝອງເສຍຫາຍ ຂະນະທີ່ຜູ້ຕິດເຊື້ອໄວຣັສຊະນິດນີ້ຈະມີອາການຄ້າຍຄືໄຂ້ເລືອດອອກ.
ບັນດາຜູູ້ຊ່ຽວຊານດ້ານສາທາລະນະສຸກເຕື່ອນວ່າ ອາຊີເປັນພູມິພາກທີ່ອອ່ນແອທີ່ສຸດຕໍ່ໄວຣັສຊິກາ ເນື່ອງຈາກເປັນດິນແດນທີ່ຍຸງລາຍຕາມບ້ານເຮືອນ ຊຶ່ງເປັນພາຫະນໍາໂລກ ຈະເລີນເຕີບໂຕໄດ້ດີຕາມເມືອງແອອັດຕ່າງໆ
ເຈົ້າໜ້າທີ່ໃນອິນໂດເນເຊຍ ປະເທດເຂດຮ້ອນທີ່ມີປະຊາກອນ 250 ລ້ານຄົນ ແລະປະເຊິນກັບການແພ່ລະບາດຂອງໂລກຕ່າງໆ ທີ່ມີຍຸງເປັນພາຫະເປັນປົກກະຕິ ຮຽກຮ້ອງປະຊາຊົນຢູ່ໃນຄວາມສະຫງົບ ແລະລະມັດລະວັງ
“ປະຊາຊົນບໍ່ຄວນຕື່ນຕົກ ແລະຕ້ອງໜັ່ນທໍາຄວາມສະອາດພື້ນທີ່ໂດຍຮອບ, ລັດຖະບານຄາດຫວັງວ່າມັນຈະບໍ່ກາຍເປັນໂລກລະບາດໃນອິນໂດເນເຊຍ”, ມາຮາລານີເວົ້າ
ສະຖາບັນໄອມານ ທີ່ມີສໍານັກງານໃນຈາກາຕາ ເຜີຍໃນວັນທິດທີ່ 31 ທັນວາ ວ່າຊາຍອາຍຸ 27 ປີທີ່ເວົ້າວ່າຢູ່ໃນແຂວງຈໍາບິ ຕິດເຊື້ອໄວຣັສຊິກາ ເຮັດໃຫ້ສະຫຼຸບໄດ້ວ່າ ໄວຣັສຊິກາແພ່ກະຈ່າຍຢູ່ໃນອິນໂດເນເຊຍ ມາໄລຍະໜຶ່ງແລ້ວ
ອົງກອນອະນາໄມໂລກ ໃນວັນຈັນທີ່ 1 ກຸມພາ ປະກາດໃຫ້ໄວຣັສຊິກາ ຊຶ່ງມີຍຸງເປັນພາຫະເປັນສະຖານະການສຸກເສີນດ້ານສາທາລະນະສຸກລະຫວ່າງປະເທດ ຫຼັງຈາກກ່ອນໜ້ານັ້ນເຄີຍອອກມາເຕື່ອນວ່າໄວຣັສຊະນິດນີ້ກໍາລັງແພ່ລະບາດຢ່າງໄວວາໃນທະວີບອາເມລິກາ ດ້ວຍຄາດໜາຍວ່າຈະມີຜູ້ຕິດເຊື້ອສູງສຸດ 4 ລ້ານຄົນ.