ບໍລິສັດລັດວິສາຫະກິດໄຟຟ້າລາວ ສາຂາແຂວງຫຼວງພະບາງຈົກງົບ 6 ຕື້ກວ່າກີບເພື່ອປັບປຸງເຂື່ອນໄຟຟ້ານ້ຳດົງທີ່ຕັ້ງຢູ່ບ້ານຊາດ ເມືອງຫຼວງພະບາງ ແລະໄດ້ເລີ່ມລົງມືມາແຕ່ວັນທີ 17 ສິງຫາ 2015 ໜ້າວຽກໂດຍລວມມາຮອດປະຈຸບັນແມ່ນສຳເລັດ 90% ແລ້ວ, ຄາດຈະໃຫ້ສຳເລັດ ແລະແລ່ນເຄື່ອງຈັກພາຍໃນທ້າຍເດືອນກຸມພານີ້, ລວມມູນຄ່າການສ້ອມແປງຄັ້ງນີ້ມີ 6 ຕື້ກວ່າກີບ.
ທ່ານ ຟອງປະສິດ ເພັດສີສຸກ ຫົວໜ້າບໍລິສັດລັດວິສາຫະກິດໄຟຟ້າລາວ ສາຂາແຂວງຫຼວງພະບາງ ໄດ້ໃຫ້ສຳ ພາດຕໍ່ທີມຂ່າວເສດຖະກິດ-ສັງຄົມປະຈຳແຂວງໃນວັນທີ 2 ກຸມພານີ້ຮູ້ວ່າ: ຈຸດປະສົງໃນການປັບປຸງຄັ້ງໃຫຍ່ຄືນໃໝ່ ຂອງເຂື່ອນໄຟຟ້ານ້ຳດົງຄັ້ງນີ້ ຍ້ອນເຂື່ອນດັ່ງກ່າວໄດ້ຊຸດໂຊມເປເພຫຼາຍຕາມການເວລາພາຍຫຼັງທີ່ໄດ້ສ້າງມາ ແຕ່ໃນປີ 1970 ແລະສຳເລັດໃນປີ 1972 ປະກອບມີ 3 ເຄື່ອງຈັກ, ເພື່ອສະໜອງໄຟຟ້າຮັບໃຊ້ໃຫ້ແກ່ເຈົ້ານາຍລະບອບເກົ່າ ໂດຍສະເພາະແມ່ນຢູ່ພາຍໃນເມືອງຫຼວງພະບາງເທົ່ານັ້ນ, ມີຜູ້ໄດ້ຊົມໃຊ້ພຽງ 3 ພັນຄອບຄົວ ແລະນັບຈາກປະເທດລາວເຮົາໄດ້ຮັບການປົດປ່ອຍທາງແຂວງຈິ່ງໄດ້ມີການຂະຫຍາຍໄຟຟ້າໃຊ້ໃຫ້ປະຊາຊົນໄດ້ຊົມໃຊ້ເພີ່ມຂຶ້ນອີກຈິ່ງບໍ່ສາມາດສະໜອງໄຟຟ້າໄດ້ຢ່າງພຽງພໍ ຈິ່ງໄດ້ໃຊ້ຈັກນ້ຳມັນເພີ່ມຈົນມາຮອດປີ 1985 ການຊົມໃຊ້ໄຟຟ້າໄດ້ປ່ຽນກັນໃຊ້ແບບຄຸ້ມບ້ານ, ຫາກເປີດໃຫ້ບ້ານໜຶ່ງໃຊ້ແລ້ວອີກບ້ານໜຶ່ງຕອ້ງໄດ້ມອດເພາະກະແສໄຟຟ້າສະໜອງບໍ່ພຽງພໍ.
ຈາກສະພາບຄືດັ່ງກ່າວທາງໄຟຟ້າສາຂາຫຼວງພະບາງຈິ່ງໄດ້ສະເໜີຂໍງົບປະມານ 6 ຕື້ກວ່າກີບເພື່ອປັບປຸງໄໝ່ ຊຶ່ງໜ້າວຽກຕ້ອງປະຕິບັດມີຄື: ມ້າງ ຕູ້ຄອນໂທນຕ່າງໆພາຍໃນໂຮງຈັກ, ຮື້ຖອນສາຍເຄໂບອອກຈາກຮອງສາຍໄຟຕາມຕູ້ Control ຕ່າງໆ, ປ່ຽນທູບາຍຂອງຈັກເບີ 1 ອອກເພາະວ່າມີການກັດເຊາະຂອງນ້ຳ, ອະນາໄມ Generator ອົບຄືນໃໝ່ທັງ 3 ໜ່ວຍ, ຕິດຕັ້ງຕູ້ control CB 0,4 KV ຂອງຈັກທັງ 3 ເຄື່ອງ, ຕິດຕັ້ງ control CB 22 KV, ຕິດຕັ້ງຕູ້ ສະປີດ ໂກເວິນນໍຂອງຈັກທັງ 3 ເຄື່ອງ, ຕິດຕັ້ງຕູ້ໄຟ DCV power Supply, ຕິດຕັ້ງ ໝໍ້ໄຟ 60 ຫນ່ວຍ ພ້ອມເດີນສາຍເຄໂບເຂົ້າຫາຕູ້ control ຕ່າງໆພາຍໃນໂຮງ ຈັກ, ເຂົ້າຫາຕູ້ CB 22 KV, ຕູ້ Generator ທັງ 3 ໜ່ວຍ ແລະ ແບັດເຕີຣີ 60 ໜ່ວຍ.
ທ່ານຍັງກ່າວໃຫ້ຮູ້ຕື່ມວ່າ ນັບແຕ່ໄດ້ ເລີ່ມລົງມືແຕ່ ວັນທີ 17 ສິງຫາ 2015 ໜ້າວຽກໂດຍລວມມາຮອດປະຈຸບັນ ແມ່ນສຳເລັດ 90% ແລ້ວ, ຄາດຈະໃຫ້ສຳເລັດ ແລະແລ່ນເຄື່ອງຈັກພາຍໃນທ້າຍເດືອນກຸມພານີ້ ໂດຍກະແສໄຟຟ້າ ຂອງເຂື່ອນນ້ຳດົງຈະສົ່ງເຂົ້າສະຖານີໄຟຟ້າຢູ່ເມືອງຊຽງເງິນເພື່ອກະຈາຍກະແສໄຟຟ້າໃຫ້ບັນດາ 12 ເມືອງທົ່ວແຂວງ ໄດ້ມີໄຟຟ້າຊົມໃຊ້ 100% ລວມມູນຄ່າ ການສ້ອມແປງໃຫຍ່ຄັ້ງນີ້ສູງເຖິງ 6 ຕື້ກວ່າກີບ.
ທີ່ມາ: