ໂຄງການສ້າງສະໜາມບິນສາກົນໜອງຄ້າງເປັນສະໜາມບິນຂະໜາດກາງ, ເຊິ່ງຂ່າວເບື້ອງຕົ້ນບອກວ່າ ໄດ້ເລິ່ມລົງມືໃນເດືອນຕຸລາ 2013 ແລະຄາດໝາຍໃຫ້ສຳເັລດໃນເດືອນຕຸລາ 2015 ເພື່ອຕ້ອນຮັບການເຂົ້າເປັນປະຊາຄົມເສດຖະກິດອາຊຽນ ໂດຍບໍລິສັດ ຮວງແອງຢາລາຍ ຂອງຫວຽດນາມ ເປັນຜູ້ລົງທຶນກໍ່ສ້າງກ່ອນ ໃນຈຳນວນງົບປະມານ 592 ຕື້ກີບ ຫຼືປະມານ 74 ລ້ານໂດລາ ແລ້ວລັດຖະບານຈະຈ່າຍຄືນຕາມຫຼັງ.
ແນວໃດກໍຕາມ, ສຳນັກຂ່າວສານປະເທດລາວ ໄດ້ລາຍງານຂ່າວເມື່ອວັນທີ 3 ກຸມພາ 2016 ນີ້ວ່າ ໂຄງການໂຄງການກໍ່ສ້າງສະໜາມບິນໜອງຄ້າງ ເມືອງຊໍາເໜືອ ແຂວງຫົວພັນມີຄວາມຄືບໜ້າພຽງ 35 % ຂະນະທີ່ ເຈົ້າໜ້າທີ່ກ່ຽວຂ້ອງຍັງບໍ່ສາມາດເປີດເຜີຍແຜນລະອຽດກ່ຽວກັບການເປີດນໍາໃຊ້ຢ່າງເປັນທາງການ.
ລາຍງານຂ່າວກ່າວວ່າ ທ່ານ ໂກແມັກ ຫົວໜ້າຮັບຜິດຊອບໂຄງການສະໜາມບິນໜອງຄ້າງໄດ້ເປີດເຜີຍໃນວັນທີ 3 ກຸມພາ 2016 ນີ້ວ່າ: ໜ້າວຽກສ່ວນໃຫຍ່ແມ່ນສໍາເລັດບຸກເບີກເສັ້ນທາງ, ຖົມດິນສ້າງຖານສະໜາມບິນ, ກໍ່ສ້າງສະຖານທີ່ພັກກໍາມະກອນ ແລະ ອື່ນໆໂດຍສະເລ່ຍສໍາເລັດ 35% ແຕ່ຖ້າປຽບກັບວຽກຕົວຈິງຖືວ່າຊັກຊ້າຍ້ອນຫລາຍປັດໄຈເປັນຕົ້ນສະພາບຝົນຕົກ ແລະ ອາກາດ.
ໂຄງການດັ່ງກ່າວຕັ້ງຢູ່ບ້ານ ໜອງຄ້າງ ເມືອງຊຳເໜືອ ແຂວງຫົວພັນ ມີເນື້ອທີ່ທັງໝົດ 200 ກວ່າເຮັກຕາ, ໄກຈາກຕົວເມືອງຊຳເໜືອ 30 ກວ່າກິໂລແມັດ. ການກໍ່ສ້າງດັ່ງກ່າວເປັນຍົກລະດັບການພັດທະນາເສດຖະກິດ-ສັງຄົມ ແລະແກ້ໄຂບັນຫາການເດິນທາງ ໃຫ້ມີຄວາມສະດວກສະບາຍຂຶ້ນ.