ສຳນັກຂ່າວຕ່າງປະເທດ ລາຍງານໃນວັນທີ 3 ກຸມພານີ້ວ່າ ນະຄອນຫລວງລອນດອນ ສະຫະຣາຊອານາຈັກ ກຽມເປັນເຈົ້າພາບ ຈັດກອງປະຊຸມຂອງຜູ້ນຳທົ່ວໂລກ ຊຶ່ງຈະຈັດຂຶ້ນໃນວັນທີ 4 ກຸມພາ 2016 ນີ້ ເພື່ອຫາຊ່ອງທາງ ລະດົມທຶນຊ່ວຍເຫລືອດ້ານມະນຸດສະທຳແກ່ຊາວຊີຣີ ທີ່ໄດ້ຮັບເຄາະຮ້າຍຈາກຜົນຂອງສົງຄາມກາງເມືອງ ທີ່ຍືດເຍື້ອຍາວນານ ມາຕັ້ງແຕ່ປີ 2011 ແລະ ເປັນຕົ້ນຕໍຂອງວິກິດການ ຜູ້ອົບພະຍົບໄຫລບ່າເຂົ້າສູ່ທະວີບເອີຣົບ.
ກອງປະຊຸມດັ່ງກ່າວນີ້ ໄດ້ຕັ້ງເປົ້າໝາຍວ່າ ຈະລະດົມທຶນຊ່ວຍເຫລືອໃຫ້ໄດ້ 7.7 ຕື້ກວ່າໂດລາ ຊຶ່ງເປັນຈຳນວນເງິນ ທີ່ອົງການສະຫະປະຊາຊາດໄດ້ປະກາດຕັ້ງເອົາໄວ້, ພ້ອມດຽວກັນນັ້ນ ຍັງຈະມີການລະດົມເພີ່ມອີກປະມານ 1.2 ຕື້ໂດລາ ໃຫ້ແກ່ປະເທດອື່ນໆໃນຕາເວັນອອກກາງ ທີ່ໄດ້ຮັບຜົນກະທົບ ຈາກວິກິດການທາງການເມືອງຢູ່ຊີຣີ.
ແຫລ່ງຂ່າວໄດ້ລາຍງານວ່າ ມີຜູ້ນຳ ແລະ ຕົວແທນລັດຖະບານ ຫລາຍກ່ວາ 70 ປະເທດໃນທົ່ວໂລກ ໄດ້ແຈ້ງຈຸດປະສົງ ເຂົ້າຮ່ວມສູ່ກອງປະຊຸມດັ່ງກ່າວ ທີ່ນະຄອນຫລວງລອນດອນແລ້ວ.
