ຫົວໜ້າພະແນກສຶກສາທິການ ແລະ ກິລາ ນະຄອນຫຼວງວຽງຈັນ ໃຫ້ສຳພາດຕໍ່ນັກຂ່າວ ລາວພັດທະນາຂອງພວກເຮົາໃນວັນທີ 2 ກຸມພານີ້ວ່າ: ໂດຍລວມແລ້ວ ຜົນຂອງການສອບເສັງພາກຮຽນທີ 1 ຂອງສົກຮຽນ 2015 – 2016 ນີ້ແມ່ນດີກວ່າສົກຮຽນ 2014 – 2015 ຜ່ານມາຄື: ມັນສະແດງອອກໃຫ້ເຫັນວ່າ ນັກຮຽນສ່ວນໃຫຍ່ສາມາດຕອບຄຳຖາມ ສອບເສັງໃນວິຊາຕ່າງໆໄດ້ເປັນຢ່າງດີ, ຊຶ່ງສະທ້ອນໃຫ້ເຫັນວ່າ ຜົນຂອງການຮຽນການສອນໃນແຕ່ລະໂຮງຮຽນດີຂຶ້ນ, ພົ້ນເດັ່ນແມ່ນການປະຕິບັດ ກົດລະບຽບຕ່າງໆຂອງນັກຮຽນເຊັ່ນ: ການນຸ່ງຖືຕ່າງໆເປັນລະບຽບຮຽບຮ້ອຍດີດີ, ນັກຮຽນມາໂຮງຮຽນຖືກຕ້ອງຕາມເວລາ, ຕັ້ງໃຈຮຽນຫຼາຍຂຶ້ນ, ສ່ວນນັກຮຽນທີ່ມາຊ້າ ແລະ ຂາດໂຮງຮຽນແມ່ນມີຈຳນວນຫຼຸດໜ້ອຍລົງ ເມື່ອທຽບໃສ່ຜ່ານມາ, ທັງນີ້ກໍຍ້ອນຄວາມເອົາໃຈໃສ່ຂອງຄູອາຈານກໍຄືພໍ່ແມ່ຜູ້ປົກຄອງ ແລະ ພາກສ່ວນກ່ຽວຂ້ອງອື່ນໆ ໄດ້ຊ່ວຍໃຫ້ຄຸນນະພາບການຮຽນການສອນ ຢູ່ໂຮງ ຮຽນຕ່າງໆ ໃນນະຄອນຫຼວງວຽງຈັນ ມີການຫັນປ່ຽນດີຂຶ້ນເປັນລຳດັບ, ທ່ານຫົວໜ້າພະແນກສຶກສາກ່າວວ່າ: ແຕ່ຄຽງຄູ່ກັບຜົນສຳເລັດດັ່ງກ່າວແລ້ວ ວຽກງານການສຶກສານະຄອນຫຼວງວຽງຈັນ ຈະຕ້ອງໄດ້ເອົາໃຈໃສ່ ໃນການຈັດຕັ້ງປະຕິບັດບັດ ຫຼັກສູດການຮຽນການສອນໃໝ່ ທີ່ກະຊວງວາງອອກຄື: ຕ້ອງເລັ່ງຈັດຝຶກອົບຮົມຍົກລະດັບການສິດສອນ ໃຫ້ແກ່ຄູອາຈານໃຫ້ທົ່ວເຖິງ, ຕາມເງື່ອນໄຂເພື່ອສາມາດຖ່າຍທອດຄວາມຮູ້ ຕາມຫຼັກປ່ຽນແປງໃໝ່ໃຫ້ແກ່ນັກຮຽນ, ພ້ອມນັ້ນ ອຳນວນການຮຽນຮຽນ ຕ້ອງເປັນເຈົ້າການປະສານສົບທົບກັບຄູອາຈານ, ຜູ້ປົກຄອງ ແລະ ອຳນາດການປົກຄອງ ເພື່ອຊອກຫາສາເຫດຕ່າງໆ ທີ່ເຮັດໃຫ້ມີນັກຮຽນ-ຮຽນອອ່ນເພື່ອຫາວິທີ່ແກ້ໄຂ ແລະ ສິ່ງສຳຄັນແມ່ນວິທີ່ການສົ່ງຄວາມຮູ້ຂອງຄູອາຈານ ໃຫ້ແກ່ນັກຮຽນແມ່ນຕ້ອງມີປະສິດທິພາບ ເພື່ອເຮັດໃຫ້ນັກຮຽນເຂົ້າໃຈງ່າຍ ແລະ ຈືຈຳໄດ້ດີ.
ທ່ານ ຫົວໜ້າພະແນກດັ່ງກ່າວໃຫ້ຮູ້ອີກວ່າ: ສະເພາະໃນຕໍ່ໜ້ານີ້ທາງພະແນກສຶກສາ ນະຄອນຫຼວງວຽງຈັນເອງ ຈະໄດ້ສຸມໃສ່ປັບປຸງຄຸນນະພາບ ການຮຽນການສອນໃຫ້ດີຍິ່ງຂຶ້ນ, ເປັນຕົ້ນແມ່ນ ຈະເລັ່ງໃສ່ຝຶກອົບຮົມ ຍົກລະດັບຄວາມຮູ້ຄວາມສາມາດ ໃຫ້ແກ່ຄູອາຈານຢູ່ໂຮງຮຽນຕ່າງໆໃຫ້ດີຂຶ້ນ, ພ້ອມຈະມີການຈັດກິດຈະກຳຕ່າງໆ ເພື່ອສົ່ງເສີມການສຶກສາຄື: ການແຂ່ງຂັນກິລາ, ສີລະປະດົນຕີ, ພິເສດແມ່ນຈະເລັ່ງໃສ່ ສ້າງໂຮງຮຽນຕົວແບບຄື: ໂຮງຮຽນດີເດັ່ນ ແລະ ໂຮງຮຽນປອດຢາເສບຕິດ ໃຫ້ໄດ້ຕາມມາດຖະຖານທີ່ກະຊວງສຶກສາທິການວາງອອກ ໃຫ້ຕິດພັນກັບຂະບວນການ ແຂ່ງຂັນຮັກຊາດ ແລະ ພັດທະນາ ແລະ ສິ່ງສຳຄັນໜຶ່ງອີກ ແມ່ນຮຽກຮ້ອງໃຫ້ພໍ່ແມ່ຜູ້ປົກຄອງ ຕ້ອງໄດ້ເພີ່ມຄວາມໃກ້ຊິດຕິດແທດ ແລະ ເອົາໃຈໃສ່ເບິ່ງແຍງລູກຫຼານຂອງຕົນໃຫ້ຫຼາຍຂຶ້ນ, ໂດຍສະເພາະໃນເວລາຢູ່ນອກໂມງຮຽນ, ຖ້າມີເງື່ອນໄຂ ຄວນຊອກກິດຈະກຳສົ່ງເສີມການຮຽນ ໃຫ້ເຂົາເຈົ້າເຮັດໃນເວລາຫວ່າງແມ່ນຈະເປັນການດີທີ່ສຸດ, ພ້ອມນັ້ນ ຄູອາຈານກໍໃຫ້ເພີ່ມຄວາມເອົາໃຈໃສ່ ໃນການສິດສອນດີຂື້ນ ໂດຍສະເພາະແມ່ນຕ້ອງຫາວິທີໃໝ່ ເພື່ອໃຊ້ເຂົ້າໃນການສິດສອນຫຼັກສູດອັນໃດ ທີ່ກະຊວງກຳນົດອອກ ຕ້ອງເຮັດໃຫ້ສຳເລັດ 100%.
ປັດຈຸບັນທົ່ວນະຄອນຫຼວງວຽງຈັນມີໂຮງຮຽນສາມັນສຶກສາທັງໝັດ 962 ແຫ່ງ, ໃນນັ້ນມີໂຮງຮຽນອານຸບານ 292 ກວ່າແຫ່ງ, ປະຖົມ 512 ກວ່າແຫ່ງ, ມັດທະຍົມຕົ້ນ ແລະ ປາຍ 158 ແຫ່ງ.
ແຫລ່ງຂ່າວ:
