ເຈົ້າ​ໜ້າ​ທີ່​ລະດັບ​ສູງ​ດ້ານ​ສາ​ທາລະນະ​ສຸກ​ຂອງ​ລັດຖະບານ​ເບນິນ​ອອກ​ມາຍ​ອມຮັບ​ໃນ​ມື້ວານ​ນີ້ ( 2 ກຸມພາ 2016) ວ່າ ​ໃນ​ປະຈຸ​ບັນ ປະ​ເທດ​ຂອງ​ຕົນ​ພົບ​ຜູ້​ຕ້ອງສົງ​ໄສ​ວ່າ​ຕິດ​ເຊື້ອ​​ໄວ​ຣັສ​ໄຂ້​ເລືອດ​ອອກ​ລາສຊາ (Lassa fever) ຊຶ່ງມີ​ສັດ​ຈຳພວກ​ໜູ​ເປັນ​ພາຫະ​ແລ້ວ​ຢ່າງ​ໜ້ອຍ 20 ຄົນ ຊຶ່ງ​ໃນ​ຈຳນວນ​ນີ້​ເສຍ​ຊີວິດ​ໄປ​ແລ້ວ 9 ຄົນ ທ່າມກາງ​ຄວາ​ມກັງວົນ​ວ່າ​ໄວຣັສຊະນິດ​ນີ້​ອາດ​ກໍ​ໃຫ້​ເກີດ​ວິ​ກິດ​ດ້ານ​ສຸຂະພາບ​ຄັ້ງ​ໃໝ່​ໃນ​ພູມິ​ພາກ​ອາ​ຟຣິກາ​ຕະ​ເວັນ​ຕົກ​ທີ່​ຫາ​ກໍ​ຟື້ນ​ຕົວ​ໄດ້​ໃນ​ບໍ່​ດົນ​ຈາກ​ການ​ແພ່​ລະ​ບາດ​ຂອງ​ເຊື່ອ ອີ​ໂບລາ ທີ່​​ເຂົ້າມາ​ພູມິພາກ​ນີ້​ຕະຫຼອດ​ໄລຍະ​ເວລາ​ກວ່າ 2 ປີຜ່າ​ນມາ.

ດ້ານ​ກອງທຶນ​​ເດັກນ້ອຍ​ແຫ່ງ​ສະຫະ​ປະຊາ​ຊາດ ຫຼື ອົງການ ຢູນິ​ເຊບ ອອກ​ຄຳ​ຖະ​ແຫຼ​ງວ່າ ຂະນະ​ນີ້​ພົບ​ຜູ້​ຕິ​ດ​ເຊື້ອ​ໄວ​ຣັສ​ໄຂ້​ເລືອດ​ອອກ​ລາສຊາ (Lassa fever) ຜູ້​ທຳ​ອິດ​ໃນ​​ເບ​ນິນ​ຖືກ​ນຳ​ຕົວ​ເຂົ້າ​ຮັບ​ການ​ເບິ່ງ​ແຍງຈາກ​ແພດ​ທີ່​ໂຮງໝໍ​​ແຊງ ມາ​​ແຕງ ​ເດ ປາປາ​ເນ ​ໃນ​ເມື່ອ​ງຊາ​ອູຣູ.

ຂະນະ​ທີ່​ໂອຣູ ບາ​ກູ ​ໂຢຣູ ຊາ​ບີ ​ເຈົ້າ​ໜ້າ​ທີ່​ລະດັບ​ສູງດ້ານ​ສາທາລະນະ​ສຸກຂອງ​ລັດຖະບານ​ເບ​ນິນ ອອກ​ມາຍ​ອມຮັບ​ເປັນ​ຄັ້ງ​ທຳ​ອິດ​ວ່າ​ ພົບ​ຜູ້​ເສຍ​ຊີວິດ​ແລ້ວ​ຢ່າງ​ໜ້ອຍ 9 ຄົນ ຈາກ​ຈຳນວນ​ຜູ້​ຕ້ອງ​​ສົງ​ໄສ​ວ່າ​ຕິດ​ເຊື້ອ​ໄວຣັສ​ໄຂ້​ເລືອດ​ອອກລາສຊາ​ທີ່​ມີ​ຈຳນວນ​ບໍ່​ຕໍ່າ​ກວ່າ 20 ຄົນ ​ໃນ​ປະ​ເທດ​ຂອງ​ຕົນ​ຊຶ່ງ​ມີປະຊາກ​ອນຢູ່​ປະມານ 10 ລ້ານ​ຄົນ.

ກ່ອນ​ໜ້າ​ນີ້ ​ເບ​ນິນ​ເຄີຍ​ພົບກັບການ​ແພ່​ລະບາດ​ຂອງ​ໄວ​ຣັສ​ໄຂ້​ເລືອດ​ອອກ​ລາສຊາ ​ຊຶ່ງ​ມີ​ສັດ​ຈຳພວກ​ໜູເປັນ​ພາຫະ​ ມາ​ແລ້ວ​ໃນ​​ໄລຍະ​​ເດືອນ​ຕຸລາ​ປີ 2014 ​ເປັນ​ເຫດ​ໃຫ້​ມີ​ຜູ້​ເສຍ​ຊີວິດ​​ໃນ​ເວລາ​ນັ້ນ​ໄປ​ຢ່າງ​ໜ້ອຍ 9 ຄົນ.

​ໃນ​ອີກ​ດ້ານ​ໜຶ່ງມີ​ລາຍ​ງາ​ນລະບຸ​ວ່າ ປະ​ເທດ​​ເພື່ອນ​ບ້ານ​ຂອງ​ເບ​ນິນ​​ຄື​​ໄນ​ຈີ​​ເຣຍກໍ​ພົບ​ຜູ້​ຕິດ​ເຊື້ອ​ໄວຣັສຊະນິດ​ນີ້​ແລ້ວ 168 ຄົນ ຊຶ່ງ​ອາດ​ເຮັດ​ໃຫ້​ມີ​ຜູ້​ເສຍ​ຊີວິດ​ທີ່​ຍັງ​ບໍ່​ໄດ້​ຮັບ​ການ​ຢືນຢັນ​ຢ່າງ​ໜ້ອຍ 84 ຄົນ.

ທັງ​ນີ້ ​ໄວ​ຣັສ​ໄຂ້​ເລືອດ​ອອກ​ລາສຊາ​ຖືກ​ຈັດ​ໃຫ້​ຢູ່​ໃນ​ຕະກູນ​ດຽວ​ກັບ​ເຊື້ອ​ໄວ​ຣັສມາ​ເບີກ ​ແລະ​ອີ​ໂບລາ ​ໂດ​ຍຊື່​ຂອງ​ໄວ​ຣັສຊະນິດ​ນີ້​ຖືກ​ຕັ້ງ​ຊື່​ຕາມ​ເມືອງ​ທາງ​ພາກ​​ເໜືອ​ຂອງ​ໄນ​ຈີ​ເຣຍ ຊຶ່ງ​ເປັນ​ສະຖານ​ທີ່​ທີ່​ພົບ​ການ​ແພ່​ເຊື້ອ​ລະບາດ​ຂອງ​ໄວ​ຣັສຊະນິດນີ້​ເປັນ​ຄັ້ງ​ທຳ​ອິດ​ໃນ​ໂລກ​ເມື່ອ​ປີ 1969.