ຂປລ. ການອອກແບບໂຄງການກໍ່ສ້າງຂົວຂ້າມນໍ້າຂອງແຫ່ງໃໝ່ລະຫວ່າງເມືອງປາກທາ ແຂວງບໍ່ແກ້ວ ຫາ ເມືອງຄອບ ແຂວງໄຊຍະບູລີສໍາເລັດສົມບູນ ປັດຈຸບັນຍັງລໍຖ້າງົບປະມານ ຂະນະທີ່ຂົວຂ້າມນໍ້າຂອງແຫ່ງທີ 4 ລະຫວ່າງແຂວງບໍ່ແກ້ວ ສປປ ລາວ ແລະ ແຂວງຊຽງຣາຍ ປະເທດໄທເປີດນໍາໃຊ້ຢ່າງເປັນທາງການພຽງ 4 ປີໃນປີ 2013 ເຊິ່ງສ້າງບາດກ້າວຍູ້ແຮງການພັດທະນາເສດຖະກິດ-ສັງຄົມຕາມແລວລະບຽງເສດຖະກິດເໜືອ-ໃຕ້ອະນຸພາກພື້ນແມ່ນໍ້າຂອງເກີດຜົນປະໂຫຍດຕາມຄາດ.
ທ່ານ ວັນນະສອນ ໂພທິປັນຍາ ຫົວໜ້າຂະແໜງແຜນການ ແລະ ການລົງທຶນ, ແຂວງບໍ່ແກ້ວໄດ້ເປີດເຜີຍວ່າ: ພາຍຫລັງຂົວຂ້າມນໍ້າຂອງແຫ່ງທີ 4 ລະຫວ່າງແຂວງບໍ່ແກ້ວ ສປປ ລາວ ແລະ ແຂວງຊຽງຣາຍ ປະເທດໄທເປີດນໍາໃຊ້ໃນປີ 2013 ປະກົດວ່າບັນຍາກາດການລົງທຶນ, ການຄ້າ, ການຄົມມະນາຄົມຂົນສົ່ງສິນຄ້າ, ການຜະລິດເປັນສິນຄ້າ, ການທ່ອງທ່ຽວ ແລະ ການໄປມາຫາສູ່ໄດ້ຮັບການພັດທະນາຢ່າງວ່ອງໄວ ໃນນີ້ມີນັກລົງທຶນເຂົ້າມາຈັບຈ່ອງ ແລະ ລົງທຶນຢູ່ເຂດບໍລິເວນຫົວຂົວເພີ່ມຂຶ້ນຢ່າງຕໍ່ເນື່ອງ; ການຂົນສົ່ງສິນຄ້າຈາກຜ່ານຂົວສະເລ່ຍຫລາຍກວ່າ 100 ຖ້ຽວຕໍ່ມື້ຈາກໄທຜ່ານລາວເຖິງຈີນ; ການເປີດຈຸບໍລິການເປັນຕົ້ນໂຮງແຮມ, ຮ້ານອາຫານ ແລະ ຈຸດພັກສິນຄ້າປົ່ງຂຶ້ນຕະຫລອດເສັ້ນທາງຈາກແຂວງບໍ່ແກ້ວຜ່ານເສັ້ນທາງ R3 ເຂົ້າສູ່ປະເທດຈີນ; ການຜະລິດເປັນສິນຄ້າກໍຂະຫຍາຍຕົວເພີ່ມຂຶ້ນໂດຍສະເພາະການປູກໝາກເດືອ, ສາລີ, ໝາກກ້ວຍ ແລະ ອື່ນໆ. ໃນອະນາຄົດອັນໃກ້ນີ້, ແຂວງບໍ່ແກ້ວຈະມີຂົວຂ້າມນໍ້າຂອງເພີ່ມອີກແຫ່ງທີ 2 ລະຫວ່າງເມືອງປາກທາ ແຂວງບໍ່ແກ້ວ ຫາ ເມືອງຄອບ ແຂວງໄຊຍະບູລີ ປັດຈຸບັນນີ້ໄດ້ອອກແບບສໍາເລັດສົມບູນແລ້ວ ແຕ່ພວກເຮົາຍັງລໍຖ້າພຽງງົບປະມານໃນການກໍ່ສ້າງຈາກພາກລັດ ແລະ ນັກລົງທຶນ, ຄາດວ່າຂົວແຫ່ງດັ່ງກ່າວເປັນຂົວສາມາດເຊື່ອມຈອດກັບປະເທດໄທ, ແຂວງໄຊຍະບູລີ, ຫລວງພະບາງ ເຖິງນະຄອນຫລວງວຽງຈັນດ້ວຍໄລຍະທາງເສັ້ນກວ່າເສັ້ນທາງທີ່ໃຊ້ໃນປັດຈຸບັນ ສະນັ້ນຈະເຮັດໃຫ້ການໄປມາຫາສູ່ ແລະ ຂົນສົ່ງສິນຄ້າຈາກ ສປ ຈີນ ຜ່ານແຂວງບໍ່ແກ້ວເຖິງນະຄອນຫລວງວຽງຈັນສະດວກສະບາຍຂຶ້ນກວ່າເກົ່າ. ແນວໃດກໍດີ ປັດຈຸບັນນີ້ ສັງເກດເຫັນວ່າມີນັກລົງທຶນຈາກ ສ.ເກົາຫລີ ແລະ ສປ.ຈີນເຂົ້າມາລົງທຶນພາຍໃນແຂວງບໍ່ແກ້ເພີ່ມຂຶ້ນຢ່າງຕໍ່ເນື່ອງ ແຕ່ສ່ວນໃຫຍ່ແມ່ນຂະແໜງກະສິກໍາ, ບໍລິການ ແລະ ອື່ນໆ.
ຫົວໜ້າຂະແໜງແຜນການ ແລະ ການລົງທຶນ, ແຂວງບໍ່ແກ້ວຍັງຊີ້ແຈງໃນຈຸດທີ່ໜ້າສົນໃຈວ່າ: ຕາມການອອກແບບຂອງຂົວແຫ່ງທີ 4 ແລ້ວ, ໂຄງການເສັ້ນທາງລົດໄຟບໍ່ຜ່ານຂົວຂ້າມນໍ້າຂອງແຫ່ງດັ່ງກ່າວ ແຕ່ອາດຈະໃຊ້ວິທີເປັນບ່ອນຂ່ຽນຖ່າຍສິນຄ້າຢູ່ຈຸດຫົວຂົວລະຫວ່າງສອງປະເທດ ແຕ່ໃນອະນາຄົດອາດເປັນໄປໄດ້ວ່າເສັ້ນທາງລົດໄຟລາວ-ຈີນ-ໄທອາດຜ່ານຂົວຂ້າມນໍ້າຂອງແຫ່ງໃໝ່ລະຫວ່າງເມືອງປາກທາ ແຂວງບໍ່ແກ້ວ ຫາ ເມືອງຄອບ ແຂວງໄຊຍະບູລີ ເຂົ້າສູ່ປະເທດໄທ.
ຂ່າວ-ພາບ: ເກີດຂວັນໃຈ
