ບໍລິສັດບໍລິການການຄ້າປາກເຊ ຈຳກັດ ຖືໄດ້ວ່າເປັນສູນລວມການຄ້າທີ່ໃຫຍ່ທີ່ສຸດໃນເມືອງປາກເຊກໍຄືໃນແຂວງ ຈຳປາສັກ ຊຶ່ງມີສິນຄ້າຫຼາກຫຼາຍລວມທັງເຄື່ອງອຸປະໂພກ ແລະບໍລິໂພກເຮັດໃຫ້ໃນແຕ່ລະວັນຈໍລະຈອນສິນຄ້າມີຄວາມຄຶກຄື້ນພໍສົມຄວນທີ່ສຳຄັນໃນໄລຍະນີ້ໃກ້ຮອດບຸນປີໃໝ່ຂອງຊາວຫວຽດນາມ ແລະຊາວຈີນ ຍິ່ງເຮັດໃຫ້ມີບັນຍາກາດ ເພີ່ມຂຶ້ນ ແຕ່ສິ່ງທີ່ຕາມມາຄືບັນຫາການສວຍໂອກາດຂຶ້ນລາຄາສິນຄ້າບາງປະ ເພດຂອງແມ່ຄ້າບາງກຸ່ມ.
ທ່ານ ຈຳລຸນ ຊາດຕະກຸນ ຮອງຫົວໜ້າບໍລິຫານບໍລິສັດບໍລິການການຄ້າປາກເຊ ຈຳກັດໄດ້ໃຫ້ສຳພາດວ່າ: ເພື່ອເປັນການປະກອບສ່ວນຢ່າງຕັ້ງໜ້າໃຫ້ແກ່ມະຫາພາກໃນການຄຸ້ມຄອງລາຄາສິນຄ້າໃຫ້ມີຄວາມເປັນລະບົບລະບຽບຮຽບຮ້ອຍ, ໃນໄລຍະຜ່ານມາກໍຄືປະຈຸບັນທາງບໍລິສັດແມ່ນໄດ້ເອົາໃຈໃສ່ຢ່າງຕັ້ງໜ້າໃນການເປັນຫູເປັນຕາໃຫ້ແກ່ພະແນກອຸດສາຫະກຳ ແລະການຄ້າແຂວງ, ໂດຍສະເພາະແມ່ນປະເພດຊີ້ນປາອາຫານ, ການລັກລອບຕາຊິງຈາກແມ່ຄ້າບາງຄົນທີ່ສວຍໂອກາດ, ພ້ອມດຽວກັນນີ້ແມ່ນໄດ້ເອົາໃຈໃສ່ໃນການຈັດກຸ່ມໃຫ້ມີຄວາມເປັນລະບົບລະບຽບ, ຊຶ່ງສາມາດຈັດເປັນກຸ່ມໄດ້ທັງໝົດແລ້ວ 5 ກຸ່ມຄື: ກຸ່ມຊື້-ຂາຍເງິນຄຳ, ກຸ່ມຂາຍຊີ້ນ, ກຸ່ມຂາຍປາ, ກຸ່ມຂາຍເຂົ້າ ແລະກຸ່ມຂາຍຢາປົວພະຍາດປະຈຸບັນຍັງສືບຕໍ່ຈັດກຸ່ມໝົດປີ 2016 ຢ່າງໜ້ອຍໃຫ້ໄດ້ 10 ກຸ້ມ.
ທ່ານ ຈຳລຸນ ຊາດຕະກຸນ ກ່າວຕື່ມວ່າ: ໃນໄລຍະໃກ້ຈະຮອດບຸນປີໃໝ່ຂອງຊາວຫວຽດນາມ ແລະຊາວຈີນນີ້ທາງບໍລິສັດຍິ່ງເພີ່ມຄວາມເຂັ້ມງວດຫຼາຍດ້ານ, ໃນນັ້ນແມ່ນໄດ້ເຂັ້ມງວດຕາມຄຳສັ່ງແນະນຳຈາກພະແນກອຸດສາຫະກຳ ແລະການຄ້າແຂວງ, ໃນການຄຸ້ມຄອງລາຄາສິນຄ້າບໍລິໂພກທຸກຢ່າງຄື: ໃຫ້ຂາຍໃນລາຄາທີ່ທາງພະແນກການກ່ຽວຂ້ອງກຳນົດໄວ້ຢ່າງເຂັ້ມງວດ, ນອກນີ້ ແມ່ນໄດ້ເອົາໃຈໃສ່ໃນການປ້ອງກັນເວັນຍາມຕະຫຼອດ 24 ຊົ່ວໂມງ, ໂດຍເພາະແມ່ນບັນຫາຂີ້ລັກງັດແງະ, ບັນຫາອັກຄີໄຟຟ້າ, ຫ້າມບໍ່ໃຫ້ແມ່ຄ້າຈຸດທູບທຽນຊະຊາຍ ແລະອື່ນໆ.
ທ່ານກ່າວຕື່ມວ່າ: ພາຍຫຼັງທີ່ລັດໄດ້ເຂົ້າມາບໍລິຫານຈັດການຕະຫຼາດດາວເຮື່ອງໃນເມື່ອກ່ອນເຫັນວ່າມີຫຼາຍດ້ານ ພົ້ນເດັ່ນ, ເປັນຕົ້ນແມ່ນເລື່ອງຄວາມສະຫງົບ, ຄວາມເປັນລະບຽບຮຽບຮ້ອຍ ທີ່ສຳຄັນຄືການເກັບພັນທະໃຫ້ລັດ, ການສ້າງລາຍຮັບກໍເພີ່ມຂຶ້ນຕາມໆກັນ.
ທີ່ມາ: