ເພື່ອເປັນການຮັກສາໄວ້ໃນຮີດຄອງປະເພນີອັນດີງາມທີ່ໄດ້ສືບທອດກັນມາ ແຕ່ບູຮານນະການໃນວັນທີ 1 ກຸມພາ 2016 ນີ້ ເມືອງທ່າແຂກ ໄດ້ຈັດກອງປະຊຸມປຶກສາຫາລືກະກຽມງານບຸນນະມັດສະການພະທາດສີໂຄດຕະບອງ ປະຈຳປີ 2016 ທີ່ຈະໄດ້ຈັດຂຶ້ນໃນລະຫ່ວາງວັນທີ 20-22 ກຸມພານີ້ ໂດຍເປັນປະທານຂອງທ່ານ ຈັນ ບຸບຜາລີວັນ ເຈົ້າເມືອງໆທ່າແຂກບັນດາຫ້ອງການຕ່າງໆອ້ອມຂ້າງເມືອງເລຂາຄະນະພັກຮາກຖານ 4 ກຸ່ມບ້ານເລຂາພັກບ້ານ-ນາຍບ້ານ ແລະ ພະນັກງານວິຊາການເຂົ້າຮ່ວມ.
ກອງປະຊຸມຄັ້ງນີ້ ເພື່ອເປັນການແຈ້ງກ່ຽວກັບຂໍ້ຕົກລົງແຕ່ງຕັ້ງຄະນະກຳມະການຮັບຜິດຊອບແລະບັນດາອານຸກຳມະການຕ່າງໆໃນງານບຸນດັ່ງກ່າວ ເພື່ອພ້ອມກັນປຶກສາຫາລືຄົ້ນຄ້ວາຕີລາຄາຄືນໃນການຈັດຕັ້ງປະຕິບັດວຽກງານໃນປີທີ່ຜ່ານມາ ແລະທັງເປັນ
ການວາງແຜນການຈັດຕັ້ງປະຕິບັດໃນງານບຸນປີນີ້ ໃຫ້ມີລັກສະນະຖືກຕ້ອງຕາມຮີດຄອງປະເພນີອັນດີງາມຂອງລາວທີ່ມີເອກະລັກໂດດເດັ່ນ, ຄຶກຄື້ນມ່ວນຊື່ນມີຄວາມເປັນລະບຽບຮຽບຮ້ອຍ ແລະມີຄວາມສະຫງົບປອດໄພເຕັມໄປດ້ວຍຄວາມສວຍງາມຂຶ້ນກວ່າເກົ່າ.
ຊຶ່ງໃນຕອນທ້າຍຂອງກອງປະຊຸມ ທ່ານ ຈັນ ບຸບຜາລີວັນ ເຈົ້າເມືອງໆທ່າແຂກກໍໄດ້ໃຫ້ກຽດປະກອບຄຳຄິດ-ຄຳ ເຫັນ ໂດຍທ່ານໄດ້ເໜັ້ນໜັກ ແລະຮຽກ ຮ້ອງມາຍັງບັນດາແຕ່ລະອານຸກຳມະການ ຈົ່ງໄດ້ນຳເອົາເນື້ອໃນຈິດໃຈດັ່ງກ່າວທີ່ໄດ້ຮັບມອບໝາຍນຳໄປປຶກສາຫາລືເພື່ອຄັດຈ້ອນເອົາບັນຫາທີ່ພົ້ນເດັ່ນໃນອະນຸກຳມະການຂອງຕົນເອງ ເພື່ອຈະມາລາຍງານຄວາມພ້ອມອີກເທື່ອໜຶ່ງ ໃນວັນທີ່ 8 ກຸມພາ 2016 ເພື່ອເປັນການເຮັດໃຫ້ການຫ່າງຫາກະກຽມງານບຸນນະມັດສະການພຣະທາດສີໂຄດຕະບອງໃນປີນີ້ມີຄວາມສົມບູນເຕັມໄປດ້ວຍການມີສ່ວນຮ່ວມໃນຄວາມຮັບຜິດຊອບຈາກຫຼາຍພາກສ່ວນ ເພື່ອຮັບປະກັນເຮັດໃຫ້ການບໍລິການອຳນວຍຄວາມສະດວກໃຫ້ແກ່ມວນຊົນ ແລະພໍ່ແມ່ປະຊາຊົນບັນດາເຜົ່າທີ່ມາສັກກາລະບູຊາອົງພະທາດສີໂຄດຕະບອງມີຄວາມສະຫງົບປອດໄພ ແລະ ມີຄວາມຈົບງາມ.
ທີ່ມາ: