ເທສະການດອກງິ້ວບານ ຄັ້ງທີ 16 ໄດ້ຮັບຄວາມສົນໃຈຈາກມວນຊົນຊາວເມືອງຕົ້ນເຜິ້ງ ກໍ່ຄືປະຊາຊົນບັນດາເຜົ່າພາຍໃນແຂວງບໍ່ແກ້ວ ແຂວງໃກ້ຄຽງ ລວມເຖິງນັກທ່ອງທ່ຽວພາຍໃນ ແລະ ຕ່າງປະເທດ ເຊິ່ງງານຄັ້ງນີ້ ແນໃສ່ສົ່ງເສີມການທ່ອງທ່ຽວທຳມະຊາດດອນຊາວ ຕິດພັນກັບການທ່ອງທ່ຽວຄົບວົງຈອນຂອງເຂດເສດຖະກິດພິເສດ 3 ຫຼ່ຽມຄຳ.
ທ່ານ ດຣ. ຄຳພັນ ເຜີຍຍະວົງ ເຈົ້າແຂວງບໍ່ແກ້ວ ກ່າວໃນພິທີເປີດເທສະການດອກງິ້ວບານ ຄັ້ງທີ 16 ຢ່າງເປັນທາງການວ່າ: ເທສະການດອກງິ້ວບານປີນີ້ ເປັນຄັ້ງທີ 16 ແລະ ເປັນປີທີ 5 ທີ່ເຂດເສດຖະກິດພິເສດ 3 ຫຼ່ຽມຄຳ ຮ່ວມກັບອຳນາດການປົກຄອງແຂວງບໍ່ແກ້ວ ຈັດຂຶ້ນ ຈຸດປະສົງເພື່ອສົ່ງເສີມຄວາມເປັນເອກະລັກດ້ານວັດທະນະທຳ ແລະ ຮີດຄອງປະເພນີອັນດີງາມຂອງທ້ອງຖິ່ນ ແນໃສ່ເສີມຂະຫຍາຍຄວາມສາມັກຄີປອງດອງຂອງປະຊາຊົນບັນດາເຜົ່າ ກໍ່ຄືພົນລະເມືອງຜູ້ອາໄສຢູ່ໃນເຂດ ແລະ ເມືອງຕົ້ນເຜິ້ງ ພ້ອມທັງເປັນການສົ່ງເສີມການຜະລິດ ແລະ ການແລກປ່ຽນສິນຄ້າໃຫ້ມີການຂະຫຍາຍຕົວຫຼາຍຂຶ້ນ.
ງານຄັ້ງນີ້ ຈັດຂຶ້ນແຕ່ວັນທີ 26-31 ມັງກອນ 2016 ເຊິ່ງປະກອບມີຫຼາຍກິດຈະກຳ ເຊັ່ນ: ການຈັດພິທີທາງສາສະໜາ ຕັກບາດ ແລະ ສູດປະລິຕະມຸງຄຸນ ງານຕະຫຼາດນັດ ຄັດເລືອກນາງງາມດອກງິ້ວບານ ປະຈຳປີ 2016 ຍ່າງສະແດງເຄື່ອງນຸ່ງບັນດາເຜົ່າ ພິເສດແມ່ນໄດ້ຮັບຊົມການສະແດງຂອງນັກຮ້ອງຈາກສູນກາງ ອັນໄດ້ເປັນສີສັນເຮັດໃຫ້ງານຄັ້ງນີ້ ມີບັນຍາກາດຟົດຟື້ນມ່ວນຊື່ນຂຶ້ນຕື່ມ.
ພິທີເປີດງານເປັນທາງການ ໄດ້ຈັດຂຶ້ນໃນວັນທີ 29 ມັງກອນ 2016 ຜ່ານມາ ທີ່ດອນຊາວ ເມືອງຕົ້ນເຜິ້ງ ແຂວງບໍ່ແກ້ວ ໂດຍການເຂົ້າຮ່ວມຂອງທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ປະທານຄະນະກຳມະການແຫ່ງຊາດ ເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະ ທ່ານ ຈ້າວ ເຫວີຍ ປະທານສະພາບໍລິຫານເຂດເສດຖະກິດພິເສດ 3 ຫຼ່ຽມຄຳ ພ້ອມພາກສ່ວນກ່ຽວຂ້ອງ ແລະ ພໍ່ແມ່ປະຊາຊົນເຂົ້າຮ່ວມ.
ແຫລ່ງຂ່າວ:
