ຂປລ. ຂະແໜງການທ່ອງທ່ຽວ ແຂວງອຸດົມໄຊໃຫ້ຮູ້ວ່າ: ໃນສົກປີ 2015 ມີນັກທ່ອງທ່ຽວທີ່ເຂົ້າມາຢ້ຽມຢາມ ແລະ ທ່ອງທ່ຽວ ແຂວງອຸດົມໄຊ ເພີ່ມຂຶ້ນ 15 % ເມື່ອທຽບໃສ່ ສົກປີ 2014. ນັກທ່ອງທ່ຽວຈຳນວນດັ່ງກ່າວ ສ່ວນຫລາຍແມ່ນ ມາຈາກບັນດາປະເທດໃນພາກພື້ນ ອາຊຽນ ແລະ ສປ ຈີນ ເຊິ່ງກວມເອົາ 59,86% ຂອງຈຳນວນນັກທ່ອງທ່ຽວທັງໝົດ ເຊິ່ງໄດ້ສ້າງລາຍຮັບໃຫ້ແກ່ປະຊາຊົນ, ຜູ້ປະກອບການ ກ່ຽວກັບການບໍລິການ ປະມານ 12 ລ້ານກວ່າໂດລາສະຫະລັດ.
ສາເຫດທີ່ເຮັດໃຫ້ອັດຕານັກທ່ອງທ່ຽວຢູ່ແຂວງດັ່ງກ່າວ ເພີ່ມຂຶ້ນເນື່ອງຈາກເສດຖະກິດ-ສັງຄົມ ພາຍໃນແຂວງ ມີການຂະຫຍາຍຕົວ, ສະຖານທີ່ທ່ອງທ່ຽວ ຫລາຍແຫ່ງ ມີການປັບປຸງບູລະນະ ແລະ ເປີດບໍລິການຢ່າງຕໍ່ເນື່ອງ ລວມທັງເສັ້ນທາງການຄົມມະນາຄົມ ກໍໄດ້ຮັບການພັດທະນາ ເຊິ່ງປັດຈຸບັນ ເສັ້ນທາງເຊື່ມຕໍ່ ລະຫວ່າງ ແຂວງອຸດົມໄຊກັບ ບັນດາປະເທດໃນພາກພື້ນ ແມ່ນມີຫລາຍຊ່ອງທາງ ແລະ ມີຄວາມສະດວກສະບາຍກວ່າເກົ່າ. ສ່ວນແຫລ່ງທ່ອງທ່ຽວທີ່ນັກທ່ອງທ່ຽວນິຍົມ ແລະ ໃຊ້ບໍລິການສ່ວນຫລາຍແມ່ນແຫລ່ງທ່ອງທ່ຽວທຳມະຊາດ, ຮອງລົງມາແມ່ນວັດທະນະທຳ, ຮອງຮອຍປະຫວັດສາດ ແລະ ອື່ນໆ.
ແຫລ່ງຂ່າວ:
