ຂປລ. ສະຫະພັນກຳມະບານລາວ ໄດ້ຈັດງານໂຮມຊຸມນຸມໃຫຍ່ ສະເຫລີມສະຫລອງວັນສ້າງຕັ້ງກຳມະບານລາວ ຄົບຮອບ 60 ປີ (1/2/1956-1/2/2016) ຂຶ້ນໃນວັນທີ 1 ກຸມພາ 2016 ຢູ່ ນະຄອນຫລວງວຽງຈັນ ໂດຍມີ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການ, ຮອງນາຍົກ ລັດຖະມົນຕີ ແລະ ມີບັນດາສະຫາຍຜູ້ແທນ ແລະ ແຂກຕ່າງປະເທດເຂົ້າຮ່ວມ ທັງນີ້, ກໍເພື່ອເຊີດຊູມູນເຊື້ອດຸໝັ່ນໃນການອອກແຮງງານ, ມູນເຊື້ອສາມັກຄີປອງດອງ, ຮັກເຊື້ອແພງຊາດ, ວັດທະນະທຳທີ່ເປັນເອກະລັກອັນດີງາມ ແລະ ອັນພົ້ນເດັ່ນກວ່າໝູ່ ແມ່ນມູນເຊື້ອແຫ່ງການຕໍ່ສູ້ບໍ່ຍອມຈຳນົນ ຕ້ານການຮຸກຮ້ານຂອງພວກສັດຕູ ຢ່າງເດັດດ່ຽວໜຽວແໜ້ນຂອງບັນພະບູລຸດ, ຊົນຊັ້ນກຳມະກອນ ແລະ ຊາວຜູ້ອອກແຮງງານລາວບັນດາເຜົ່າ ໃນການທ້ອນໂຮມ, ປົກປັກຮັກສາ ແລະ ສ້າງສາປະເທດຊາດ ເພື່ອຄວາມຢູ່ເຢັນເປັນສຸກຂອງປະຊາຊົນລາວບັນດາເຜົ່າ ໃນແຕ່ລະຍຸກສະໄໝ ສືບທອດຕໍ່ກັນມາຈົນເຖິງປັດຈຸບັນ.
ສະຫາຍ ປ້ານ ນ້ອຍມະນີ ກຳມະການສູນກາງພັກ, ປະທານສູນກາງສະຫະພັນກຳມະບານລາວ ກ່າວວ່າ: ຕະຫລອດໄລຍະ 60 ປີ ຜ່ານມາ ກຳມະກອນ-ຊາວຜູ້ອອກແຮງງານລາວບັນດາເຜົ່າ ໂດຍພາຍໃຕ້ການຊີ້ນຳໆພາ ຂອງອົງການຈັດຕັ້ງກຳມະບານລາວ ໄດ້ຮັບການພັດທະນາໃນທຸກດ້ານ, ມີຄຸນທາດການເມືອງໜັກແໜ້ນ, ຮັກສາໄດ້ມູນເຊື້ອລັກສະນະດີເລີດຂອງຊົນຊັ້ນກຳມະກອນ, ມີລະບຽບວິໄນການອອກແຮງານ, ມີລະດັບການສຶກສາ, ວິຊາສະເພາະຊັ້ນປະລິນຍາຕີ, ໂທ, ເອກ ນັບມື້ນັບຫລາຍຂຶ້ນ, ກຳມະກອນລາວຈຳນວນໜຶ່ງ ໄດ້ກາຍເປັນນັກເຕັກນິກ, ນັກຄົ້ນຄວ້າ, ນັກວິສາວະກອນ, ພະນັກງານວິຊາການ, ນັກທຸລະກິດ, ຜູ້ປະກອບການທີ່ດີເດັ່ນໃນບັນດາຂະແໜງການຕ່າງໆ, ໄດ້ຮັບນາມມະຍົດເປັນສາສະດາຈານ, ຮອງສາສະດາຈານ ພ້ອມນີ້ ກຳມະກອນລາວ-ຊາວຜູ້ອອກແຮງງານລາວ ໄດ້ຮັບການພັດທະນາສີມືແຮງງານຢ່າງບໍ່ຢຸດຢັ້ງ ສົມຄູ່ກັບການສ້າງສາພັດທະນາປະເທດຊາດໃນແຕ່ລະໄລຍະ, ມີຄວາມຮັບຜິດຊອບສູງຕໍ່ໜ້າທີ່ວຽກງານ ອັນໄດ້ຮັບຄວາມເຊື່ອໝັ້ນ ແລະ ໄວ້ວາງໃຈຈາກການຈັດຕັ້ງ ພັກ, ລັດ, ອົງການຈັດຕັ້ງສັງຄົມຕ່າງໆ ນັບທັງນັກລົງທຶນຢູ່ພາຍໃນ ແລະ ຕ່າງປະເທດ, ສະມາຊິກກຳມະບານ, ກຳມະກອນ-ຊາວຜູ້ອອກແຮງງານຈຳນວນໜຶ່ງ ໄດ້ຮັບການເລືອກຕັ້ງ, ແຕ່ງຕັ້ງເຂົ້າໃນຕຳແໜ່ງສຳຄັນຂອງພັກ-ລັດ ແຕ່ສູນກາງລົງຮອດທ້ອງຖິ່ນ ແລະ ໄດ້ກາຍເປັນຜູ້ຈັດການທີ່ດີເດັ່ນໃນບັນດາໂຮງຈັກ, ໂຮງງານຕ່າງໆໃນທົ່ວປະເທດ ເຮັດໃຫ້ສະຫະພັນກຳມະ ບານລາວ ໄດ້ມີບົດບາດທາງດ້ານການເມືອງ, ເສດຖະກິດ, ວັດທະນະທຳ-ສັງຄົມ ແລະ ໄດ້ຮັບການເຊື່ອຖືຈາກບັນດາການຈັດຕັ້ງກຳມະບານປະເທດເພື່ອນໝິດ ແລະ ສາກົນ.
ສະຫາຍ ປະທານສູນກາງສະຫະພັນກຳມະບານລາວ ໄດ້ຮຽກຮ້ອງໃຫ້ຄະນະບໍລິຫານງານສູນກາງສະຫະພັນກຳມະບານລາວ, ການຈັດຕັ້ງກຳມະບານທຸກຂັ້ນ, ສະມາຊິກກຳມະບານ, ກຳມະກອນ-ຊາວຜູ້ອອກແຮງງານລາວບັນດາເຜົ່າໃນທົ່ວປະເທດ ຈົ່ງໄດ້ເພີ່ມທະວີຄວາມສາມັກຄີເປັນປືກແຜ່ນ, ເຊີດຊູຄວາມຮັບຜິດຊອບໃນໜ້າທີ່ວຽກງານທີ່ພັກ-ລັດ ໄດ້ມອບໝາຍໃຫ້ມີຜົນສຳເລັດ, ປະກອບສ່ວນຢ່າງຕັ້ງໜ້າເຂົ້າໃນການປົກປັກຮັກສາ ແລະ ພັດທະນາປະເທດຊາດ ເພື່ອຄວາມສະຖຽນລະພາບ, ຄວາມມັ່ງຄັ້ງເຂັ້ມແຂງ ເຮັດໃຫ້ປະເທດລາວເຮົາ ຫລຸດພົ້ນອອກຈາກປະເທດດ້ອຍພັດທະນາ ໃນປີ 2020 ຢ່າງສີ້ນເຊີງ.
ສະຫະພັນກຳມະບານລາວ ໄດ້ຮັບການສ້າງຕັ້ງຂຶ້ນຢ່າງເປັນທາງການ ໃນວັນທີ 1 ກຸມພາ ປີ 1956 ຢູ່ເຂດທີ່ໝັ້ນແຂວງຫົວພັນ ໂດຍແມ່ນສະຫາຍ ໜູຮັກ ພູມສະຫວັນ ເປັນຜູ້ຊີ້ນຳ, ຈຸດປະສົງເພື່ອສືບຕໍ່ໂຄສະນາຂົນຂວາຍ, ເຕົ້າໂຮມກຳມະກອນ, ຊາວຜູ້ອອກແຮງງານລາວບັນດາເຜົ່າ ໃຫ້ມີຄວາມຕື່ນຕົວປະຕິວັດ, ມີນ້ຳໃຈຮັກຊາດ, ມີທັດສະນະຊົນຊັ້ນກຳມະກອນ, ມີຄວາມຕື່ນຕົວທາງດ້ານຊົນຊັ້ນຢ່າງຈະແຈ້ງ, ເສີມຂະຫຍາຍປະຊາທິປະໄຕ, ມີລະບຽບແບບແຜນ, ເປັນພົນລະເມືອງທີ່ດີຂອງຊາດ ສົ່ງເສີມການມີວຽກເຮັດງານທຳ ແລະ ເປັນຕົວແທນໃຫ້ແກ່ການປົກປ້ອງສິດຜົນປະໂຫຍດອົນຊອບທຳໃຫ້ແກ່ກຳມະກອນ, ຊາວຜູ້ອອກແຮງງານລາວບັນດາເຜົ່າ ກາຍເປັນກຳລັງແຮງເຂົ້າຮ່ວມຢ່າງຕັ້ງໜ້າ ແລະ ເປັນເຈົ້າການໃນການຕໍ່ສູ້ກູ້ຊາດ, ປົກປັກຮັກສາ ແລະ ພັດທະນາປະເທດຊາດຕາມເສັ້ນທາງກ້າວຂຶ້ນສັງຄົມນິຍົມ.
ແຫລ່ງຂ່າວ:
