ຂປລ.ໃນຕອນຄ່ຳວັນທີ 29 ມັງກອນນີ້, ທ່ານ ຫງວຽນ ແມັງຮຸ່ງ ເອກອັກຄະລັດຖະທູດວິສາ ມັນຜູ້ມີອຳນາດເຕັມ ແຫ່ງ ສາທາລະນະລັດ ສັງຄົມນິຍົມຫວຽດນາມ ປະຈຳສປປ ລາວ ຮ່ວມກັບທະນາຄານຫຸ້ນສ່ວນລົງທຶນ ແລະ ພັດທະນາ ໄດ້ຈັດງານລ້ຽງສະຫລອງປີໃໝ່ ທີ່ນະຄອນຫລວງວຽງຈັນ. ໂດຍເປັນກຽດເຂົ້າຮ່ວມຂອງທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ລັດຖະມົນຕີວ່າການກະຊວງສຶກສາທິການ ແລະ ກິລາ ທັງເປັນປະທານສະມາຄົມມິດຕະພາບ ລາວ–ຫວຽດ ນາມ, ມີບັນດາກົມການເມືອງ, ກຳມະການສູນກາງພັກ ແລະ ບັນດາລັດຖະມົນຕີວ່າການ–ຊ່ວຍວ່າການ, ພ້ອມດ້ວຍແຂກຖືກເຊີນເຂົ້າຮ່ວມຢ່າງຫລວງຫລາຍ.
ທ່ານ ຫງວຽນ ແມັງ ຮຸ່ງ ກ່າວວ່າ: ໃນງານລ້ຽງໃນຄ່ຳຄືນນີ້ ນອກຈາກເປັນການ ສະເຫລີມສະຫລອງສົ່ງທ້າຍປີເກົ່າ ແລະ ຕ້ອນຮັບປີໃໝ່ແລ້ວ, ຍັງເປັນການຊົມເຊີຍຜົນສຳເລັດ ການດຳເນີນກອງປະຊຸມໃຫຍ່ ຄັ້ງທີ XII ຂອງພັກກອມມູນິດຫວຽດ ນາມ ກໍຄືຜົນສຳເລັດຂອງກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ ເຊິ່ງໄດ້ນຳເອົາຄວາມຢື້ຢາມຖາມຂ່າວ ຂອງສະຫາຍເລຂາທິການໃຫຍ່ ຫງວຽນ ຟຸ ຈ້ອງ ມາຍັງບັນດາການນຳພັກ–ລັດຂອງລາວ. ທ່ານ ຫງວຽນ ແມັງ ຮຸ່ງ ໄດ້ຍົກໃຫ້ເຫັນວ່າ ໃນປີຜ່ານມາ ສະຖານທູດ ແລະ ບັນດານັກລົງທຶນຫວຽດນາມ ໄດ້ເຄື່ອນໄຫວປະຕິບັດໜ້າທີ່ ຢູ່ສປປ ລາວ ດ້ວຍຜົນສຳເລັດ ແລະ ໄດ້ຮັບການຮ່ວມມື, ອຳນວຍຄວາມສະດວກທຸກປະການຈາກລັດຖະບານ ແລະ ປະຊາຊົນລາວ. ປີໃໝ່ (ປີວອກ) 2016 ນີ້ ເປັນປີທີ່ມີຄວາມໝາຍຄວາມສຳຄັນ ທີ່ທັງສອງປະເທດ ຈະໄດ້ຜັນຂະຫຍາຍມະຕິກອງປະຊຸມໃຫຍ່ ກໍຄືແຜນພັດທະນາເສດຖະກິດ ໃນ 5 ປີຕໍ່ໜ້າໃຫ້ມີຜົນສຳເລັດໃຫຍ່ຫລວງກວ່າເກົ່າ. ສືບຕໍ່ຮັດແໜ້ນຄວາມສາມັກຄີແບບພິເສດ ແລະ ການຮ່ວມມືຢ່າງຮອບດ້ານໃຫ້ເລິ່ງເຊິ່ງກວ່າເກົ່າ.
ໃນໂອກາດດັ່ງກ່າວ, ທ່ານ ພັນຄຳ ວິພາວັນ ກໍໄດ້ສະແດງຄວາມຂອບໃຈຕໍ່ທ່ານທູດ ທີ່ໄດ້ມາຮ່ວມງານສະຫລອງປີໃໝ່ຫວຽດນາມໃນມື້ນີ້ ແລະ ໄດ້ຕາງໜ້າ ພັກ–ລັດ, ປະຊາຊົນລາວ ສົ່ງຄວາມຢ້ຽມຢາມ ຊົມເຊີຍທ່ານ ຫງວຽນ ຟຸ ຈ້ອງ, ການນຳພັກ–ລັດ ແລະ ປະຊາຊົນຫວຽດນາມອ້າຍນ້ອງ ຈົ່ງມີສຸຂະພາບເຂັ້ມແຂງ ສືບຕໍ່ພາລະກິດໃໝ່ໃຫຍ່ຫລວງກວ່າເກົ່າ ໃຫ້ມີຜົນສຳເລັດອັນຈົບງາມ, ສືບຕໍ່ເສີມຂະຫຍາຍສາຍພົວພັນອັນເປັນມູນເຊື້ອຄວາມສາມັກຄີພິເສດ ແລະ ການຮ່ວມມືຮອບດ້ານ ລະ ຫວ່າງສອງປະເທດອ້າຍນ້ອງລາວ-ຫວຽດນາມ, ຫວຽດນາມ-ລາວໃຫ້ໝັ້ນຄົງຂະໜົງແກ່ນ.
ແຫລ່ງຂ່າວ:
