ໂຄງການກໍ່ສ້າງເສັ້ນທາງດົງຄຳຊ້າງ-ຄຳສະຫວາດ-ດົງໂພສີເລີ່ມລົງມືກໍ່ສ້າງມາແຕ່ເດືອນທັນວາ 2012 ໂດຍມີມູນຄ່າກໍ່ສາງ 74 ລ້ານໂດລາມາຮອດປະຈຸບັນສຳເລັດແລ້ວ 80% ຂະນະທີ່ເຈົ້າຂອງໂຄງການຄາດຈະໃຫ້ສຳເລັດພາຍໃນກາງປີນີ້.
ທ່ານ ກ້ານ ຈັນທະລາດ ຜູ້ບໍລິຫານພາກສະໜາມຫົວໜ້າໂຄງການດັ່ງກ່າວໃຫ້ສຳພາດກັບນັກຂ່າວເສດຖະກິດ-ສັງຄົມບໍ່ດົນມານີ້ຮູ້ວ່າ: ໂຄງການແມ່ນເລີ່ມມາແຕ່ເສັ້ນທາງດົງຄຳຊ້າງ,ຄຳສະຫວາດ ແລະດົງໂພສີ ລວມຄວາມຍາວ 20,4 ກິໂລແມັດ ໂດຍພັກ-ລັດໄດ້ເຫັນດີເປັນເອກະພາບມອບໃຫ້ບໍລິສັດຄອງຊັບກໍ່ສ້າງຂົວທາງ ແລະເຄຫາສະຖານຈຳກັດລົງທຶນຮັບເໝົາກໍ່ສ້າງດ້ວຍທຶນຂອງບໍລິສັດເອງ ແລະລັດຈະ ໄດ້ຂຶ້ນແຜນຊຳລະ ພາຍຫຼັງກໍ່ສ້າງສຳເລັດພາຍໃນກຳນົດ 5 ປີ ລວມມູນຄ່າຂອງໂຄງການທັງ ໝົດ74 ລ້ານໂດລາສະຫະລັດໃນໄລຍະການ ກໍ່ສ້າງ 36 ເດືອນ ໂດຍເສັ້ນທາງຈະປູດ້ວຍເບຕົງເສີມເຫຼັກກວ້າງ 12 ແມັດ, ມີ ຮ່ອງລະບາຍນ້ຳ, ທາງຄົນຍ່າງເບື້ອງລະ 1,5 ແມັດ, ຕິດຕັ້ງເສົາໄຟສອງຟາກທາງ ແລະປ້າຍຈະລາຈອນ.
ໂຄງການດັ່ງກ່າວແມ່ນໄດ້ເລີ່ມລົງມື ກໍ່ສ້າງມາແຕ່ເດືອນທັນວາ 2012 ຮອດ ເດືອນດຽວກັນຂອງປີ 2015 ຊຶ່ງກຳນົດ 36 ເດືອນຈະໃຫ້ສຳເລັດ ສະນັ້ນສັງເກດເຫັນວ່າການປະຕິບັດແມ່ນບໍ່ສາມາດໄປຕາມແຜນທີ່ກຳນົດໄວ້ຄືຊ້າກວ່າແຜນການເນື່ອງຈາກວ່າມີຄວາມຫຍຸ້ງຍາກໃນການໄກ່ເກ່ຍປະຊາຊົນອອກ ຈາກແລວທາງ ລວມໄປເຖິງບັນຫາຕາມ ເສັ້ນທາງຕ່າງໆທີ່ເຮັດໃຫ້ໂຄງການພົບ ຄວາມຫຍຸ້ງຍາກ, ເຖິງແນວໃດກໍຕາມ ທາງບໍລິສັດ ກໍຍັງໄດ້ສຸມໃສ່ວຽກງານ ດັ່ງກ່າວ ຊຶ່ງເຮັດໃຫ້ມີບາງໜ້າວຽກສຳ ເລັດແລ້ວເປັນຕົ້ນແມ່ນແຕ້ມປ້າຍ, ທາສີ ທາງ, ຕິດຕັ້ງເສົາໄຟ ແລະວຽກອະນາໄມ ມາຮອດປະຈຸບັນເສັ້ນທາງດັ່ງກ່າວຖືວ່າ ຄືບໜ້າ 80% ຊຶ່ງດຽວນີ້ກໍກຳລັງສຸມໃສ່ ໜ້າວຽກທໍ່ລະບາຍນ້ຳຕາມເສັ້ນທາງ, ໄກ່ເກ່ຍສິ່ງກີດຂວາງ, ບຸກເບີກແລວທາງ ຖົມດິນຍົກລະດັບກໍ່ສ້າງຊັ້ນໂຄງສ້າງ ທາງເທເບຕົງ ແລະຕິດຕັ້ງເສົາໄຟເຍືອງ ທາງແມ່ນຈະໃຫ້ສຳເລັດສົມບູນເດືອນມິ ຖຸນາ 2016 ທີ່ຈະມາເຖິງນີ້.
ທ່ານ ກ້ານ ຈັນທະລາດ ຍັງຝາກເຖິງ ພໍ່ແມ່ປະຊາຊົນ ແລະຜູ້ສັນຈອນຕາມເສັ້ນ ທາງໃຫ້ມີຄວາມຮ່ວມມື ແລະເປັນຫູເປັນ ຕາຊ່ວຍກັນໃນການກໍ່ສ້າງ ເພື່ອເປັນການເຮັດໃຫ້ອະນາຄົດໄດ້ນຳໃຊ້ເສັ້ນທາງທີ່ດີ ຊຶ່ງທາງໂຄງການພວກເຮົາ ສັນຍາວ່າຈະກໍ່ສ້າງໃຫ້ສຳເລັດພາຍໃນເດືອນມິຖຸນາ 2016 ນີ້.
ທີ່ມາ: