ສຳນັກ​ຂ່າ​ວຣອຍ​ເຕີ​ລາຍ​ງານ​ຈາກ​ນະຄອນຫຼວງ​ນິວ​ເດ​ລີຂອງ​ອິນ​ເດຍ​ໃນ​ທ້າ​ຍອາທິດ​ທີ່​ຜ່ານ​ມາ​ວ່າ ທາງ​ການ​ອິນ​ເດຍ​ເປີດ​ເຜີຍ​ລາຍ​ຊື່ 20 ​ເມືອງ​ຂອງ​ປະ​ເທດ​ທີ່​ຈະ​ມີ​ລະບົບ​ໄຟຟ້າ, ນ້ຳ​ປະປາ, ອະນາ​​ໄມ ​ແລະ ການ​ຂົນສົ່ງ​ສາທາລະນະ​ທີ່​ທັນ​ສະ​ໄໝ ​ໃນ​ໂຄງການ​ປັບປຸງມີ​ມູນ​ຄ່າ 7,5 ຕື້​ໂດ​ລາ​ສະຫະລັດ ​ເພື່ອ​ປ່ຽນ​​ແປງ​ໃຫ້​ກາຍ​ເປັນ​ເມືອງ​ອັດສະລິຍະ ມີ​ມາດ​ຕະຖານ​ການ​ດຳລົງ​ຊີວິດ​ທຽບ​ເທົ່າ​ກັບ​ເອີຣົບ, ຊຶ່ງ​ທ່ານ ນະ​ເຣນທຣາ ​ໂມ​ດີ ນາຍົກລັດຖະ ມົນຕີຂອງອິນ​ເດຍປະກາດ​ຈະ​ສ້າ​ງ​ເມືອງ​ອັດສະລິຍະ​ໃໝ່​ໃຫ້​ໄດ້ 100 ​ເມືອງ​ທົ່ວ​ປະ​ເທດ​ພາຍ​ໃນ​ປີ 2022 ​ໂດຍ​ການ​ບໍລິຫານ​ປົກຄອງ​ເມືອງ​ເຫຼົ່າ​ນີ້ ຈະ​ເຊື່ອມ​ຕໍ່​ເຖິງ​ກັນ​ດ້ວຍ​ລະບົບ​ອິນ​ເຕີ​ເນັດ, ມີ​ສາທາລະ​ນູປະ​ໂພ​ກ​ໄດ້​ມາດຕະຖານ​ເຊັ່ນ​ການ​ບໍລິຫານ​ຈັດການ​ຂີ້​ເຫຍື້ອ ​ແລະ ລະບົບ​ການ​ຂົ່ນສົ່ງ​ສາທາລະນະ​ທີ່​ມີ​ປະສິດທິພາບ, ຊຶ່ງ​ແຜນການ​ຂອງ​ລັດຖະບານ​ຍັງ​ລວມ​ເຖິງ ການ​ກະ​ຕຸ້ນ​ການ​ລົງທຶນ ​ແລະ ສ້າງ​ວຽກ​ເຮັດ​ໃຫ້​ແກ່​ປະຊາຊົນ​ຫຼາຍ​ລ້ານ​ຄົນ.

ທ່ານ ​ເວນ​ໂຄ​ອາ ​ໄນ​ດູ ລັດຖະມົນຕີ​ວ່າການ​ກະຊວງ​ພັດທະນາ​ຊຸມ​ຊົນ​ເມືອງ​ອິນ​ເດຍປະກາດ​ລາຍ​ຊື່ 20 ​ເມືອງ​ທີ່​ເປັນ​ເປົ້າ​ໝາຍ​ປ່ຽນ​​ແປງ​ໃນ​ຈຳນວນ​ນີ້​ລວມມີ​ເມືອງ​ເຈນ​ໄນທາງ​ພາກ​ໃຕ້ ຊຶ່ງ​ໄດ້​ຮັບ​ຄວາມ​ເສຍ​ຫາຍ​ຈາກ​ນ້ຳ​ຖ້ວມ ​ແລະ ບາງ​ສ່ວນ​ຂອງນະຄອນຫຼວງ​ນິວ​ເດ​ລີ ສ່ວນ​ເມືອງ​ອື່ນໆ​ເປັນ​ຈຸດໝາຍ​ຂອງ​ນັກ​ທ່ອງ​ທ່ຽວ​ເຊັ່ນ​ເມືອງ​ໄຊ​ຍະ​ປຸຣະ, ​ເມືອງ​ອຸ​ໄທ​ປຸຣະ ​ແລະ ​ເມືອງ​ພູບາ​ເນ​ສະ​ວາ​ທາງ​ພາກ​ຕາ​ເວັນ​ອອກ ຊຶ່ງ​ຈະ​ມີ​ປະຊາ​ຊົນ​ປະມານ 35 ລ້ານ​ຄົນ​ອາ​ໄສ​ຢູ່​ໃນ 20 ​ເມືອງ​ຂອງ​ອິນ​ເດຍທີ່​ລັດຖະບານ​ຈະ​ປ່ຽນ​ແປງ​ໃຫ້​ເປັນ​ເມືອງ​ອັດສະລິຍະ.

ທີ່ມາ: