ສຳນັກຂ່າວຕ່າງປະເທດ ລາຍງານໃນວັນທີ 29 ມັງກອນນີ້ວ່າ ມີນັກທ່ອງທ່ຽວປະມານ 10,000 ຄົນ ເດີນທາງຂຶ້ນພູ ເພື່ອທ່ຽວຊົມປະກົດການຫິມະຕົກ ຢູ່ເມືອງຊາປາ ແຂວງລາວກາຍ (Lao Cai) ເມື່ອບໍ່ດົນມານີ້ ຫລັງຈາກທີ່ອາກາດໜາວເຢັນ ແລະ ຫິມະ ໄດ້ປົກຄຸມພື້ນທີ່ 3 ແຂວງທາງພາກເໜືອຂອງຫວຽດນາມ, ແນວໃດກໍຕາມ ກະຊວງກະສິກຳ ແລະ ພັດທະນາຊົນນະບົດຫວຽດນາມ ໄດ້ລາຍງານວ່າ ສະພາບອາກາດດັ່ງກ່າວ ໄດ້ເຮັດໃຫ້ງົວ ແລະ ຄວາຍຂອງປະຊາຊົນ ຕາຍຫລາຍກວ່າ 3,900ໂຕ ຊຶ່ງເສຍຫາຍຫລາຍທີ່ສຸດ ແມ່ນຢູ່ແຂວງເຊີນລາ (Son La) ຖັດລົງມາແມ່ນແຂວງລັງເຊີນ (Lang Son) ແລະ ແຂວງດຽນບຽນ (Dien Bien) ຕາມລຳດັບ.
ນອກຈາກນັ້ນ, ຫິມະທີ່ປົກຄຸມພື້ນທີ່ດັ່ງກ່າວ ຍັງເຮັດໃຫ້ຕົ້ນໄມ້ລົ້ມຕາຍ ເປັນເນື້ອທີ່ກ່ວາ 300 ເຮັກຕາ ແລະ ສວນຜັກຕ່າງໆເສຍຫາຍອີກ 70 ກ່ວາເຮັກຕາ ໃນໄລຍະເວລາ 3-4 ມື້ຜ່ານມານີ້ ລວມມູນຄ່າຄວາມເສຍຫາຍ ສູງເຖິງ 20 ຕື້ດົງ ຫລື ປະມານ 896,600 ໂດລາສະຫະລັດຯ.
ແນວໃດກໍຕາມ, ປັດຈຸບັນລັດຖະບານຫວຽດນາມ ໄດ້ສັ່ງໃຫ້ບັນດາທະນາຄານຂອງລັດ ທີ່ມີສາຂາຢູ່ 3 ແຂວງດັ່ງກ່າວ ຈັດສັນບ້ວງເງິນພິເສດ ເພື່ອໃຫ້ປະຊາຊົນກູ້ຢືມ ສຳລັບລົງທຶນປູກພືດແທນຄືນໃໝ່ແລ້ວ.
