ທສະການອາຫານລາວ ຄັ້ງທີ 11 ໄດ້ຈັດຂຶ້ນລະຫວ່າງວັນທີ 28-30 ມັງກອນ 2016 ຢູ່ສວນເຈົ້າອະນຸວົງ ນະຄອນຫຼວງວຽງຈັນ ມີທ່ານ ດຣ. ນາງ ແກ້ວສາຍໃຈ ໄຊຍະສອນ ພັນລະຍາທ່ານປະທານປະເທດ ປະທານສະມາຄົມແມ່ເຮືອນລາວ ທ່ານນາງ ຄຳເມິງ ວໍລະຈິດ ພັນລະຍາທ່ານເລຂາທິການໃຫຍ່ ຄະນະບໍລິຫານງານສູນກາງພັກ ທ່ານ ດຣ. ນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ ພ້ອມດ້ວຍຄະນະສະມາຄົມນັກທຸລະກິດແມ່ຍິງລາວ ພັນລະຍາການນຳ ນັກທຸລະກິດ ແລະ ແຂກຖືກເຊີນທັງພາຍໃນ ແລະ ຕ່າງປະເທດເຂົ້າຮ່ວມ.
ເທສະການອາຫານລາວ ຄັ້ງທີ 11 ຈັດຂຶ້ນເພື່ອເປັນການຕອບສະໜອງນະໂຍບາຍຂອງລັດຖະບານ ປະກອບສ່ວນຮອງຮັບໃຫ້ແກ່ການເຂົ້າປະຊາຄົມເສດຖະກິດອາຊຽນ (AEC) ແລະ ເພື່ອເປັນການຊົມເຊີຍຜົນສຳເລັດກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ X ຂອງພັກ ເທສະການອາຫານລາວ ໄດ້ຈັດຕັ້ງຂຶ້ນທຸກໆປີ ນັບແຕ່ປີ 2006 ເປັນຕົ້ນມາ ເຊິ່ງປີນີ້ເປັນປີທີ 11 ໂດຍຈະດຳເນີນເປັນເວລາ 3 ວັນ ເພື່ອເປີດໂອກາດໃຫ້ມວນຊົນ ແລະ ນັກທ່ອງທ່ຽວທັງພາຍໃນ ແລະ ຕ່າງປະເທດ ໄດ້ເຂົ້າຊົມຜະລິດຕະພັນລາວ ແລະ ຊີມອາຫານພື້ນເມືອງແຕ່ລະທ້ອງຖິ່ນ ນັບແຕ່ເໜືອເຖິງພາກໃຕ້ຂອງລາວເຮົາ ເຊິ່ງແຕ່ລະມື້ຈະເປີດແຕ່ເວລາ 8:00-22:00 ໂມງ ການຈັດເທສະການອາຫານລາວ ເປັນການສົ່ງເສີມຮີດຄອງປະເພນີ ວັດທະນະທຳອັນດີງາມຂອງຊາດ ທາງດ້ານອາຫານ ແລະ ການນຸ່ງຖື ເປັນການສ້າງໂອກາດໃຫ້ແມ່ຍິງ ຜູ້ປະກອບການໃນຂະແໜງການປຸງແຕ່ງອາຫານຢູ່ທ້ອງຖິ່ນທົ່ວປະເທດ ໄດ້ເຂົ້າມາຮ່ວມວາງສະແດງ ແລະ ຂາຍຜະລິດຕະພັນຂອງຕົນ ສ້າງໂອກາດໃຫ້ແມ່ຍິງໄດ້ສະແດງຄວາມສາມາດບົ່ມຊ້ອນ ຫົວຄິດປະດິດສ້າງ ແລະ ສະຕິປັນຍາຂອງຕົນໃນຂະແໜງການປຸງແຕ່ງອາຫານ ທັງມີໂອກາດແລກປ່ຽນບົດຮຽນ ປະສົບການ ເພື່ອກຽມພ້ອມໃນການເຊື່ອມໂຍງ ຮອງຮັບນັກທ່ອງທ່ຽວ ແລະ ຜູ້ບໍລິໂພກໃນບັນດາປະເທດອາຊຽນ ແລະ ທົ່ວໂລກໃຫ້ຮູ້ອາຫານລາວ.
ເທສະການອາຫານລາວຄັ້ງນີ້ ມີຮ້ານວາງສະແດງ ແລະ ຂາຍອາຫານ ເຄື່ອງດື່ມ ຢາສະໜູນໄພ ເຄື່ອງຫັດຖະກຳຈາກພາຍໃນ ແລະ ຕ່າງປະເທດເຂົ້າຮ່ວມ 160 ຮ້ານ ທຽບໃສ່ປີຜ່ານມາ ເພີ່ມຂຶ້ນ 40 ຮ້ານ ໃນນີ້ 52 ຮ້ານແມ່ນມາຈາກ 10 ແຂວງ 90 ຮ້ານມາຈາກທ້ອງຖິ່ນ ແລະ ເມືອງຕ່າງໆໃນນະຄອນຫຼວງວຽງຈັນ ແລະ 13 ຮ້ານມາຈາກປະເທດສະມາຊິກອາຊຽນ.
ແຫລ່ງຂ່າວ:
