ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງທ່ານນາງ ເລັດໂນ ມາຊູດີ ລັດຖະມົນຕີວ່າການກະຊວງການຕ່າງປະເທດ ສ ອິນໂດເນເຊຍ ພ້ອມຄະນະ ວັນທີ 28 ມັງກອນ 2016 ທີ່ຫ້ອງວ່າການລັດຖະບານ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ລະຫວ່າງວັນທີ 27-28 ມັງກອນນີ້ ເພື່ອເສີມຂະຫຍາຍສາຍພົວພັນຮ່ວມມືສອງຊາດ ລາວ-ອິນໂດເນເຊຍ ໃຫ້ນັບມື້ມີບາດກ້າວຂະຫຍາຍຕົວຍິ່ງຂຶ້ນ.
ໂອກາດດັ່ງກ່າວ ທ່ານນາຍົກລັດຖະມົນຕີ ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງສະແດງຄວາມຍ້ອງຍໍຊົມເຊີຍຕໍ່ການເດີນທາງມາຢ້ຽມຢາມ ແລະ ເຮັດວຽກຄັ້ງນີ້ຂອງທ່ານລັດຖະມົນຕີຕ່າງປະເທດ ອິນໂດເນເຊຍ ຖືເປັນການປະກອບສ່ວນສຳຄັນ ເພື່ອເສີມສ້າງສາຍພົວພັນຮ່ວມມືສອງຊາດ ລາວ-ອິນໂດເນເຊຍ ໃຫ້ນັບມື້ເຂັ້ມແຂງ ໂດຍສະເພາະແມ່ນ ການຮ່ວມມືສອງຝ່າຍດ້ານວຽກງານຕ່າງປະເທດ ເຊິ່ງຕະຫຼອດໄລຍະຫຼາຍສິບປີຜ່ານມາ ລັດຖະບານລາວ ແລະ ອິນໂດເນເຊຍ ໄດ້ໃຫ້ການຊ່ວຍເຫຼືອກັນ ແລະ ກັນຢ່າງເປັນປົກກະຕິຕໍ່ເນື່ອງ ພ້ອມກັນຍົກສູງຂີດຄວາມສາມາດໃນການແລກປ່ຽນຂໍ້ມູນຂ່າວສານ ລວມທັງການຜັດປ່ຽນການຢ້ຽມຢາມຂອງປະມຸກລັດ ເຊິ່ງນັ້ນໄດ້ເຮັດໃຫ້ສອງຊາດ ລາວ-ອິນໂດເນເຊຍ ມີຄວາມເຂົ້າໃຈເຖິງວິຖີຊີວິດ ວັດທະນະທຳ ຮີດຄອງປະເພນີອັນດີງາມ ຕະຫຼອດຮອດສະພາບການພັດທະນາເສດຖະກິດ-ສັງຄົມຂອງອີກຝ່າຍຢ່າງ ເລິກເຊິ່ງ.
ຕອນທ້າຍ ທ່ານລັດຖະມົນຕີຕ່າງປະເທດອິນໂດເນເຊຍ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງສະແດງຄວາມຊົມເຊີຍຕໍ່ຜົນສຳເລັດ ໃນການຈັດຕັ້ງປະຕິບັດວຽກງານພັດທະນາເສດຖະກິດ-ສັງຄົມ ກໍ່ຄືຜົນສຳເລັດອັນໃຫຍ່ຫຼວງຂອງພັກ-ລັດຖະບານ ຕະຫຼອດຮອດປະຊາຊົນລາວບັນດາເຜົ່າ ທີ່ໄດ້ປະກອບສ່ວນຢ່າງຕັ້ງໜ້າຈັດຕັ້ງດຳເນີນກອງປະຊຸມໃຫຍ່ຜູ້ແທນທົ່ວ ປະເທດ ຄັ້ງທີ X ຂອງພັກປະຊາຊົນປະຕິວັດລາວ ໃຫ້ປະສົບຜົນສຳເລັດຢ່າງຈົບງາມ.
ແຫລ່ງຂ່າວ:
