ສຳນັກຂ່າວຕ່າງປະເທດ ລາຍງານໃນວັນທີ 27 ມັງກອນນີ້ວ່າ ເຈົ້າໜ້າທີ່ມາເລເຊຍ ກຳລັງເລັ່ງຊອກຫາຜູ້ລອດຊີວິດ ຫລັງຈາກເກີດເຫດເຮືອຜູ້ອົບພະຍົບຫລົ້ມ ນອກຊາຍຝັ່ງລັດຍະໂຮ ທາງພາກໃຕ້ຂອງປະເທດ ຂະນະທີ່ພົບສົບຜູ້ເສຍຊີວິດແລ້ວ 13 ສົບ ຖືກຄື້ນນ້ຳທະເລ ພັດເຂົ້າມາຄ້າງຢູ່ຊາຍຫາດ ໃນຕອນເຊົ້າຂອງວັນອັງຄານທີ 26 ມັງກອນຜ່ານມາ ໂດຍຄາດວ່າ ອາດແມ່ນຜູ້ອົບພະຍົບຜິດກົດໝາຍ ມາຈາກປະເທດອິນໂດເນເຊຍ ເນື່ອງຈາກພົບບັດປະຈຳຕົວປະຊາຊົນ ສັນຊາດອິນໂດເນເຊຍ ໃນຮ່າງຂອງຜູ້ເສຍຊີວິດ.
ເຈົ້າໜ້າທີ່ຕຳຫລວດມາເລເຊຍເຊື່ອວ່າ ເຮືອທີ່ປະສົບເຫດ ອາດມີຜູ້ໂດຍສານປະມານ 35 ຄົນ ຂະນະທີ່ປະຕິບັດການ ຄົ້ນຫາຜູ້ລອດຊີວິດ ກຳລັງດຳເນີນການຢູ່.