ຂປລ. ໃນຕອນເຊົ້າຂອງວັນທີ 25 ມັງກອນນີ້, ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ໃຫ້ກຽດຕ້ອນຮັບທ່ານ ຈອນ ເຄຣີ ລັດຖະມົນຕີວ່າການ ກະຊວງການຕ່າງປະເທດ ສະຫະລັດອາເມຣິກາ ພ້ອມດ້ວຍຄະນະ ໃນໂອກາດ ທີ່ເດີນທາງມາຢ້ຽມຢາມ ສປປ ລາວ ຢ່າງເປັນທາງການ ໃນວັນທີ 24-25 ມັງກອນ 2016.
ທ່ານ ທອງສິງ ທຳມະວົງ ນາຍົກລັດຖະມົນຕີ ໄດ້ສະແດງຄວາມຊົມເຊີຍ ແລະ ຍິນດີຕ້ອນ ຮັບທ່ານ ຈອນ ເຄຣີ ແລະ ຄະນະ ທີ່ໄດ້ເດີນທາງມາຢ້ຽມສປປ ລາວ ໃນຄັ້ງນີ້ ເຊິ່ງເປັນການປະກອບສ່ວນສຳຄັນ ເຂົ້າໃນການ ເສີມຂະຫຍາຍ ການພົວພັນຮ່ວມມື ລະຫວ່າງສອງປະເທດ ລາວ–ອາເມຣິກາ ໃຫ້ນັບມື້ດີຂຶ້ນ.
ທ່ານ ຈອນ ເຄຣີ ກໍໄດ້ສະແດງຄວາມຂອບໃຈຕໍ່ທ່ານ ທອງສິງ ທຳມະວົງ ກໍຄື ລັດຖະບານລາວ ທີ່ໄດ້ ສະຫລະເວລາອັນມີຄ່າໃຫ້ການຕ້ອນຮັບອັນອົບອຸ່ນ, ພ້ອມທັງແຈ້ງໃຫ້ຊາບເຖິງຈຸດປະສົງ ໃນການຢ້ຽມຢາມ ລາວ ຄັ້ງນີ້ ແລະ ເຊື່ອໝັ້ນວ່າ ລັດຖະບານສອງປະເທດ ອາເມລິກາ–ລາວ ຈະເພີ່ມທະວີການພົວພັນຮ່ວມ ມືໃຫ້ດີຂຶ້ນກວ່າເກົ່າ.
ແຫລ່ງຂ່າວ:
