ກອງປະຊຸມລັດຖະມົນຕີການທ່ອງທ່ຽວກຸ່ມອາຊຽນຢູ່ທີ່ນະຄອນຫຼວງມະນີລາ ເປີດເຜີຍແຜນການ 10 ປີສົ່ງເສີມການທ່ອງທ່ຽວ ເນັ້ນໃຫ້ຕະຫຼາດພາກພື້ນເປັນຈຸດໝາຍດຽວກັນ.
ລັດຖະມົນຕີວ່າການກະຊວງການທ່ອງທ່ຽວຂອງສະມາຄົມປະຊາຊາດອາຊີຕາເວັນອອກສຽງໃຕ້(ອາຊຽນ)ເປີດເຜີຍແຜນການ 10 ປີ ໃນລະຫວ່າງກອງປະຊຸມຢູ່ທີ່ມະນິລາໃນທ້າຍອາທິດທີ່ຜ່ານມາວ່າ ເພື່ອເຮັດໃຫ້ຕະຫຼາດໃນພາກພື້ນເປັນຈຸດໝາຍການທ່ອງທ່ຽວດຽວກັນ ແລະ ວາງເປົ້າໝາຍໃຫ້ຂະແໜງການທ່ອງທ່ຽວຄອງສ່ວນແບ່ງເສດຖະກິດພາກພື້ນເພີ່ມຂຶ້ນເປັນ 15% ພາຍໃນປີ 2034, ຊຶ່ງລັດຖະມົນຕີຈາກ 10 ປະເທດອາຊຽນຍັງປະກາດຈະເລີ່ມແຜນຂົນຂວາຍ“Visit ASEAN(at)50” ເພື່ອສະເຫຼີມສະຫຼອງຄົບຮອບ 50 ປີການກໍ່ຕັ້ງກຸ່ມອາຊຽນໃນປີໜ້າ, ຊຶ່ງການທ່ອງທ່ຽວຄອງສ່ວນແບ່ງ 12,3% ຂອງຈີດີພີລວມກັນໃນອາຊຽນໃນປີ 2013 ໂດຍມີນັກທ່ອງທ່ຽວມາຢ້ຽມຢາມລວມທັງໝົດ 102,2 ລ້ານຄົນ ແລະ ເພີ່ມຂຶ້ນ 105 ລ້ານຄົນໃນປີ 2014. ທ່ານຣາມອນ ຈິເມເນຊ ຈູເນີຍ ລັດຖະມົນຕີວ່າການກະຊວງການທ່ອງທ່ຽວຟິລິບປິນຄາດວ່າ ພາຍໃນປີ 2030 ອາຊຽນຈະຄອງສ່ວນແບ່ງ 25% ຂອງນັກທ່ອງທ່ຽວໄປຢ້ຽມຢາມຈຸດໝາຍປາຍທາງຕ່າງໆທົ່ວໂລກ 1,8 ຕື້ຄົນ ແລະ ການມີວີຊາຮ່ວມກັນຂອງອາຊຽນອາດກາຍເປັນຈິງພາຍໃນ 5 ປີຕໍ່ໜ້າ.
ແຜນການການທ່ອງທ່ຽວ 10 ປີ ຮຽກຮ້ອງໃຫ້ມີການສົ່ງເສີມ ແລະ ການຕະຫຼາດ, ສ້າງຜະລິດຕະພັນການທ່ອງທ່ຽວໃຫ້ມີຄວາມຫຼາກຫຼາຍລວມທັງການດຶງດູດການລົງທຶນດ້ານການທ່ອງທ່ຽວ, ການສົ່ງເສີມລະບົບຮັບຮອງມາດຕະຖານການທ່ອງທ່ຽວຂອງອາຊຽນ, ການຂະຫຍາຍການເຊື່ອມຕໍ່ ແລະ ສາທາລະນູປະໂພກ ແລະ ເພີ່ມການມີສ່ວນຮ່ວມຂອງຊຸມຊົນທ້ອງຖິ່ນໃນການທ່ອງທ່ຽວ, ຖ້າຫາໂຄງການຕ່າງໆດຳເນີນການເຕັມຮູບແບບ ຄາດວ່າ ສ່ວນແບ່ງການທ່ອງທ່ຽວຕໍ່ການຈ້າງວຽກເຮັດທັງໝົດຈະເພີ່ມຂຶ້ນ 3,7% ເປັນ 7% ພາຍໃນປີ 2025 ແລະ ການໃຊ້ຈ່າຍຕໍ່ຫົວຄົນຂອງນັກທ່ອງທ່ຽວນານາຊາດຈະເພີ່ມຈາກ 877 ໂດລາສະຫະລັດເປັນ 1.500 ໂດລາຕໍ່ນັກທ່ອງທ່ຽວ ຄາດວ່າຈະເພີ່ມຂຶ້ນເປັນ 152 ລ້ານຄົນໃນປີ 2025.