ຂປລ. ໃນວັນທີ 23 ມັງກອນນີ້ ຢູ່ ຫໍວັດທະນະທໍາແຫ່ງຊາດ ຄະນະພັກ, ອົງການປົກຄອງ ແລະ ຊາວນະ ຄອນຫລວງວຽງຈັນ, ໄດ້ຕາງໜ້າປະຊາຊົນລາວໃນທົ່ວປະເທດ ມີຄວາມພາກພູມໃຈ ແລະ ຖືເປັນກຽດຢ່າງສູງ ທີ່ໄດ້ຈັດພິທີໂຮມຊຸມນຸມຊົມເຊີຍຜົນສໍາເລັດ ຂອງກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກປະຊາຊົນປະຕິວັດລາວ ໂດຍການໃຫ້ກຽດເຂົ້າຮ່ວມຂອງ ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວ, ມີບັນດາສະຫາຍກໍາມະການກົມການເມືອງສູນກາງພັກ, ກໍາມະການສູນກາງພັກ ແລະ ຊາວນະຄອນຫລວງວຽງຈັນ ເຂົ້າຮ່ວມ.
ໃນໂອກາດນີ້ ສະຫາຍ ສິນລະວົງ ຄຸດໄພທູນ ກໍາມະການກົມການເມືອງສູນກາງພັກ. ເລຂາຄະນະພັກ, ເຈົ້າຄອງນະຄອນຫລວງວຽງຈັນ ກ່າວວ່າ: ກອງປະຊຸມໃຫຍ່ຜູ້ແທນທົ່ວປະເທດຂອງພັກປະຊາຊົນປະຕິວັດລາວໃນຄັ້ງນີ້ ກໍແມ່ນເຫດການ-ການເມືອງໜຶ່ງທີ່ສໍາຄັນ ແລະ ເປັນກຽດປະຫວັດໜຶ່ງ ໃນຂະບວນວິວັດແຫ່ງການກໍາເນີດ, ເຕີບໃຫຍ່ ແລະ ການຂະຫຍາຍຕົວຂອງພັກເຮົາຕະຫລອດໄລຍະ 60 ປີ ຜ່ານມາ ທັງຍັງເປັນບາດລ້ຽວສໍາຄັນແຫ່ງການກ້າວເດີນຂອງປະເທດຊາດ ແລະ ປະຊາຊົນລາວເຮົາໃນໄລຍະໃໝ່, ເຊິ່ງກອງປະຊຸມໃຫຍ່ ໄດ້ຕີລາຄາຢ່າງພາວະວິໄສ ເຖິງການຜັນຂະຫຍາຍ ແລະ ຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IX ຂອງພັກ ເຊິ່ງໃນຕະຫລອດໄລຍະ 5 ປີຜ່ານມາສາມາດຍາດໄດ້ຜົນສໍາເລັດທີ່ໜ້າພາກພູມໃຈໃນຫລາຍດ້ານ ອັນສໍາຄັນ ແລະ ເປັນພື້ນຖານ ແມ່ນອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ໄດ້ຮັບການປົກປັກຮັກສາໄວ້ໄດ້ຢ່າງໝັ້ນຄົງ, ສະຖຽນລະພາບທາງດ້ານການເມືອງມີຄວາມໜັກແໜ້ນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ, ເສດຖະກິດຂະຫຍາຍຕົວຈັງຫວະໄວຕໍ່ເນື່ອງ ແລະ ໝັ້ນທ່ຽງ ສະເລ່ຍໃນ 5 ປີ ບັນລຸ 7,9% ລາຍໄດ້ສະເລຍຕໍ່ຫົວຄົນບັນລຸ 1.970 ໂດລາສະຫະລັດ, ສາມາດບັນລຸແກ້ໄຂຄວາມທຸກຍາກຂອງປະຊາຊົນຫລຸດລົງ ຍັງເຫລືອພຽງແຕ່ 5% ກວ່າເທົ່ານັ້ນ. ພັກເຮົາຢຶດໝັ້ນການພັດທະນາເສດຖະກິດເປັນໃຈກາງ ຕິດພັນກັບການພັດທະນາສັງຄົມ ແລະ ການປົກປັກຮັກສາສິ່ງແວດລ້ອມໄປຕາມທິດພັດທະນາແບບຍືນໂຍງ, ດໍາເນີນນະໂຍບາຍສົ່ງເສີມກໍາລັງແຮງຂອງທຸກພາກ ສ່ວນເສດຖະກິດ ເຂົ້າໃນການພັດທະນາເສດຖະກິດ-ສັງຄົມຢ່າງແຂງແຮງ, ການຫັນເປັນອຸດສາຫະກໍາ ແລະ ທັນສະ ໄໝເປັນຕົ້ນ ແມ່ນໂຄງການພັດທະນາດ້ານໄຟຟ້າພະລັງນ້ຳ, ບໍ່ແຮ່, ຄົມມະນາຄົມ, ອຸດສາຫະກໍາປຸງແຕ່ງ ໄດ້ເປັນຕົນເປັນຕົວຂຶ້ນ, ພ້ອມກັນນັ້ນ ກໍຊຸກຍູ້ຂົງເຂດບໍລິການການເງິນ-ການທະນາຄານ, ໂທລະຄົມມະນາຄົມ, ເຂດເສດຖະກິດພິເສດ, ເຂດເສດຖະກິດສະເພາະ ແລະ ຕະຫລາດຫລັກຊັບ ໃຫ້ມີການຂະຫຍາຍຕົວໄວໄປຕາມທິດທັນສະໄໝເຊິ່ງໄດ້ປະ ກອບສ່ວນສໍາຄັນເຂົ້າໃນການຫັນປ່ຽນໂຄງປະກອບເສດຖະກິດ ແລະ ຊ່ວຍຊຸກຍູ້ຈັງຫວະການເຕີບໂຕຂອງເສດຖະກິດໃຫ້ຕໍ່ເນື່ອງ.
ຜົນສຳເລັດດັ່ງກ່າວ, ບັນຫາສຳຄັນແມ່ນຍ້ອນພັກເຮົາ ບໍ່ພຽງແຕ່ວາງແນວທາງທີ່ຖືກຕ້ອງ, ຫາກຍັງໄດ້ຊີ້ບອກເຖິງຄວາມສາມາດຊີ້ນຳນຳພາໃນການຈັດຕັ້ງປະຕິບັດແນວທາງ, ແຜນນະໂຍບາຍດ້ວຍການປະສານສົມທົບຢ່າງກົມກຽວ ລະຫວ່າງການພັດທະນາເສດຖະກິດ-ສັງຄົມ ກັບວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການຕ່າງປະເທດ, ເຊິ່ງສ້າງສະພາບແວດລ້ອມທີ່ເອື້ອອຳນວຍ ໃຫ້ແກ່ການທຳມາຫາກິນຂອງປະຊາຊົນລາວບັນດາເຜົ່າ, ສ້າງຄວາມເຊື່ອໝັ້ນໃຫ້ນັກລົງທຶນ, ຜູ້ປະກອບການທັງພາຍໃນ ແລະ ຕ່າງປະເທດ, ຮັບປະກັນໃຫ້ການຈັດຕັ້ງປະຕິບັດແນວທາງປ່ຽນແປງໃໝ່ ກໍຄືການເຊື່ອມໂຍງກັບພາກພື້ນ ແລະ ສາກົນໄດ້ຢ່າງເປັນເຈົ້າການ.
ທີ່ມາ
