ສຳນັກຂ່າວຕ່າງປະເທດ ລາຍງານໃນວັນທີ 22 ມັງກອນນີ້ວ່າ ກອງກຳລັງພັນທະມິດ ຊຶ່ງນຳໂດຍສະຫະລັດອາເມຣິກາ ໄດ້ທຳການສັງຫານ ນັກຮົບກຸ່ມລັດອິດສະລາມ ຫລື ໄອເອັສ ປະມານ 22,000 ຄົນ ນັບຕັ້ງແຕ່ເລີ່ມປະຕິບັດການໂຈມຕີ ແຕ່ກາງປີ 2014 ເປັນຕົ້ນມາ ຢູ່ດິນແດນຂອງປະເທດອີຣັກ ແລະ ຊີຣີ ຊຶ່ງໂຕເລກດັ່ງກ່າວນີ້ ແມ່ນເປັນພຽງຕົວເລກຄາດປະມານເທົ່ານັ້ນ.

ທັງນີ້ ປະຕິບັດການໂຈມຕີກຸ່ມລັດອິດສະລາມ ຫລື ໄອເອັສ ຂອງກຸ່ມພັນທະມິດຊາດຕາວັນຕົກດັ່ງກ່າວ ແມ່ນໄດ້ເລີ່ມມາ ຕັ້ງແຕ່ກາງປີ 2014 ແລະ ໄດ້ມີການຍົກລະດັບໂຈມຕີ ຂຶ້ນສູ່ລະດັບຮຸນແຮງຫລາຍຂຶ້ນ ຫລັງຈາກທີ່ເກີດເຫດການ ໂຈມຕີນະຄອນຫລວງປາຣີ ປະເທດຝຣັ່ງ ເມື່ອເດືອນພະຈິກ 2015 ຜ່ານມາ ຊຶ່ງເປົ້າໝາຍຫລັກຂອງການໂຈມຕີ ແມ່ນແນໃສ່ແຫລ່ງຜະລິດນ້ຳມັນຂອງກຸ່ມໄອເອສ ຊຶ່ງເປັນແຫລ່ງລາຍຮັບຕົ້ນຕໍ ຂອງກຸ່ມດັ່ງກ່າວນີ້.