ສະຫາຍ ວິດົງ ໄຊຍະສອນ ເລຂາພັກແຂວງ, ເຈົ້າແຂວງວຽງຈັນ ໄດ້ນຳສະເໜີ ຜົນສຳເລັດແຫ່ງການພັດທະນາເສດຖະກິດ-ສັງຄົມຂອງແຂວງວຽງຈັນ ຕໍ່ກອງປະຊຸມໃຫຍ່ຄັ້ງທີ X ຂອງພັກ, ຊຶ່ງພວມດຳເນີນຢູ່ໃນປັດຈຸບັນນີ້, ຕະຫລອດໄລຍະ 5 ປີຜ່ານມາ ພາຍໃຕ້ແສງສະຫວ່າງ ມະຕິ 9 ຂອງພັກ, ກໍຄືແນວທາງປ່ຽນແປງໃໝ່ຂອງພັກເຮົາ, ແຂວງວຽງຈັນ ຍາດໄດ້ຜົນສຳເລັດຫລາຍດ້ານຄື: ໃນສົກປີ 2014-2015 ຜ່ານມານີ້, ແຂວງສາມາດຮັກສາລະດັບການຂະຫຍາຍຕົວທາງເສດຖະກິດຢ່າງຕໍ່ເນື່ອງ, ລວມຍອດຜະລິດຕະພັນພາຍໃນບັນລຸໄດ້ 5ພັນຕື້ກວ່າກີບ, ສະເລ່ຍ ພົນລະເມືອງຜູ້ໜຶ່ງມີລາຍຮັບ 1.435 ໂດລາສະຫະລັດຕໍ່ປີ, ໃນນັ້ນຂະແໜງການ ກະສິກຳ-ປ່າໄມ້ ກວມເອົາ 41%, ອຸດສາ ຫະກຳ ກວມເອົາ 29,88% ແລະການບໍລິການ ກວມເອົາ 29,20%, ການລົງທຶນພາຍໃນມີມູນຄ່າສູງເຖິງ ບັນລຸ 1.084 ຕື້ກີບ, ເທົ່າກັບ 96% ຂອງແຜນການ, ຜະລິດເຂົ້າເປືອກໄດ້ເກືອບ 3 ແສນໂຕນ ສະເລ່ຍ ພົນລະເມືອງຜູ້ໜຶ່ງໄດ້ຮັບ 656 ກິໂລ/ປີ, ການຜະລິດສິນຄ້າມີການຂະຫຍາຍຕົວຄື: ສົກປີຜ່ານມານີ້, ການສົ່ງອອກສິນຄ້າຂອງແຂວງບັນລຸໄດ້ 34,48 ລ້ານໂດລາສະຫະລັດ, ລາຍຮັບງົບປະມານ ປະຕິບັດໄດ້ລື່ນແຜນການ 25%, ການກໍ່ສ້າງພື້ນຖານໂຄງລ່າງໄດ້ຮັບການເອົາໃຈໃສ່, ຊຶ່ງມາຮອດປັດຈຸບັນ ທຸກໆບ້ານໃນແຂວງວຽງຈັນ ໄດ້ມີເສັ້ນທາງເຂົ້າໄປເຖິງ ແລະ ສາມາດທຽວໄດ້ສອງລະດູກວມເອົາ 95%, ທຸກໆບ້ານໄດ້ຊົມໃຊ້ໄຟຟ້າກວມ 100% ແລະ ປະມານ 96,42% ຂອງຈຳນວນຫລັງຄາເຮືອນໄດ້ຊົມໃຊ້ໄຟຟ້າຖາວອນ, ການໂທລະຄົມ-ສື່ສານ, ມີສັນຍານ ກວມເອົາ 85% ຂອງຈໍານວນບ້ານ ແລະ ມີຜູ້ຊົມໃຊ້ໂທລະສັບທັງໝົດ 80 ເລກໝາຍຕໍ່ 100 ຄົນ, ໄດ້ນຳໃຊ້ນ້ຳປະປາແລ້ວ 8 ເມືອງ ກວມ 73% ແລະ ອັນພົ້ນເດັ່ນຢູ່ແຂວງວຽງຈັນ ມີຜູ້ປະກອບການໄດ້ຮັບໃບອະນຸຍາດນຳໃຊ້ເຄື່ອງໝາຍສິນຄ້າ ໂອດອບ (ODOP) ແຫ່ງຊາດ ຈາກກົມສົ່ງເສີມ ແລະ ພັດທະນາສິນຄ້າ ກະຊວງອຸດສາຫະກຳ ແລະ ການຄ້າ ເປັນອັນດັບທີ 3 ຂອງປະເທດ.
ສະຫາຍເລຂາພັກແຂວງວຽງຈັນ ໃຫ້ຮູ້ອີກວ່າ: ການພັດທະນາດ້ານວັດທະນະທຳ-ສັງຄົມຂອງແຂວງແມ່ນໄດ້ສຸມໃສ່ຈັດຕັ້ງປະຕິບັດຕາມ 3 ຂໍ້ແຂ່ງຂັນ ແລະ 4 ໂຄງການບູລິມະສິດຂອງລັດຖະ ບານ, ຄຸນນະພາບການສຶກສາໄດ້ຮັບການປຸກລະດົມ, ພ້ອມທັງຂະຫຍາຍໂຮງຮຽນສາມັນໄປສູ່ຊົນນະບົດໄດ້ຢ່າງທົ່ວເຖິງ, ຕາໜ່າງສາທາລະນະສຸກໄດ້ຂະຫຍາຍໄປທ້ອງຖິ່ນຮາກຖານໄດ້ຢ່າງທົ່ວເຖິງ, ເດັກນ້ອຍໃນເກນອາຍຸຕ່ຳກວ່າ 1 ປີ, ໄດ້ຮັບການສັກຢາ-ຢອດຢາກັນພະຍາດ, ທຽບໃສ່ແຜນການປະຕິບັດໄດ້ 77% ແລະ ມາຮອດປັດຈຸບັນ ອັດຕາການຊົມໃຊ້ວິດຖ່າຍທົ່ວແຂວງ ກວມເອົາ 66,5%, ນຳໃຊ້ນ້ຳສະອາດ ກວມເອົາ 83%, ສ້າງບ້ານແບບຢ່າງທາງດ້ານສາທາລະນະສຸກ ໄດ້ 322 ບ້ານໃນທົ່ວແຂວງ, ວຽກງານ 3 ສ້າງ ກໍໄດ້ເອົາໃຈໃສ່ນຳພາຈັດຕັ້ງປະຕິບັດຢູ່ 2 ເມືອງ ແລະ 4 ບ້ານຂອງແຂວງ, ວຽກງານຄຸ້ມຄອງລັດ, ຄຸ້ມຄອງເສດຖະກິດ-ສັງຄົມຂອງແຂວງໄດ້ຫັນໄປສູ່ລະບຽບກົດໝາຍ, ທຸກຂັ້ນຕອນຂອງການບໍລິຫານວຽກງານ ແລະ ການບໍລິການຮັບໃຊ້ປະຊາຊົນ ຕາມທິດ 3 ສ້າງໄດ້ຮັບການເອົາໃຈໃສ່, ໂດຍໄດ້ແບ່ງຂັ້ນຄຸ້ມຄອງ ແລະ ດັດແປງກົນໄກການພົວພັນປະສານງານລະຫວ່າງ ຂະແໜງການຂັ້ນແຂວງກັບທ້ອງຖິ່ນຢ່າງຈະແຈ້ງ ແລະ ໄດ້ເຮັດໃຫ້ບ້ານທຸກຍາກຫລຸດລົງຈາກ 88 ບ້ານ ໃນເມື່ອກ່ອນຍັງເຫລືອ ພຽງ 14 ບ້ານ.
ເລຂາພັກແຂວງວຽງຈັນ ເປີດເຜີຍວ່າ: ຜ່ານການຈັດຕັ້ງໃນໄລຍະຜ່ານມາ, ຍັງມີຫລາຍດ້ານທີ່ຈະຕ້ອງສືບຕໍ່ບຸກບືນຈັດຕັ້ງປະຕິບັດບາງວຽກງານໃຫ້ມີຜົນສຳເລັດດີຂຶ້ນກວ່າເກົ່າຄື: ສືບຕໍ່ພັດທະນາເສດຖະກິດ-ສັງຄົມ ໃຫ້ຂະຫຍາຍຕົວຕໍ່ເນື່ອງ ແລະ ໝັ້ນທ່ຽງ, ໂດຍສຸມໃສ່ການຜະລິດສະບຽງອາຫານ ແລະ ສິນຄ້າທີ່ມີທ່າແຮງ, ສຸມໃສ່ພັດທະນາ 4ອຸດສາຫະກຳທີ່ເປັນເສົາຄ້ຳ ແລະ ພັດທະນາເທສະບານແຂວງໃຫ້ເກີດມີສີສັນຕົວເມືອງ, ພ້ອມດຽວກັນນີ້ ຈະຕ້ອງສູ້ຊົນໃຫ້ບັນລຸບັນດາເປົ້າໝາຍການພັດທະນາແບບຍືນຍົງ ແລະ ສຸມໃສ່ສ້າງແຂວງໃຫ້ຫລຸດພົ້ນອອກຈາກຄວາມທຸກຍາກໃຫ້ໄວທີ່ສຸດ.
ແຫ່ລງຂ່າວ
