ໃຕ້ແສງສະຫວ່າງມະຕິກອງປະຊຸມໃຫຍ່ ຄັ້ງທີ IX ຂອງພັກ ແຂວງອັດຕະປື ໄດ້ຂະຫຍາຍຕົວຢ່າງຕໍ່ເນື່ອງສາມາດເປັນພື້ນຖານໃຫ້ແກ່ການພັດທະນາ ໂດຍ ໃນ 5 ປີມານີ້ ຄວາມຈະເລີນກ້າວແບບກະໂດດ ອັນໄດ້ເຮັດໃຫ້ແຂວງອັດຕະປືດຽວນີ້ມີໂສມໜ້າໃໝ່ທີ່ແຕກຕ່າງຈາກເມື່ອກ່ອນຢ່າງປະຈັກຕາ.
ສະຫາຍ ດຣ. ນາມ ວິຍະເກດ ເລຂາພັກແຂວງ, ເຈົ້າແຂວງອັດຕະປືກ່າວຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ X ຂອງພັກກ່ຽວກັບການພັດທະນາ ແຂວງອັດຕະປືໃນໄລຍະໃໝ່ວ່າ: ໃນຊຸມປີ 1990 ຫາຕົ້ນຊຸມປີ 2000 ປະຊາຊົນ ແຂວງອັດຕະປື ກວມ 90% ແມ່ນດຳລົງຊີວິດຢູ່ເຂດຊົນນະບົດຫ່າງໄກສອກຫຼີກ ແລະຄອບຄົວທຸກຍາກຍັງກວມຫຼາຍກວ່າ 10,68%, ຈົນຖືກຂະໜານນາມວ່າ ອັດຕະປືຂາຍຄຳແລກໄກ່ ແລະອີກຢ່າງໜຶ່ງຄືໄປແລ້ວບໍ່ຢາກມາເນື່ອງຈາກວ່າເວລານັ້ນ ອັດຕະປືເປັນເຂດຫ່າງໄກສອກຫຼີກ ຫຼື ເປັນແຂວງອັດຕັນການຄົມມະນາຄົມຫຍຸ້ງຍາກ, ການຂົນສົ່ງບໍ່ສະດວກ, ເສດຖະກິດບໍ່ຂະຫຍາຍຕົວ, ລະດັບຊີວິດການເປັນຢູ່ຂອງປະຊາຊົນບໍ່ໄດ້ຮັບການພັດທະນາພໍເທົ່າໃດ.
ໃນໄລຍະຕໍ່ມາພັກ-ລັດ ຈິ່ງສຸມໃສ່ສ້າງ ແຂວງອັດຕະປືບ່ອນທີ່ເປັນເຂດທີ່ໝັ້ນ ແລະພື້ນຖານຂອງການປະຕິວັດ, ເຂດທີ່ມີມູນເຊື້ອອັນພິລະອາດຫານຕໍ່ສູ້ບໍ່ຍອມຈຳນົນຂອງບັນດາວິລະບູລຸດ ແລະ ວີລະຊົນ ກໍຄືພະນັກງານນັກຮົບປະຕິວັດຊາວ ແຂວງອັດຕະປື ບວກກັບການຕັດສິນໃຈ ເປັນເອກະພາບຂອງຄະນະພັກ, ອຳນາດການປົກຄອງ ແລະປະຊາຊົນບັນດາເຜົ່າເຂົ້າຮ່ວມຂະບວນການປົກປັກຮັກສາ ແລະພັດທະນາສ້າງສາບ້ານເມືອງຂອງຕົນຢ່າງຫ້າວຫັນ.
ນັບແຕ່ກາງຊຸມປີ 2000 ມາຮອດປະຈຸບັນ ແຂວງ ໄດ້ມີການຫັນປ່ຽນດ້ວຍໂສມໜ້າໃໝ່, ໂດຍຖືເອົາການສົ່ງ ເສີມການປູກ, ການລ້ຽງທີ່ເປັນອາຊີບຫຼັກຂອງປະຊາຊົນບັນດາເຜົ່າຫັນໃຫ້ເປັນໂຄງການບຸລິມະສິດ ເພື່ອລົງຊີ້ນຳ-ນຳ ພາປະຊາຊົນເຮັດຕົວຈິງ ເພື່ອຫັນປ່ຽນຈາກການຜະລິດແບບທຳມະຊາດໄປສູ່ການຜະລິດນຳໃຊ້ເຕັກນິກໃໝ່, ແນວພັນໃໝ່ທີ່ມີສະມັດຖະພາບສູງກວ່າເກົ່າ, ເອົາການຜະລິດຕິດພັນກັບຕະຫຼາດແຕ່ຫົວທີ, ຖືເອົາການກະສິກຳເປັນແຜນບຸລິມະສິດຂອງແຂວງໃນການພັດທະນາໃນໄລຍະໃໝ່ເປັນຕົ້ນແມ່ນການປູກມັນຕົ້ນທີ່ມີຕະຫຼາດກັບທີ່, ປູກສາລີ, ປູກເຂົ້າແນວພັນໃໝ່, ປູກຫຍ້າ ແລະລ້ຽງງົວ.
ພ້ອມດຽວກັນນັ້ນ ກໍໄດ້ຄົ້ນຄວ້າສຶກສາຫາສິນຄ້າປະເພດອື່ນຕື່ມ ເພື່ອສົ່ງເສີມໃຫ້ປະຊາຊົນຜະລິດສ້າງໃຫ້ມີລາຍຮັບເພີ່ມ ແລະສົ່ງເສີມທ່າແຮງເສດຖະກິດອື່ນໆໄປພ້ອມກັນເປັນຕົ້ນຂະແໜງການບໍລິການ, ການທ່ອງທ່ຽວທຳມະຊາດ ແລະວັດທະນະທຳ, ການຂຸດຄົ້ນທ່າແຮງທາງທຳມະຊາດ ແລະອື່ນໆ.
ໄປຄຽງຄູ່ກັບການພັດທະນາຂະແໜງກະສິກຳແລ້ວສະຫາຍ ດຣ. ນາມ ວິຍະເກດ ລະບຸຕື່ມວ່າ: ພັກ-ລັດ ຍັງສຸມໃສ່ພັດທະນາລະບົບພື້ນຖານໂຄງລ່າງແນໃສ່ ຮັບປະກັນການອຳນວຍຄວາມສະດວກແກ່ການຄົມມະນາຄົມຂົນສົ່ງ ສິນຄ້າ, ການຄ້າ ແລະການບໍລິການຕ່າງໆເຊັ່ນ: ລົງທຶນຮ່ວມກັບເພື່ອນບ້ານສ້າງເສັ້ນທາງ 18 ເບ ເຊື່ອມຕໍ່ອັດຕະປືກັບ ສສ ຫວຽດນາມ, ເຮັດໃຫ້ອັດຕະປື ກາຍເປັນແຂວງເປີດ, ພ້ອມນັ້ນ ກໍຍັງມີໂຄງການລົງທຶນໄຟຟ້ານ້ຳຕົກ, ໂຄງການຂຸດຄົ້ນຄຳ ແລະແຮ່ທາດ ຊຶ່ງທັງໝົດນັ້ນໄດ້ເຮັດໃຫ້ ແຂວງອັດຕະປືໃນໄລຍະໃໝ່ມີການພັດທະນາຢ່າງວ່ອງໄວບໍ່ເຄີຍມີມາກ່ອນ, ຊີວິດການເປັນຢູ່ຂອງປະຊາຊົນກໍໄດ້ຮັບການປັບປຸງດີຂຶ້ນເທື່ອລະກ້າວ ສະເລ່ຍລາຍຮັບຕໍ່ຫົວຄົນບັນລຸ 14 ລ້ານກວ່າກີບ.
ດັ່ງນັ້ນ ຈິ່ງເວົ້າໄດ້ວ່າພາຍໃຕ້ແສງສະຫວ່າງຂອງມະຕິກອງປະຊຸມໃຫຍ່ຄັ້ງທີ IX ຂອງພັກ ແຂວງອັດຕະປືໄດ້ມີທ່າຂະຫຍາຍຕົວຢ່າງຕໍ່ເນື່ອງ ແລະສາມາດເປັນພື້ນຖານໃຫ້ແກ່ການພັດທະນາຂະຫຍາຍຕົວແບບກ້າວກະໂດດໃນແຜນການ 5 ປີ ຄັ້ງທີ 8 ຫຼື 2016-2020.
ທີ່ມາ: