ສະຫາຍ ດຣ. ສຸພັນ ​ແກ້ວ​ມີ​ໄຊ ​ເລຂາ​ພັກ​ແຂວງ, ​ເຈົ້າ​ແຂວງ​ສະຫວັນ​ນະ​ເຂດ ​ໄດ້​ລາຍ​ງານ​ການຈັດ​ຕັ້ງ​ປະຕິບັດ​ນະ​ໂຍບາຍ​ເຊື່ອມ​​ໂຍງ​ແລ​ວທາງ​ເສດຖະກິດ​ຕາ​ເວັນ​ອອກ-ຕາ​ເວັນ​ຕົກ ຕໍ່​ກອງ​ປະຊຸມ​ໃຫຍ່​ຄັ້ງ​ທີ X ຂອງ​ພັກ ​ໃນ​ວັນ​ທີ 18 ມັງກອນ​ຜ່ານ​ມາ, ​​ໂດຍ​​ໄດ້​ຊີ້​ໃຫ້​ເຫັນ​ເຖິງ​ວຽກ​ງານ​ແຕ່ລະ​ຈຸດ​ສຸມ​ຂອງ​ແຂວງ​ສະ​ຫວັນນະ​ເຂດ ​ເປັນ​ຕົ້ນ​ການ​ນຳ​ໃຊ້​ຂົວ​ມິດຕະພາບ 2 ສະຫວັນ​ນະ​ເຂດ​-ມຸກດາ​ຫານ ​ແລະ ​ເສັ້ນທາງ​ເລກ 9 ທີ່​ເປັນ​ເສັ້ນທາງ​ຜ່ານ ​ໃຫ້​​ເກີດ​ປະ​ໂຫຍ​ດສູງ​ສຸດ​ແກ່​ການ​ພັດທະນາ​ປະ​ເທດ​ຊາດ, ພ້ອມ​ທັງ​ໄດ້​ຖອດ​ຖອນ​ບົດຮຽນ​ດີ-ອ່ອນ ​ເພື່ອ​ນຳ​ໄປ​ປະຕິບັດ​ຢູ່​ຈຸ​ດອື່ນໆ​ຂອງ​ປະ​ເທດ, ​ໂດຍ​ສະ​ເພາະ​ການ​ປະຕິບັດ​ບັນດາ​ທິດ​ທາງ​ໜ້າ​ທີ່ ​ແລະ ວຽກ​ງານ​ຈຸດ​ສຸ​ມດັ່ງກ່າວ ​ໃນ​ແຜນການ​ປະຈຳ​ປີ​ຢ່າງ​ຕໍ່​ເນື່ອງ, ຈຶ່ງ​ເຮັດ​ໃຫ້ການ​ຈັດ​ຕັ້ງ​

ປະຕິບັດ​ນະ​ໂຍບາຍ​ເຊື່ອມ​ໂຍງ​ແລວ​​ເສ​ດຖະກິ​ດຕາ​ເວັນ​ອອກ-ຕາ​ເວັນ​ຕົກ ​​ມີ​ຜົນສຳ​ເລັດ​ເປັນ​ກ້າວໆ​ມາ​ແລ້ວ​ໄດ້​ຮັບຄວາມ​ເຊື່ອ​ຖື​ຕໍ່​ນັກ​ລົງທຶນ​ພາຍ​ໃນ ​ແລະ ຕ່າງປະ​ເທດ​ໄດ້​ດີ​ພໍ​ສົມຄວນ, ປະກອບສ່ວນ​ຢ່າງ​ແຂງ​ແຮງ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ​ຂອງ​ປະ​ເທດ ກໍ​ຄື​ແຂວງ​ສະຫວັນ​ນະ​ເຂດ​ເພີ້ມຂຶ້ນ​ຢ່າງ​ຕໍ່​ເນື່ອງ ​ແລະ ໝັ້ນ​ທ່ຽງຄື: ທົ່ວ​ແຂວງ​ສືບ​ຕໍ່​ມີ​ສະຖຽນ​ລະ​ພາບ​ທາງ​ດ້ານ​ການ​ເມືອງ, ສັງຄົມ​ມີ​ຄວາມ​ສະຫງົບ​-ປອດ​ໄພ​ໂດຍ​ພື້ນຖານ, ​ເສດຖະກິດ ຂະ​ຫຍາ​ຍຕົວ​ໄວ​ຂຶ້ນ GDP ​ເພີ່ມ​ຂຶ້ນ​ຈາກ 10% ​ໃນ​ປີ 2010 ມາ​ເປັນ 12,5% ​ໃນ​ປີ 2015, ສະ​ເລ່ຍ GDP ຕໍ່​ຫົວ​ຄົນ​ເພີ່ມ​ຂຶ້ນຈາກຄົນ​ລະ 897 ​ໂດ​ລາ​ສະຫະລັດ ​ໃນ​ປີ 2010, ມາ​ເປັນຄົນ​ລະ 1.785 ​ໂດ​ລາ​ສະຫະລັດ​ ​ໃນ​ປີ 2015, ການ​ລົງທຶນ​ຕ່າງປະ​ເທດ​ມີ​ມູນ​ຄ່າ​ຫລາຍ​ກວ່າ 5,2 ຕື້​ໂດ​ລາ​ສະຫະລັດ ທຽບ​ໃສ່ 5 ປີຜ່ານມາ​ເພີ່ມ​ຂຶ້ນ 82%, ມີ 160 ​ໂຄງການ​, ຊຶ່ງ​ມາ​ຈາກ 20 ກວ່າ​ປະ​ເທດ, ບັນດາ​ໂຮງ​ງານ​ອຸດສາຫະກຳ​ທີ່​ທັນ​ສະ​ໄໝ​ຈຳນວນ​ໜຶ່ງ ​ໄດ້​ຮັບ​ການ​ສ້າງ​ຕັ້ງ​ຂຶ້ນ​ໃນ​ເຂດ​​ເສດຖະກິດ​ພິ​ເສດ​ສະຫວັນ​-​ເຊ​​ໂນ, ​ເຂດ​ການ​ຄ້າ​ຊາຍ​ແດນ​-​ແດນ​ສະຫວັນ ​ແລະ ​ນອກ​ເຂດ​ເຊັ່ນ: ​ໂຮງງານ​ປະກອບ​ກ້ອງຖ່າຍຮູບ​ນິກອນ (​ຍີ່ປຸ່ນ), ​ໂຮງງານ​ຜະລິດ​ແກ້ວ​ແວ່ນຕາ​ເອຊີ​ລໍ ​(ຝຣັ່ງ), ​ໂຮງງານ​ປະ​ອບລົດ​ກະບະ​ແດ​ຮັນ​​ (ສ.​ເກົາຫລີ), ​ໂຮງງານ​ຜະລິດ​ອາ​ໄຫລ່​ລົດ​ໂຕ​​ໂຍຕາ (ຍີ່ປຸ່ນ), ​ໂຮງງານ​ຜະລິດ​ຊິ້ນສ່ວນອາ​ໄຫລ່ລົດຍົນ, ​ໂຮງງານ​ຜະລິດ​ອຸປະກອນ​ໂທລະ​ຄົມ, ​ໂຮງງານ​ຜະລິດ​ນ້ຳຕານ​ສຳ​ເລັດ​ຮູບ, ​ໂຮງງານ​ຜະລິດ​​ແປ້​ງມັນ​ຕົ້ນ, ​ໂຮງງານ​ຜະລິດ​ເຫລັກ​​ເສັ້ນ, ​ໂຮງງາ​ນຜະລິດ​ຊີມັງ ​ແລະ ​ໂຮງງານ​ອື່ນ​ໆ, ຈຳນວນ​ພາຫະ​ນະ​ຂົນ​ສົ່ງ​ສິນຄ້າ ​ແລະ ​​ໂດຍ​ສານ​ເຂົ້າ​-ອອກ​ຜ່ານ​ດ່ານ​ສາກົນ​ຂົວ​ມິດຕະພາບ II ​ແລະ ດ່ານ​ສາກົນ​ຊາຍ​ແດນ-​ແດນ​ສະຫວັນ ມີ​ລັກສະນະ​ເພີ່ມ​ຂຶ້ນ​ຈາກ77.800 ຄັນ ​ໃນ​ປີ 2006 ມາ​ເປັນ 216.700 ຄັນ ​ໃນ​ປີ 2015 ສ​ະ​ເລ່ຍຈາກ 264 ຄັນ​ຕໍ່​ວັນ ມາ​ເປັນ 537 ຄັນ​ຕໍ່​ວັນ, ມູນ​ຄ່າ​ສິນຄ້າ​ຂາ​ອອກ-ຂາ​ເຂົ້າ ຜ່ານ​ດ່ານ​ສາກົນ​ຂົວ​ມິດຕະພາບ II ບັນລຸ​ໄດ້ 1.341 ຕື້​ໂດ​ລາ​ສະຫະລັດ, ຈຳນວນ​ນັກ​ທ່ອງ​ທ່ຽວ ​ເພີ່ມ​ຂຶ້ນ​ຈາກ 435.900 ຄົນ​ໃນ​ປີ 2006 ມາ​ເປັນ 1.100.000 ກວ່າ​ຄົນ​ໃນ​ປີ 2015 ສຳລັບ​ການ​ສົ່ງ​ອອກ​ສິນຄ້າ 5 ປີ ສາມາດ​ບັນລຸ​ໄດ້​ 3,6 ຕື້​ໂດ​ລາ​ສະຫະລັດ, ມູນ​ຄ່າ​ການ​ນຳ​ເຂົ້າ​ສິນຄ້າ 1,2 ຕື້​ໂດ​ລາ​ສະຫະລັດ ​ເກີນ​ດຸນ​ການ​ຄ້າ 2,3 ຕື້​ໂດ​ລາ​ສະຫະລັດ, ການ​ເກັບ​ລາຍ​ຮັບ​ເຂົ້າ​ງົບປະມານ​ສາມາດ​ປະຕິບັດ​ໄດ້​ລື່ນ​ແຜນ​ທຸກ​ປີ ​ເພີ່ມ​ຂຶ້ນ​ໃນ​ລະດັບ 18-19%, ດ້ານ​ໂຄງ​ລ່າງ​ໄຟຟ້າ​ໄດ້​ຮັບ​ການ​ກໍ່ສ້າງ​ສະໜອງ​ໃຫ້​ແກ່​ໂຮງງານ​ອຸດສາຫະກຳ​ໄດ້​ຢ່າງ​ພຽງພໍ ​ແລະຂະຫຍາຍ​ຕາ​ຂ່າຍ​ລົງ​ສູ່​ຈຸດ​ສຸມ​ກຸ່ມ​ບ້ານ​ເຂດ​ຊົນນະບົດ​ຫ່າງ​ໄກ​ສອກຫລີກ. ມາ​ຮອດ​ປັດຈຸບັນ ບ້ານ​ທີ່​ໄດ້​ຊົມ​ໃຊ້​ກະ​ແສ​ໄຟຟ້າ​​​ກວມ​ເອົາ 87,8% ຂອງຄອບຄົວທັງ​ໝົດ.

ສະຫາຍ ​ເລຂາ​ພັກ ​ເຈົ້າ​​ແຂວງ​ສະຫວັນ​ນະ​ເຂດ ກ່າວ​ວ່າ: ຍ້ອນການ​ຊີ້​ນຳ-ນຳພາ​ຂອງ​ພັກ ກໍ​ຄື​ການຈັດ​ຕັ້ງ​ປະຕິບັດ​ມະ 9 ຂອງ​ພັກ ​ໃນ​ໄລຍະ​ຜ່ານ​ມາ​ຈຶ່ງ​ເຮັດ​ໃຫ້​ເສດຖະກິດ​ຂອງ​ແຂວງ​ສະຫວັນນະ​ເຂດ ມີ​ການ​ຂະ​ຫຍາ​ຍຕົວສູງ, ການ​ພັດທະນາ​ຊົນນະບົດ ​ແລະ ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ​ບັນ​ດາ​ເຜົ່າ​​ຫລຸດ​ລົງ​ເທື່ອ​ລະ​ກ້າວ, ປັດຈຸບັນ​ທົ່ວ​ແຂວງ​ມີ​ບ້ານ​ທຸກ​ຍາກ​ເຫລືອ​ພຽງ 149 ບ້ານ​ຫລື ​ເທົ່າ​ກັບ 14,6% ຂອງ​ຈຳນວນ​ບ້ານ​ທັງ​ໝົດ, ຄອບຄົວ​ທຸກ​ຍາກ​ຫລຸດ​ລົງ​ເຫລືອ 8.633 ຄອບຄົວ ​ເທົ່າກັບ 5,3% ຂອງ​ຄອບຄົວ​ທັງ​ໝົດ​ໃນ​ທົ່ວ​ແຂວງ ​ແລະ ​ເມືອງ​ທຸກ​ຍາກ​ຍັງ​​ເຫລືອ 2 ​ເມືອງຄື: ​ເມືອງ​ເຊ​ໂປ​ນ ​ແລະ ​ເມືອງ​ນອງ​ເທົ່າ​ນັ້ນ.

ແຫ່ລງຂ່າວ