ເພື່ອສຸມໃສ່ການພັດທະນາຊັບພະ ຍາກອນມະນຸດໃຫ້ໄດ້ທັງປະລິມານ ແລະ ຄຸນນະພາບກະຊວງສຶກສາທິການ ແລະ ກີລາ (ສສກ)ຈິ່ງໄດ້ເລັ່ງໃສ່ສືບຕໍ່ປະຕິ ຮູບລະບົບການສຶກສາແຫ່ງຊາດໃນແຕ່ ລະໄລຍະໂດຍຈະເລັ່ງໃສ່ການຍົກສູງຄຸນ ນະພາບເປັນຕົ້ນຕໍ ເພື່ອແນໃສ່ບັນລຸເປົ້າ ໝາຍສະຫັດສະວັດດ້ານການພັດທະນາ ກ່ຽວກັບອັດຕາເຂົ້າຮຽນຂອງນັກຮຽນ ໃນສາຍສາມັນສຶກສາ.
ສະຫາຍ ນາງ ແສງເດືອນ ຫຼ້າຈັນທະບູນ ຮອງເລຂາຄະນະບໍລິຫານພັກກະຊວງສຶກສາທິການ ແລະກີລາ ໄດ້ລາຍງານຕໍ່ກອງປະຊຸມໃຫຍ່ຄັ້ງທີ X ຂອງພັກກ່ຽວກັບເສີມຂະຫຍາຍຜົນສຳເລັດການປະຕິຮູບລະບົບການສຶກສາແຫ່ງຊາດໃນວັນທີ 19 ມັງກອນນີ້ວ່າ: ໃນ 5 ປີຜ່ານມາການປະຕິຮູບລະບົບການສຶກສາແຫ່ງຊາດ ກໍຄືການພັດທະນາຊັບພະຍາກອນມະນຸດ ໂດຍສະເພາະດ້ານປະລິມານ ແລະ ຄຸນນະພາບເຫັນວ່າມີຄວາມສອດຄ່ອງ, ກົມກຽວກັນດີຂຶ້ນເປັນຕົ້ນແມ່ນການ ກໍ່ສ້າງກຳລັງແຮງງານ, ນັກວິຊາການລະດັບສູງ ແລະນາຍຊ່າງກຳມະກອນ ໄດ້ມີການຫັນປ່ຽນຈາກແບບຮູບຂັນກ້າວໄປສູ່ແບບຮູບທາດເທື່ອລະກ້າວ.
ໄປຄຽງຄູ່ກັບຜົນສຳເລັດທີ່ເປັນພື້ນຖານດັ່ງທີ່ກ່າວມານັ້ນ ກໍຍັງມີຂໍ້ຄົງຄ້າງຈຳນວນໜຶ່ງ ຊຶ່ງຈະຕ້ອງໄດ້ສືບຕໍ່ແກ້ໄຂໃຫ້ສຳເລັດ ເປັນຕົ້ນແມ່ນອັດຕາການລອດເຫຼືອຂອງນັກຮຽນຊັ້ນປະຖົມ ປ.1 ຮອດ ປ.5 ບັນລຸພຽງແຕ່ 78,3%, ຄຸນນະພາບຂອງການສຶກສາທີທ່າອ່ຽງ ດີຂຶ້ນ ແຕ່ຖ້າທຽບໃສ່ພາກພື້ນ ແລະສາ ກົນ ຖືວ່າຍັງຕ່ຳ, ສະພາບການກໍ່ສ້າງພະ ຍາກອນມະນຸດເຫຼືອບໍ່ພໍຍັງເປັນບັນຫາຕ້ອງໄດ້ສືບຕໍ່ແກ້ໄຂຢ່າງຕັ້ງໜ້າ ເພື່ອ ຕອບສະໜອງກັບຄວາມຕ້ອງການຂອງຕະຫຼາດແຮງງານ ແລະແກ້ໄຂສະພາບ ການຫວ່າງງານທີ່ຈະເກີດຂຶ້ນ.
ເພື່ອຜັນຂະຫຍາຍກອງປະຊຸມໃຫຍ່ຄັ້ງທີ IX ເປັນຈິງ ແລະເພື່ອໃຫ້ສອດຄ່ອງກັບວິໄສທັດຂອງແຜນພັດທະນາເສດຖະກິດ-ສັງຄົມຂອງລັດຮອດປີ 2030 ແລະແຜນ 5 ປີຄັ້ງທີ VIII ກະຊວງສຶກສາທິການ ແລະກີລາ ຈິ່ງໄດ້ວາງວິໄສທັດ, ຍຸດທະສາດ, ຜົນໄດ້ຮັບ ແລະ ວຽກຈຸດສຸມຂອງຕົນອອກ ຊຶ່ງຜົນໄດ້ຮັບລວມໃນແຜນພັດທະນາການສຶກສາ 5 ປີຕໍ່ໜ້າ 2016-2020 ແມ່ນໃຫ້ນັກ ຮຽນ-ນັກສຶກສາທຸກຄົນມີຄວາມຮູ້ ຄວາມສາມາດ, ມີທັກສະໃນການເຮັດ ວຽກ, ມີສຸຂະພາບແຂງແຮງ ແລະມີວິ ຖີການດຳລົງຊີວິດຖືກຕາມຮີດຄອງປະ ເພນີ ແລະວັດທະນະທຳອັນດີງາມຂອງ ຊາດ.
ທັງໝົດນັ້ນ ສະຫາຍ ນາງ ແສງເດືອນ ຫຼ້າຈັນທະບູນ ລະບຸວ່າ: ກໍເພື່ອພັດທະນາຕົນເອງ ແລະປະເທດຊາດໃຫ້ຫຼຸດພົ້ນ ອອກຈາກປະເທດດ້ອຍພັດທະນາໃນປີ 2020 ແລະສາມາດເຊື່ອມໂຍງກັບພາກພື້ນ ແລະສາກົນໄດ້ ໂດຍສະເພາະແມ່ນສືບຕໍ່ປະຕິຮູບລະບົບການສຶກສາໃຫ້ກວ້າງຂວາງ, ເລິກເຊິ່ງເຖິງຖອງ, ສືບຕໍ່ຈັດຕັ້ງປະຕິບັດເປົ້າໝາຍສະຫັດສະວັດ ດ້ານການພັດທະນາທີ່ບໍ່ທັນສຳເລັດໃນປີ 2015 ໃຫ້ສຳເລັດ ແລະກ້າວເຂົ້າສູ່ການຈັດຕັ້ງປະຕິບັດເປົ້າໝາຍດ້ານການພັດ ທະນາທີ່ຍືນຍົງ ເປັນຕົ້ນແມ່ນເປົ້າໝາຍທີ 4 ທີ່ກ່ຽວຂ້ອງໂດຍກົງກັບການສຶກສາ ເຊັ່ນ: ຮັບປະກັນໃຫ້ພົນລະເມືອງລາວ ທຸກຄົນໄດ້ຮັບການສຶກສາທີ່ມີຄຸນນະ ພາບຢ່າງທົ່ວເຖິງ, ເທົ່າທຽມກັນ ແລະ ສົ່ງເສີມກາລະໂອກາດໃນການຮຽນຮູ້ຕະຫຼອດຊີວິດ ເພື່ອໃຫ້ໝົດທຸກຄົນໃນທົ່ວສັງຄົມໄດ້ຮັບການຮຽນຮູ້ ແລະເຂົ້າເຖິງການສຶກສາຫຼາຍຂຶ້ນ, ມີອາຊີບທີ່ເໝາະສົມໝັ້ນຄົງ ແລະມີຄວາມຊຳນານງານ.
ທີ່ມາ: 