ເນື່ອງຈາກສະຫວັນນະເຂດ ເປັນແຂວງໜຶ່ງທີ່ມີຈຸດພິເສດດ້ານທີ່ຕັ້ງບໍລິການທາງຜ່ານບວກກັບຄວາມສາມາດບົ່ມຊ້ອນດ້ານຊັບພະຍາກອນທຳມະຊາດ, ມີເນື້ອທີ່ປູກຝັງລ້ຽງສັດທີ່ກວ້າງຂວາງກາຍເປັນເງື່ອນໄຂອຳນວຍຄວາມສະດວກແກ່ການສົ່ງເສີມປະຊາຊົນຜະລິດສະບຽງອາຫານ ແລະພືດອຸດສາຫະກຳເປັນສິນຄ້າຕາມແລວທາງເສດຖະກິດຕາເວັນອອກ-ຕາເວັນຕົກ, ດັ່ງນັ້ນ ຈິ່ງເປັນທ່າແຮງໜຶ່ງທີ່ພາໃຫ້ເສດຖະກິດຂອງແຂວງໃນໄລຍະ 5 ປີ ຂະຫຍາຍຕົວໃນລະດັບສະເລ່ຍ 12,5% ຕໍ່ປີ ສະເລ່ຍລາຍຮັບປະຊາຊົນເພີ່ມຂຶ້ນເທົ່າຕົວທຽບໃສ່ 5 ປີກ່ອນ.
ສະຫາຍ ດຣ. ສຸພັນ ແກ້ວມີໄຊ ເລຂາພັກແຂວງເຈົ້າແຂວງໆສະຫວັນນະເຂດໄດ້ລາຍງານກ່ຽວກັບການຈັດຕັ້ງປະຕິບັດນະໂຍບາຍເຊື່ອມໂຍງແລວທາງເສດຖະກິດຕາເວັນອອກ-ຕາເວັນຕົກຕໍ່ກອງປະຊຸມໃຫຍ່ຄັ້ງທີ X ຂອງພັກໃນວັນທີ 19 ມັງກອນວ່າ: ຜ່ານການປະຕິບັດບັນດາທິດທາງໜ້າທີ່ ແລະວຽກງານ ຈຸດສຸມດັ່ງກ່າວໃນແຜນການປະຈຳປີຢ່າງຕໍ່ເນື່ອງ, ເຮັດໃຫ້ການຈັດຕັ້ງປະຕິບັດນະໂຍບາຍເຊື່ອມໂຍງແລວເສດຖະກິດຕາເວັນອອກ-ຕາເວັນຕົກໄດ້ມີຜົນສຳເລັດເປັນກ້າວໆ, ສ້າງຄວາມເຊື່ອຖືຕໍ່ນັກລົງທຶນພາຍໃນ ແລະຕ່າງປະເທດໄດ້ເປັນຢ່າງດີ, ທັງປະກອບສ່ວນຢ່າງແຂງແຮງເຂົ້າໃນການພັດທະນາເສດຖະກິດ-ສັງຄົມຂອງປະເທດກໍຄືແຂວງສະຫວັນນະເຂດເພີ່ມຂຶ້ນຢ່າງຕໍ່ເນື່ອງ ແລະ ໝັ້ນທ່ຽງ ຊຶ່ງສະແດງອອກຢູ່ບ່ອນວ່າເສດຖະກິດມີການຂະຫຍາຍຕົວໄວຂຶ້ນ GDP ເພີ່ມຈາກ 10% ໃນປີ 2010 ມາເປັນ 12,5% ໃນປີ 2015, ສະເລ່ຍໃສ່ຫົວຄົນເພີ່ມຈາກ 897 ໂດລາ ໃນປີ 2010 ມາເປັນ 1.785 ໂດລາຕໍ່ຄົນຕໍ່ປີໃນປີ 2015, ສ່ວນການລົງທຶນຕ່າງປະເທດມີທັງໝົດ 160 ໂຄງການມາຈາກ 20 ກວ່າປະເທດ ລວມມູນຄ່າຫຼາຍກວ່າ 5,2 ຕື້ໂດລາ ທຽບໃສ່ 5 ປີກ່ອນ ເພີ່ມຂຶ້ນ 82%.
ສຳລັບການສົ່ງອອກສິນຄ້າ 5 ປີສາມາດບັນລຸໄດ້ 3,6 ຕື້ໂດລາ ແລະມູນຄ່າການນຳເຂົ້າສິນຄ້າ 1,2 ຕື້ໂດລາສະຫະລັດ ເກີນດຸນການຄ້າ 2,3 ຕື້ໂດລາ, ພ້ອມນັ້ນ ຍັງສາມາດເກັບລາຍຮັບເຂົ້າງົບປະມານໄດ້ເກີນແຜນທຸກປີເພີ່ມຂຶ້ນໃນລະດັບ 18%-20%.
ດ້ານໂຄງລ່າງໄຟຟ້າໄດ້ຮັບການກໍ່ສ້າງສະໜອງໃຫ້ແກ່ໂຮງງານອຸດສາຫະກຳໄດ້ຢ່າງພຽງພໍ ແລະຂະຫຍາຍຕາຂ່າຍລົງສູ່ຈຸດສຸມກຸ່ມບ້ານເຂດຊົນນະບົດຫ່າງໄກສອກຫຼີກ, ຮອດປະຈຸບັນ ບ້ານທີ່ໄດ້ຊົມໃຊ້ກະແສໄຟຟ້າແລ້ວກວມ 80,8%, ຄອບຄົວຊົມໃຊ້ໄຟຟ້າກວມ 87,8% ຂອງຄອບຄົວທັງໝົດ, ສ່ວນບ້ານທຸກຍາກຍັງເຫຼືອພຽງ 149 ບ້ານເທົ່າກັບ 14,6% ຂອງຈຳນວນບ້ານທັງໝົດ ແລະຄອບຄົວທຸກຍາກຫຼຸດລົງເຫຼືອ 8.633 ຄອບຄົວ, ເມືອງທຸກຍາກເຫຼືອພຽງ 2 ເມືອງຄື: ເມືອງເຊໂປນ ແລະເມືອງນອງ.
ຢ່າງໃດກໍຕາມ ຄຽງຄູ່ກັນກັບຜົນສຳເລັດການຈັດຕັ້ງປະຕິບັດນະໂຍບາຍເຊື່ອມໂຍງແລວເສດຖະກິດຕາເວັນອອກ-ຕາເວັນຕົກ ກໍຍັງມີຂໍ້ຈຳກັດ ແລະສິ່ງທ້າທາຍຫຼາຍຢ່າງທີ່ຈະໄດ້ສືບຕໍ່ປັບປຸງ ແລະແກ້ໄຂ, ສະນັ້ນ ເພື່ອເປັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ VIII ຂອງລັດໃຫ້ປາກົດຜົນເປັນຈິງ, ໃນນີ້ ປະຕິບັດນະໂຍບາຍເຊື່ອມໂຍງແລວເສດຖະກິດຕາເວັນອອກ-ຕາເວັນຕົກໃຫ້ມີປະສິດທິຜົນ, ຄະນະພັກກໍຄືອົງການປົກຄອງ ແຂວງສະຫວັນນະເຂດຈະສຸມໃສ່ປະຕິບັດໜ້າວຽກງານຈຸດສຸມເປັນຕົ້ນແມ່ນສືບຕໍ່ປັບປຸງກໍ່ສ້າງ ລະບົບປ້ອງກັນຊາດ-ປ້ອງກັນຄວາມສະຫງົບໃຫ້ເຂັ້ມແຂງ, ຮັບປະກັນສະຖຽນລະພາບທາງດ້ານການເມືອງ ແລະຄວາມປອດໄພໃນສັງຄົມເປັນເງື່ອນໄຂແກ່ການພັດທະນາ, ສືບຕໍ່ຫັນລົງກໍ່ສ້າງຮາກຖານການເມືອງ, ພັດທະນາຊົນນະບົດ ແລະແກ້ໄຂຄວາມທຸກຍາກຂອງປະຊາຊົນ, ຊຸກຍູ້ ແລະສົ່ງເສີມການຜະລິດເປັນສິນຄ້າຂອງປະຊາຊົນຢ່າງແຂງແຮງກວ່າເກົ່າ,ພ້ອມກັບເອົາໃຈໃສ່ສົ່ງເສີມອຸດສາຫະກຳຂະໜາດນ້ອຍ-ກາງ ທີ່ນຳໃຊ້ເຕັກນິກທັນສະໄໝຕາມຈຸດພິເສດຂອງທ້ອງຖິ່ນ ແລະຮາກຖານ, ພັດທະນາພື້ນຖານໂຄງລ່າງຂອງແຂວງ ເພື່ອເຊື່ອມໂຍງກັບເສັ້ນທາງເລກ 9 ກັບບັນດາເມືອງຕ່າງໆ ແລະຊາຍແດນໃກ້ຄຽງ, ເພີ່ມທະວິໄນການສ້າງຄວາມສາມາດຄຸ້ມຄອງບໍລິຫານລັດໃຫ້ເຂັ້ມແຂງ ໂດຍສະເພາະລະບົບນິຕິກຳ ແລະກົນໄກຮັບໃຊ້ການບໍລິການທາງຜ່ານໃຫ້ສະດວກ ແລະມີປະສິດທີພາບ ລວມທັງການພັດທະນາຊັບພະຍາກອນມະນຸດ ແລະຍົກລະດັບສີມືແຮງງານໃຫ້ສູງຂື້ນ ເພື່ອຕອບສະໜອງແກ່ການພັດທະນາ, ສ້າງຄວາມສາມາດແຂ່ງຂັນແກ່ທຸລະກິດໃຫ້ດີກວ່າເກົ່າ.
ທີ່ມາ: