ຂປລ. ການຍົກສູງຄວາມສາມາດນຳພາ, ກຳລັງແຮງສູ້ຮົບໃໝ່ຂອງພັກ, ການເສີມຂະຫຍາຍລັກ ສະນະນຳໜ້າ ແລະ ຄວາມເປັນແບບຢ່າງຂອງສະມາຊິກພັກ ມີຄວາມໝາຍສຳຄັນ ແລະ ເປັນປັດໄຈຕັດ ສິນຕໍ່ພາລະກິດລວມຂອງຊາດ ໂດຍສະເພາະ ການນຳພາປະເທດຊາດຫລຸດພົ້ນອອກຈາກສະຖານະພາບຂອງປະເທດດ້ອຍພັດທະນາ ໃນປີ 2020 ແລະ ກ້າວສູ່ບາດລ້ຽວໃໝ່ ຂອງການພັດທະນາຕາມຈຸດໝາຍສັງຄົມນິຍົມຢ່າງໜັກແໜ້ນ.
ສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ ໄດ້ສະເໜີບົດລາຍງານການເມືອງຕໍ່ກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ ວັນທີ 18 ມັງກອນ 2016 ນີ້ວ່າ: ເພື່ອບັນລຸເປົ້າໝາຍດັ່ງກ່າວນັ້ນ, ໃນຊຸມປີຕໍ່ໜ້ານີ້ ພວກເຮົາຕ້ອງເພີ່ມທະວີການປັບປຸງ, ປົວແປງຕົນເອງໃຫ້ມີຄວາມປອດໃສ, ໜັກແໜ້ນ ແລະ ເຂັ້ມແຂງ, ຮັບປະກັນທາດແທ້ ທີ່ເປັນກອງນຳໜ້າຂອງຊົນຊັ້ນກຳມະກອນ, ເປັນຕົວແທນແຫ່ງສິດ ແລະ ຜົນປະໂຫຍດຂອງຊາວຜູ້ອອກແຮງງານ ແລະ ປວງຊົນລາວທັງຊາດ ເຊິ່ງກ່ອນອື່ນໝົດ ພັກເຮົາຕ້ອງເປັນພັກທີ່ມີສະຕິປັນຍາຄວາມຮູ້ທີ່ທັນກັບຍຸກສະໄໝ, ມີຄວາມສາມາດໃນການຄົ້ນຄວ້າ, ສ້າງບັນດາໂຄງການການເມືອງ, ແນວທາງນະ ໂຍບາຍ, ຍຸດທະສາດທີ່ມີລັກສະນະກວມລວມ ທັງສ່ອງແສງເຖິງບົດບາດການນຳພາຂອງພັກໃນການຄົ້ນ ຄວ້າ, ສະຫລຸບສັງລວມ ແລະ ຕອບແກ້ບັນຫາທີ່ເກີດຂຶ້ນຕໍ່ທຸກຂົງເຂດ ທີ່ພົວພັນເຖິງດ້ານຊີວິດການເມືອງ, ເສດຖະກິດ, ສັງຄົມ-ວັດທະນະທຳ, ວຽກງານປ້ອງກັນຊາດ-ປ້ອງກັນຄວາມສະຫງົບ ແລະ ການຕ່າງປະເທດ.
ສຳລັບບັນຫາສຳຄັນ ແລະ ວິທີການໃນປັດຈຸບັນ ແມ່ນຕ້ອງຍົກສູງຄວາມສາມາດຕົວຈິງຂອງການ ຈັດຕັ້ງພັກແຕ່ລະຂັ້ນ ໃນການກຳແໜ້ນເຊື່ອມຊຶມ, ເຂົ້າໃຈຕໍ່ແນວທາງ, ນະໂຍບາຍ, ມະຕິ ແລະ ຄຳສັ່ງທີ່ໄດ້ວາງອອກ, ພ້ອມກັນນັ້ນ ຕ້ອງຮູ້ວິທີຈັດຕັ້ງຜັນຂະຫຍາຍ ແລະ ກຳນົດມາດຕະການທີ່ຖືກຕ້ອງເຂົ້າໃນການເຄື່ອນໄຫວຂອງຄະນະພັກແຕ່ລະຂັ້ນໃຫ້ມີປະສິດທິຜົນສູງ./.
ແຫ່ລງຂ່າວ
