ຂປລ. ວັນທີ 18 ມັງກອນນີ້, ຄະນະສະຫະພັນແມ່ຍິງ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ໄດ້ນຳເອົາເຄື່ອງຊ່ວຍເຫລືອລວມມີ ເຄື່ອງບໍລິໂພກ, ພ້ອມເງິນສົດ ລວມມູນຄ່າປະມານ 12 ລ້ານກີບ ມອບໃຫ້ແກ່ສະຫະພັນແມ່ຍິງກະຊວງປ້ອງກັນປະເທດ ເພື່ອນຳໄປຊ່ວຍເຫລືອອ້າຍນ້ອງ, ນາຍ ແລະ ພົນທະຫານ ທີ່ກຳລັງປະຕິບັດໜ້າທີ່ຢູ່ເຂດທຸລະກັນດານ, ຫ່າງໄກສອກຫລີກ ໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 67 ປີ ໃນວັນທີ 20 ມັງກອນນີ້.
ພິທີມອບ-ຮັບ, ໄດ້ຈັດຂຶ້ນທີ່ກະຊວງປ້ອງກັນປະເທດ ລະຫວ່າງ ທ່ານນາງ ກອງປະດິດ ກິດຕິຄຸນ, ພັນລະຍາ ທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການກະຊວງການຕ່າງປະເທດ, ທ່ານນາງ ພິມພາ ແກ້ວມີໄຊ ປະທານສະຫະພັນແມ່ຍິງກະຊວງ (ຕປທ) ທ່ານ ພັນໂທ ຄຳພູ ສິດທິເສນ, ຄະນະບໍລິຫານງານສູນກາງສະຫະພັນແມ່ຍິງ, ປະທານສະຫະພັນແມ່ຍິງກະຊວງປ້ອງກັນປະເທດ.
ໃນໂອກາດນີ້ຄະນະສະຫະພັນແມ່ຍິງດັ່ງກ່າວ, ໄດ້ສະແດງຄວາມຮູ້ບຸນຄຸນ, ຝາກຄຳຢ້ຽມຢາມຖາມຂ່າວ ແລະ ສົ່ງພອນໄຊອັນປະເສີດ ໄປຍັງຄະນະນຳກະຊວງປ້ອງກັນປະເທດ, ນາຍ ແລະ ພົນທະຫານ, ນັກຮົບ ແລະ ສະມາຊິກຄອບຄົວທຸກຖ້ວນໜ້າ ຈົ່ງມີສຸຂະພາບເຂັ້ມແຂງ, ປະສົບຜົນສຳເລັດອັນຍິ່ງໃຫຍ່ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.
ແຫ່ລງຂ່າວ
